މާލެ ސަރަޙައްދުގެ ސަރުކާރުގެ ހޮސްޕިޓަލް ތަކުގެ އެނދުގެ ކެޕޭސިޓީ އިތުރުކުރަނީ

މާލެ ސަރަޙައްދުގެ ސަރުކާރުގެ ހޮސްޕިޓަލް ތަކުގެ އެނދުގެ ކެޕޭސިޓީ އިތުރުކުރުމަށް މަސައްކަތްކުރަމުންދާ ކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވެއްޖެއެވެ.

ޢަބްދުއްރައްޒާޤް މިހެން ވިދާޅުވީ ދައުލަތުގެ މީޑިއާ އަށް ދެއްވި ޚާއްސަ ބަސްދީގަތުމެެއްގައެވެ. 

މިމަޝްރޫޢުގެ ދަށުން އެނދުތައް އިތުރުކުރުމަށް މަސައްކަތްކުރަމުންދަނީ އައިޖީއެމްއެޗާއި، ހުޅުމާލެ ހޮސްޕިޓަލަށް ކަމަށް ސީއީއޯ ޢަބްދުއްރައްޒާޤް ވަނީ ވިދާޅުވެފައެވެ. 

މިކަމާގުޅޭ ގޮތުން ވާހަކަފުޅު ދައްކަވަމުން ޢަބްދުއްރައްޒާޤް ވިދާޅުވީ އައިޖީއެމްއެޗްގެ ކުރީގެ އެޑްމިނިސްޓްރޭޓިވް ބްލޮކް އެއްކޮށް ހުސްކޮށްފައި އެތަނުގައި ވޯޑެއް ހަދަމުންދާ ކަމަށެވެ. އަދި އެތަނުގައި ހަދަމުންދާ 75 އެނދުގެ ވޯޑުގެ މަސައްކަތް މިއަހަރު ނިންމާ އަންނަ އަހަރުގެ ކުރީކޮޅު ޚިދުމަތްދޭން ފެށޭނެ ކަމަށްވެސް ސީއީއޯ ވަނީ ވިދާޅުވެފައެވެ. 

 އަދި ހުޅުމާލޭ ހޮސްޕިޓަލުގެ އީއާރް ބޮޑުކުރުމުގެ މަސައްކަތުގެ ދަށުން 14 އެނދު އިތުރުކުރުމުގެ މަސައްކަތް ދަނީ ކުރަމުން ކަމަށްވެސް ޢަބްދުއްރައްޒާޤް ވިދާޅުވިއެވެ.

މީގެއިތުރުން ހުޅުމާލޭ ހޮސްޕިޓަލުގެ 6 ބުރީ ޢިމާރާތުގެ 3 ވަނަ ފަންގިފިލާއަކީ ވޯޑެއްގެ ގޮތުގައި ހަމަޖައްސާ އެތަނަށް 28 އެނދު އިތުރުކުރުމުގެ މަސައްކަތްކުރަމުންދާކަމަށް ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވިއެވެ. 

މިއީ އަންނަ އަހަރުގެ ކުރީކޮޅަށް ރާވާފައިވާ ބައެއް މަސައްކަތްތައްކަމަށާއި، މިމަޝްރޫޢުތަކާއެކު މާލެ ސަރަޙައްދުގެ ސަރުކާރު ހޮސްޕިޓަލުތަކުގެ އެނދުގެ ކެޕޭސިޓީ 433 އަށް އިތުރުވެގެންދާނެކަން ޢަބްދުއްރައްޒާޤް ފާހަގަކުރެއްވެވިއެވެ.

މުޅި ރާއްޖޭގެ އެކި ސަރަޙައްދުތަކުން މާލެ ސަރަޙައްދުގައި ހިމެނޭ ސަރުކާރު ހޮސްޕިޓަލްތަކަށް ބަލިމީހުން ރިފަރކުރާއިރު، އާބާދީއަށްވުރެ ބޮޑުތަނުން މަދުކޮށްހުރި މިހޮސްޕިޓަލްތަކުގެ އެނދުތަކަށް ބާރު ބޮޑުވެގެންދާކަމަށް ސީއީއޯ ޢަބްދުއްރައްޒާޤް ވިދާޅުވިއެވެ. އެއީ ރައްޔިތުންނަށް ރަނގަޅު ޚިދުމަތެއް ފޯރުކޮށްދިނުމަށް އަބަދުވެސް ކުރިމަތިވަމުންދާ އެންމެ ބޮޑު ހުރަސްކަން ފާހަގަކުރައްވައި ސީއީއޯ ވިދާޅުވީ އެގޮތުން މާލެ ސަރަޙައްދުގައި ވޭތުވެދިޔަ 30 އަހަރުގެ ތެރޭގައި ޞިއްޙީ ނިޒާމުގައި ހުރީ 316 އެނދުކަމަށެވެ. 

 މިކަމަށް ޙައްލެއްގެނައުމަށް މިހާރު ކުރަމުންގެންދާ މަސައްކަތްތަކުން އަންނަ އަހަރުގެ ކުރީކޮޅު ބަދަލު ފެނިގެންދާނެކަމަށެވެ.