ނަފްސާނީ ދުޅަހެޔޮކަން ބިނާވަނީ ގޭތެރެއާއި މުޖުތަމަޢުން ލިބޭ އަޅާލުމުގެ މައްޗަށް: މެޑަމް ސާޖިދާ

ނަފްސާނީ ދުޅަހެޔޮކަން ބިނާވަނީ އިންސާނާއަށް ލިބޭ އަޅާލުމާއި، ދިރިއުޅޭ މުޖުތަމަޢާއި ވަށައިގެންވާ މީހުންގެ ސަބަބުން ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ. 

އެކަމަނާ މިހެން ވިދާޅުވީ ދުނިޔޭގެ ނަފްސާނީ ދުޅަހެޔޮކަމުގެ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައެވެ.

މެޑަމް ސާޖިދާ ވިދާޅުވީ، ނަފްސާނީ ދުޅަހެޔޮކަމަކީ ކޮންމެ ދުވަހަކުވެސް މީހާގެ ގޭތެރެއިންނާއި، ސްކޫލްތަކުންނާއި، މަސައްކަތުގެ މާހައުލުން އަދި މުޖުތަމަޢުގެ ތެރެއިން ބައްޓަންވަމުން އަންނަ ކަމެއް ކަމަށެވެ. އަދި އެކަކު އަނެކަކުގެ ވާހަކަތައް ކަނުލައި އަޑުއަހައި، އެހީތެރިކަން ފޯރުކޮށްދޭ ގޮތުން މީހެއްގެ ދިރިއުޅުމަށް ވަރަށް ބޮޑު ހެޔޮ ބަދަލެއް ގެނެވިދާނެކަން އެކަމަނާ ފާހަގަކުރެއްވިއެވެ.

Mental health is shaped by the care we receive, by the communities we live in and the people who surround us. It is shaped every day in our homes, schools, workplaces and communities. The way we listen and support one another can make a profound difference. On #WorldMentalHealthDay, let us recognise that those who face mental health challenges bring invaluable insight into what meaningful support truly looks like. We must also change the language we use and the attitudes we hold towards mental health, while encouraging individuals to seek help, and raise awareness that support is available to anyone who needs it. Let us stop the stigma and build an environment where people feel heard and supported. #WorldMentalHealthDay

— First Lady Sajidha Mohamed (@sajidhaamohamed) October 10, 2026

މީގެއިތުރުން، މާނަހުރި އެހީތެރިކަމަކީ ކޮބައިކަން އެންމެ ރަނގަޅަށް ބުނެދެވޭނީ ނަފްސާނީ ގޮންޖެހުންތަކާ ކުރިމަތިލަމުންދާ ފަރާތްތަކުންކަން މުޖުތަމަޢުން ބަލައިގަންނަން ޖެހޭ ކަމަށްވެސް އެކަމަނާ ވިދާޅުވިއެވެ. އަދި އެފަދަ ފަރާތްތަކުން އެހީތެރިކަން ހޯދުމަށް ހިތްވަރުދީ، އެހީތެރިކަން ލިބެން ހުރިކަމުގެ ހޭލުންތެރިކަން އިތުރުކުރާ ފަދައިން، ނަފްސާނީ ދުޅަހެޔޮކަމާމެދު ގެންގުޅޭ ވިސްނުމާއި ބޭނުންކުރާ ބަސްމަގު ބަދަލުކުރުމުގެ މުހިންމުކަންވެސް އެކަމަނާ ފާހަގަކުރެއްވިއެވެ.

ރައީސުލްޖުމްހޫރިއްޔާގެ އަނބިކަނބަލުންގެ މެސެޖު ނިންމަވާލައްވަމުން ވަނީ، ނަފްސާނީ ބަލިތަކާމެދު މުޖުތަމަޢުގައި އޮންނަ ނޭދެވޭ ތަސައްވުރު ނައްތާލައި، އެންމެންގެ އަޑުވެސް އަހައިދޭ، އެހީތެރިކަން ފަސޭހައިން ލިބޭނެ ފަދަ އޯގާތެރި މާހައުލެއް ބިނާކުރުމަށް އެންމެހައި ފަރާތްތަކަށް ގޮވާލައްވާފައެވެ.