Ads by Exprox

ޚަބަރު

އާސަންދަ ޚިދުމަތް ދުބާއީ އަދި ބެންކޮކްގެ ތިން ހޮސްޕިޓަލަކުން ލިބޭގޮތް ހަމަޖެހިއްޖެ

އާސަންދަ ޚިދުމަތް ދުބާއީ އަދި ބެންކޮކްގެ ތިން ހޮސްޕިޓަލަކުން ލިބޭގޮތް ހަމަޖެހިއްޖެ

އެއްބަސްވުމުގައި ސޮއިކުރުމުގެ ރަސްމިއްޔާތު ފޮޓޯ:އާސަންދަ

އާމިނަތު ޔުމްނާ

އާމިނަތު ޔުމްނާ

10 ޑިސެމްބަރު 2024، 03:59

10 ޑިސެމްބަރު 2024، 03:59

ދައުލަތުގެ ސިއްޙީ އިންޝުއަރެންސް ސްކީމް އާސަންދައިގެ ޚިދުމަތް ދިނުމަށް ދުބާއީގެ އެއް ހޮސްޕިޓަލަކާއި، ބެންކޮކްގެ ދެ ހޮސްޕިޓަލަކާއެކު މިއަދު އެއްބަސްވުމުގައި ސޮއިކޮށްފިއެވެ. މިގޮތުން އާސަންދަ ޚިދުމަތް ދޭން އަލަށް އެއްބަސްވެވުނު ހޮސްޕިޓަލްތަކަކީ ދުބާއީގެ ބުރްޖީލް މެޑިކަލް ސިޓީއާއި، ބެންކޮކްގެ ވޯލްޑް މެޑިކަލް ހޮސްޕިޓަލް އަދި ބެންކޮކް ހޮސްޕިޓަލެވެ.

އާސަންދައިން މައުލޫމާތު ދެމުން ބުނެފައިވަނީ، މި އެއްބަސްވުމުގެ ދަށުން އަންނަ އަހަރުގެ ޖެނުއަރީ 15 އިން ފެށިގެން ވަކި އުސޫލެއްގެ ދަށުން މި ހޮސްޕިޓަލްތަކަށް ފަރުވާއަށް ފޮނުވަން ފަށާނެ ކަމަށެވެ. މިހާތަނަށް އާސަންދައިގެ ދަށުން އެންމެ ގިނަ ދިވެހިން ފަރުވާ ހޯދަމުން އައީ އިންޑިއާއިންނެވެ.

މި އެއްބަސްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދުފުޅެއް ފުއްދުމުގެ ގޮތުން އެޅުނު ފިޔަވަޅެކެވެ. ރައީސް މުޢިއްޒު މިއަހަރުގެ ޖެނުއަރީ މަހު ވިދާޅުވެފައިވަނީ، މިހާރު އާސަންދަ ލިބޭ ޤައުމުތަކަށްވުރެ މާ ފެންވަރު ރަނގަޅު، މާ މަތީ ފަންތީގެ ޤައުމުތަކުން އާސަންދަ ލިބޭގޮތް ހަމަޖައްސަން މަސައްކަތްކުރައްވާނެ ކަމަށެވެ.

މި އެއްބަސްވުމާއެކު، ދިވެހި ރައްޔިތުންނަށް ޔޫއޭއީ އާއި ތައިލެންޑުގެ ޒަމާނީ އަދި ފެންވަރު ރަނގަޅު ސިއްޙީ ޚިދުމަތްތައް އާސަންދައިގެ ދަށުން ލިބުމުގެ މަގު ތަނަވަސްވެގެން ދާނެއެވެ. މިއީ ދިވެހި ރައްޔިތުންގެ ސިއްޙީ ރައްކާތެރިކަން އިތުރުކޮށް، ފެންވަރު ރަނގަޅު ބޭސްފަރުވާއަށް ފަސޭހައިން ވާސިލުވުމުގެ ފުރުސަތު ފަހިވެގެންދާނެ ކަމެކެވެ.
                    

މި ލިޔުން ކިޔާލުމުން

Ads by MSS