އިޒްރާއިލުން ޣައްޒާގެ ނުޞައިރަތަށް ވަރުގަދަ ހަމަލާތަކެއް ދީފި

އިޒްރާއިލުން ޣައްޒާގެ ނުޞައިރަތް ކޭމްޕަށް ވަރުގަދަ ވައިގެ ހަމަލާތަކެއް ދީފިއެވެ.

އިޒްރާއިލުން ނުޞައިރަތް ކޭމްޕަށް ދިން މިނުރައްކާތެރި ވައިގެ ހަމަލާގެ ސަބަބުން 7 މީހަކު ޝަހީދުވެ ގިނަ ބަޔަކު ޒަޚަމްވެފައިވާ ކަމަށް އަލްޖަޒީރާގައި ވަނީ ބުނެފައެވެ. 

މިހަމަލާއާއި ގުޅިގެން ޣައްޒާގެ ސިވިލް ޑިފެންސް ޓީމުން ބުނެފައިވަނީ ނުޞައިރަތަށް ދިން މިހަމަލާ އަމާޒުވި ގެއިން ޝަހީދުވި 7 މީހެއްގެ ހަށިގަނޑު ނެރެފައިވާ ކަމަށާއި ޒަޚަމްވި ގިނަ ބަޔަކު އަވަސް ފަރުވާއަށް ގެންދެވިފައިވަ ކަމަށެވެ. 

ހަމަލާގައި ޒަޚަމްވި މީހުން ފަރުވާއަށް ގެންދިޔަ ހޮސްޕިޓަލް ކަމަށްވާ އަލްއައުދާ ހޮސްޕިޓަލަށް ހަވާލާދީ އަނަދޫ އެޖެންސީން ބުނެފައިވަނީ ހަމަލާގައި ޒަޚަމްވި މީހުންގެ ތެރޭގައި އަންހެނަކާއި ތިން ކުޑަކުއްޖަކުވެސް ހިމެނޭ ކަމަށެވެ. މީގެ އިތުރަށް ބުނެފައިވަނީ އިޒްރާއީލުގެ ހަމަލާތަކުގެ ސަބަބުން ވަށައިގެންވާ އިމާރާތްތަކަށް ވެސް ވަރަށް ބޮޑަށް ގެއްލުން ލިބިފައިވާ ކަމަށެވެ. 

މީގެ އިތުރުން ޤުދުސް ނިއުސް ނެޓްވޯކުން ރިޕޯޓްކޮށްފައިވާ ގޮތުގައި މި ހަމަލާގެ ޝިކާރައަކަށް ވެފައިވާ މީހުންގެ ތެރޭގައި ފަލަސްތީނުގެ ފުޓްބޯޅަ ކުޅުންތެރިޔާ މުހައްމަދު ޚަލީފާވެސް ހިމެނެއެވެ.

މެޑިކަލް އޮފިސަރަކަށް ހަވާލާދީ އަލްޖަޒީރާގައި އިތުރަށް ބުނެފައިވަނީ ޣައްޒާގެ އައްސޭރިފަށުގެ ސަރަހައްދުގައި މިއަދު 13 މީހަކު ޝަހީދުވެފައިވާ ކަމަށެވެ. 

 ހޯމަ ދުވަހުގެ ރޭ ޣައްޒާ ސިޓީގެ އުތުރުގައި އޮންނަ ޝެއިޚް ރަދުވާންގެ މެގްދާދު އާއިލާގެ ގެއަށް އަމާޒުކޮށް އިޒްރާއީލުން ދިން ވައިގެ ހަމަލާއެއްގައި ފަލަސްޠީނުގެ މީހަކު ޝަހީދުވެ ގިނަ ބަޔަކު ޒަޚަމްވެފައިވާކަމަށް އަލްޖަޒީރާގައި ބުނެފައިވެއެވެ.

 މީގެ އިތުރުން ހޯމަ ދުވަހުގެ ހަވީރު، ޣައްޒާގެ އުތުރުގައި ހުންނަ ގެދޮރު ގެއްލިފައިވާ މީހުން ތިބި ވަގުތީ ހިޔާއަކަށް އަމާޒުކޮށް ދިން ހަމަލާއެއްގައިވެސް ގިނަ ބަޔަކު ޝަހީދުވެގެން ގޮސްފައިވާ ކަމަށް އަލްޖަޒީރާގައި ވަނީ ބުނެފައެވެ. 

ޣައްޒާގެ ދެއިރް އަލް ބަލަހް އިން ރިޕޯޓު ކުރަމުން ހާނީ މަޙްމޫދު ވިދާޅުވެފައިވަނީ ބެއިތް ޙަނޫނަށް ދަތުރުކުރަމުންދިޔަ ގެދޮރުގެއްލިފައިތިބި ބަޔަކަށް އަމާޒުކޮށް ދިން ހަމަލާއެއްގައި އެއް އާއިލާއެއްގެ 20 މީހަކު ޝަހީދުވެފައިވާކަމަށެވެ. އޭގެ ތެރޭގައި އަންހެނުންނާއި ކުޑަކުދިން އަދި ޢުމުރުން ދުވަސްވީ މީހުންނާއި ފިރިހެނުންވެސް ހިމެނޭކަމަށެވެ. 

އިޒްރާއީލުން ޣައްޒާއަށް ދެމުންދާ ހަމަލާތަކުގައި  ފަލަސްތީނުގެ 44،758 މީހުން މިހާތަނަށް ޝަހީދުވެފައިވެއެވެ. އަދި 105،834 މީހުން ޒަޚަމްވެފައިވެ އެވެ.