ދުނިޔެ
ސީރިޔާގެ ވަގުތީ ސަރުކާރުގެ ބޮޑުވަޒީރެއްގެ ގޮތުގައި މުޙައްމަދު އަލް ބަޝީރު ރަސްމީކޮށް އައްޔަނުކޮށްފި

މުޙައްމަދު އަލް ބަޝީރު
ސީރިޔާގެ ވަގުތީ ސަރުކާރުގެ ބޮޑުވަޒީރެއްގެ ގޮތުގައި މުޙައްމަދު އަލް ބަޝީރު ރަސްމީކޮށް އައްޔަނުކޮށްފިއެވެ.
ސީރިޔާގެ ރަސްމީ ޓީވީން ނެރުނު ބަޔާނެއްގައި ބުނެފައިވަނީ ސީރިޔާގެ އިންތިޤާލީ ސަރުކާރުގެ ކެއާޓޭކަރ ޕްރައިމް މިނިސްޓަރު ކަމަށް މުހައްމަދު އަލް ބަޝީރު އައްޔަން ކުރައްވާފައިވާކަމަށެވެ.
އަދި މުޙައްމަދު އަލް ބަޝީރުގެ ބޮޑުވަޒީރުކަން ދިގު ދެމިގެން ދާނީ 2025 ވަނަ އަހަރުގެ މާޗް މަހުގެ 1 ވަނަ ދުވަހުގެ ނިޔަލަށް ކަމަށްވެސް ބުނެފައިވެއެވެ.
މުޙައްމަދު އަލްބަޝީރަކީ އެޗްޓީއެސް އާއި ގާތް ގުޅުމެއް އޮންނަ ބޭފުޅެކެވެ. އެޖަމާޢަތަކީ ދިމިޝްޤު ހިފުމަށް އިސްކޮށް އުޅުނު ޖަމާޢަތެވެ.
ސީރިޔާގައި އެތައް އަހަރެއް ވަންދެން ދިގުދެމިގެންދިޔަ ބައްޝާރުލް އަސަދުގެ އަނިޔާވެރި ވެރިކަން ވެއްޓުމާއި ގުޅިގެން ސަރަޙައްދުގެ އެކި ޤައުމުތަކަށް ހިޖުރަކޮށްފައިވާ ސީރިޔާގެ އެތައް ބަޔަކު ދަނީ އެނބުރި ޤައުމަށް ދަމުންނެވެ.
މީގެއިތުރުން ބައްޝާރުލް އަސަދުގެ ވެރިކަމުގައި އަނިޔާވެރިކަމާއެކު ޖަލުތަކުގައި ބަންދުކޮށްފައި ތިބި އެތައް ބަޔަކު ޖަލުތަކުން ދަނީ މިނިވަން ކުރަމުންނެވެ. ޖަލުތަކުން މިހާތަނަށް މިނިވަން ކުރި މީހުންގެ ތެރެއިން 130،000 އަށްވުރެ ގިނަ މީހުން ނަފްސާނީ އެހީތެރިކަމަށް ބޭނުންވެފައިވާކަން އަލްޖަޒީރާގައި ހާމަކޮށްފައިވެއެވެ.