އެމްޑީޕީގެ ޓެރަރިޒަމަށް ހިތްވަރުދޭ ވާހަކަތައް ޕީއެންސީ އިން ކުށްވެރިކޮށްފި

އިދިކޮޅު އެމްޑީޕީއިން ޓެރަރިޒަމަށް ހިތަވްރުދޭ ގޮތައް ދެއްކި ވާހަކަތައް ވެރިކަންކުރާ ޕީއެންސީ އިން ކުށްވެރިކޮށްފިއެވެ.

ޕީއެންސީއިން ނެރެފައިވާ ނޫސްބަޔާނެއްގައި ބުނެފައިވަނީ ދިވެހިރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރަޢީސް ސުމުއްވުލް އަމީރު މުޙައްމަދު އަމީން ދޮށިމޭނަކިލޭފާނާއި މެދު ސިޔާސީ ބަޔަކު އުފެއްދި ނަފުރަތާއި ރުޅިވެރިކަމުގެ ސަބަބުން މާލޭގައި ހަވަރު އެއްވެ، އެކިލެގެފާނު ރާއްޖެއިން ބޭރުން މާލެ އަށް ވަޑައިގަތުމުން ހަށިކޮޅަށް އަނިޔާކޮށް އަމީން އަވަހާރަކޮށްލި ގޮތަށް މިހާރުގެ ރައީސް ޑރ މުޙައްމަދު މުޢިއްޒާއި މެދު ޢަމަލުކުރުމަށް ހިތްވަރުދީ އެމްޑީޕީގެ ޕޯޑިއަމްގައި ދެއްކި ވާހަކަތައް އެޕާޓީއިން ކުށްވެރިކުރާ ކަމަށް ޕީއެންސީ އިން ބުނެފައިވެއެވެ.

ޕީއެންސީ އިން ބުނެފައިވަނީ ރައީސް އަމީންއާއި މެދު ކަން ހިނގައިދިޔަ ގޮތަކީ ދިވެހިރާއްޖޭގެ ތާރީޚުގެ އަނދިރި ޞަފްޙާއެއް ކަމަށެވެ. 

މީގެއިތުރުން ޕީއެންސީ އިން ބުނެފައިވަނީ މިއަދު ޤާއިމް ކުރެވިފައިވާ ދުސްތޫރީ ނިޒާމުގެ އެންމެ މުހިންމު އެއް ބޭނުމަކީ ސިޔާސީ ކަންކަމުގެ ތެރެއަށް އަނިޔާވެރިކަމާ، ހަމަނުޖެހުމާއި، ނަފްރަތު ވަނަނުދީ، ސިޔާސީ މަސައްކަތްތައް ޑިމޮކްރެޓިކް ހަމަތަކުގެ ތެރެއިން ކުރިއަށްގެންދެވޭނެ އިންތިޒާމުތައް ހަމަޖެއްސުންކަމަށެވެ. އަދި އެއީ އިހުގެ ދިވެހި ސިޔާސީ މަސްރަހުން ފެނިފައިވާ އަނިޔާވެރި ޢަމަލުތައް އިޢާދަވިޔަނުދިނުމަށް ތަރުތީބުކުރެވިފައިވާ ނިޒާމެއް ކަމަށްވެސް ޕީއެންސީއިން ވަނީ ބުނެފައެވެ.

އެނިޒާމްގެ އަސާސްތަކާ ޚިލާފަށް އެމްޑީޕީގެ އާންމު މެމްބަރަކު ދެއްކި ވާހަކަަތައް ކުށްވެރިކުރުމުގެ ބަދަލުގައި އެޕާޓީގެ ޗެއަރޕާސަން ފައްޔާޒް އިސްމާޢިލް އެވާހަކަތަކަށް ހިތްވަރު ދެއްވުމަކީ ނުރައްކާތެރި ކަމެއްގެ ގޮތުގައި ޕީއެންސީއިން ވަނީ ސިފަކޮށްފައެވެ.

ޕީއެންސީ އިން ވަނީ މިފަދަ ވާހަކަތައް ދައްކައި އެވާހަކަތަކަށް ހިތްވަރުދިން އެމްޑީޕީގެ މެމްބަރުންނާއި މެދު ޤާނޫނީ އިމުގެ ތެރެއިން އަޅަން ޖެހޭ ފިޔަވަޅުތައް އެޅުމަށް ގޮވާލައިފައެވެ.