Ads by Exprox

ޚަބަރު

ޚިޔާލުފާޅުކުރުމުގެ މިނިވަންކަން ޤާނޫނުއަސާސީއިން ދީފައިވީ ނަމަވެސް އެހައްޤު ބޭނުން ކުރަންވާނީ ވަކި ހުދޫދެދެއްގެ ތެރެއިން

ޚިޔާލުފާޅުކުރުމުގެ މިނިވަންކަން ޤާނޫނުއަސާސީއިން ދީފައިވީ ނަމަވެސް އެހައްޤު ބޭނުން ކުރަންވާނީ ވަކި ހުދޫދެދެއްގެ ތެރެއިން

އެޗްއާރްސީއެމްގެ އޮފީސް. ފޮޓޯ: ރާއްޖެ އެމްވީ

ޙަސްނާ އަޙްމަދް

ޙަސްނާ އަޙްމަދް

10 ޑިސެމްބަރު 2024، 10:07

10 ޑިސެމްބަރު 2024، 10:07

ޚިޔާލު ފާޅުކުރުމުގެ މިނިވަންކަން ޤާނޫނުއަސާސީއިން ފުޅާ ދާއިރާއެއްގައި ދީފައިވީ ނަމަވެސް އެހައްޤު ބޭނުން ކުރަންވާނީ ވަކި ހުދޫދެއްގެ ތެރެއިން ކަމަށް ހިޔުމަން ރައިޓްސް ކޮމިޝަނުން ބުނެފިއެވެ. 

އެޗްެއާރްސީއެމުން ނެރެފައިވާ ނޫސްބަޔާނެއްގައި ބުނެފައިވަނީ އެމްޑީޕީ އިން ދާދިފަހުން ބާއްވާފައިވާ ސިޔާސީ ހަރަކާތްތަކެއް ގައި އާންމުންގެ މެދުގައި ނަފްރަތު އުފައްދާ އަނިޔާވެރިވުމަށް ހިތްވަރުލިބޭ ގޮތަށް ޕާޓީއަށް ނިސްބަތްވާ ފަރާތްތަކުން އެކިއެކި ވާހަކަދައްކާ އާންމުވެފައިވާ ވީޑިއޯތަކާ ގުޅޭގޮތުން ވާހަކަދައްކައިފައެވެ.

 އެޗްެއާރްސީއެމުން ބުނެފައިވަނީ މިނިވަންކަމާއިއެކު ފިކުރުކުރުމާއި އިސްލާމްދީނުގެ އަސްލަކާ ޚިލާފުނުވާ ގޮތުގެ މަތިން އެމީހެއްގެ ބުއްދިއަށް ފެންނަ ގޮތްތަކާއި ޚިޔާލުތައް ދުލާއި ގަލަމުން އަދި މިނޫންވެސް ގޮތްގޮތަށް ފާޅުކުރުމުގެ މިނިވަންކަމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ކަށަވަރުކޮށްދީފައިވާ ހައްޤެއްކަމަށެވެ. 

ޚިޔާލުފާޅުކުރުމުގެ މިނިވަންކަން ދިވެހި ޤާނޫނުއަސާސީއިން ފުޅާދާއިރާއެއްގައި ދީފައިވީ ނަމަވެސް މިހައްޤުގެ ބޭނުން ކުރަންވާނީ ވަކި ހުދޫދެއްގެ ތެރެއިން ކަމަށާއި، އަނެކާގެ ހައްޤުތަކަށް އިޚްތިރާމް ކުޑަނުވާނެ ގޮތައް ކަމުގައި އެޗްއާރްސީއެމުން ވަނީ ބުނެފައެވެ. 

ސިޔާސީ ޕާޓީތަކުގެ ހަރަކާތްތަކުގަޔާއި، ސޯޝަލް މީޑިއާގެ އެކި ޕްލެޓްފޯމްތަކުގައި ފާޅުކުރެވޭ ޚިޔާލުތަކުގައިވެސް މީހުންގެ މެދުގައި ނަފްރަތު އުފެއްދުމަށާއި، މުޖްތަމަޢުގެ ހަމަޖެހުމާއި މަސްލަޙަތު ނަގާލުމަށް ގޮވައިލުމުގެ އިތުރުން އަނިޔާވެރި ޢަމަލުތައް ކުރުމަށް ހިތްވަރުލިބޭ ގޮތަށް ފާޅުކުރެވޭ ޚިޔާލުތަކަކީ ޤާނުނާއި ޚިލާފު ކަމެއް ކަމަށް އެޗްއާރްސީއެމުން ވަނީ ބުނެފައެވެ. 

އަދި މިފަދަ ވާހަކަތަކަކީ އެކޮމިޝަނުން ނުހުނު ކަންބޮޑުވާ ވާހަކަތަކެއް ކަމަށާއި، މިފަދަ ޢަމަލުތައް ކުށްވެރިކޮށް ސިޔާސީ ޕާޓީތަކުންނާއި ޕާޓީ ތަކުގެ އިސްފަރާތްތަކުން މިފަދަ ޢަމަލުތައް ނުކުރުމަށް އެކޮމިޝަނުން ގޮވާލާކަމަށް އެކޮމިޝަނުން ބުނެފައިވެއެވެ. 

މީގެއިތުރުން ހަމަނުޖެހުމާއި އަނިޔާވެރި ޢަމަލުތައް ހިންގުމަށް ހިތްވަރުދޭ ޢަމަލުތައް ނުކުރުމަށް އެޗްއާރްސީއެމުން ގޮވާލާކަމަށް އެކޮމިޝަނުން ބުނެފައިވެއެވެ. އަދި ހަމަ ސިޔާސީ ޕާޓީތަކުން ކުރިއަށްގެންދާ ހަރަކާތްތައް ސުލްޙަވެރިކަމާއެކު، ކަނޑައެޅިފައިވާ ޤާނޫނީ އިމުގެ ތެރެއިން ކުރިއަށް ގެންދިޔުމަށް ހުރިހާ ޕާޓީތަކަށް އެޗްއާރްސީއެމުން ވަނީ އިލްތިމާސްކޮށްފައެވެ. 

 

މި ލިޔުން ކިޔާލުމުން

Ads by MSS