ގުރައިދޫގައި އާއިލީ ހަމަނުޖެހުމެއްގެ ތެރެއިން ވަޅިން ހަމަލާދީ މާރާމާރީއެއް ހިންގައިފި

ކ. ގުރައިދޫގައި ހިނގި އާއިލީ ހަމަނުޖެހުމެއްގެ ތެރެއިން އެކަކު އަނެކަކަށް ވަޅިން ހަމަލާދީ މާރާމާރީއެއް ހިންގައިފިއެވެ.

މި ހާދިސާއާ ގުޅިގެން ފުލުހުން މީޑިއާތަކަށް މައުލޫމާތު ދެމުން ވިދާޅުވީ، ގުރައިދޫގައި އާއިލީ މައްސަލައެއްގެ ތެރެއިން މާރާމާރީއެއް ހިނގައިގެން އުޅޭ ކަމުގެ ރިޕޯޓް ފުލުހުންނަށް ލިބިފައިވާ ކަމަށެވެ. އަދި މި ހަމަނުޖެހުމުގެ ތެރޭގައި އެކަކު އަނެކަކަށް ތޫނު އެއްޗަކުން ހަމަލާދީފައިވާ ކަމަށް ވެސް ފުލުހުން ވަނީ ކަށަވަރުކޮށްދީފައެވެ.

މި ހާދިސާ ހިނގަން މެދުވެރިވި ސަބަބާއި، މި މާރާމާރީގައި އެއްވެސް މީހަކަށް ސީރިއަސް އަނިޔާއެއް ލިބުނު ކަމެއް އަދި މި މައްސަލައާ ގުޅިގެން މީހަކު ހައްޔަރުކުރި ކަމެއް ފުލުހުން އަދި ހާމައެއް ނުކުރެއެވެ.

ފުލުހުން ބުނީ މި މައްސަލައާ ގުޅިގެން ބަލަންޖެހޭ ކަންކަން އިތުރަށް ބަލައި، ތަހުގީގު ކުރަމުން އަންނަ ކަމަށެވެ.