ގޯލްޑް ކަޕް: އިންމިގެ ހެޓްރިކަކުން މީދޫއިން އައްޑޫއާ އެއްވަރުކޮށްފި

ނައިންޓީ ޕްލަސް ގޯލްޑް ކަޕްގެ ދެވަނަ ބުރުގައި ގްރޫޕް-ޖީގައި ހިމެނޭ އައްޑޫ ސިޓީ އާއި ދ. މީދޫ ބައްދަލުކުރި މެޗު 3-3 އިން އެއްވަރުވެއްޖެއެވެ. މި މެޗުގައި މީދޫގެ ހުރިހާ ގޯލެއް ކާމިޔާބުކޮށްދިނީ ގައުމީ 19 އަހަރުން ދަށުގެ ޓީމުގެ ކުރީގެ ފޯވާޑް އިބްރާހިމް އިމްރާން (އިންމި)އެވެ.

އިމްރާން މި މުބާރާތުގައި މިހާތަނަށް 8 ގޯލު ޖަހާފައިވާއިރު، އޭނާ ވަނީ މީދޫއިން ފުވައްމުލަކު ސިޓީއާއި ކުޅުން މެޗު ނޫން ހުރިހާ މެޗެއްގައި ގޯލު ޖަހާފައެވެ. އެގޮތުން ފަރެސްމާތޮޑާ ކޮޅަށް ދެ ގޯލު ޖެހިއިރު، ދިއްދޫ މެޗުގައި މީދޫއިން ކާމިޔާބުކުރި ދެ ގޯލަކީ ވެސް އޭނާގެ ދެ ގޯލެވެ. އޭގެ ފަހުން ގްރޫޕް ފޭސް-1ގެ ފަހު މެޗުގައި ކުޑަހުވަދޫ ކޮޅަށް ވެސް ގޯލެއް ކާމިޔާބުކޮށްފައި ވެއެވެ.

މި މުބާރާތުގައި މިއަދަދަށް ދެން ގޯލު ޖަހާފައިވަނީ ފުވައްމުލަކު ސިޓީ ޓީމަށް ކުޅޭ ގާނާގެ ފޯވާޑް، ކޯފީ އޮވޫސޫއެވެ. 

މި މެޗުގައި ފުރަތަމަ ލީޑު ނަގާފައިވަނީ އައްޑޫ އިންނެވެ. އެ ޓީމަށް ލީޑު ނަގައިދިނީ، އީގަލްސްއިން ރިލީޒް ހޯދައިގެން މުބާރާތުގައި އަލަށް ކުޅުނު ދިވެހި ގައުމީ ޓީމުގެ ފޯވާޑު އިބްރާހިމް މަހުދީ ހުސެއިން (ފޭދޫ އިއްބެ)އެވެ. 

ގޯލްޑް ކަޕަކީ ފައިދާހުރި މުބާރާތެއް ނޫންކަމަށް ބުނެ، އީގަލްސް އިން ފުރަތަމަ ވަނީ އެ ކްލަބުގެ ކޮންޓްރެކްޓުގައި ތިބި ކުޅުންތެރިންނަށް މި މުބާރާތުގައި ކުޅުމުގެ ހުއްދަ ނުދީފައެވެ. ނަމަވެސް 100،000ރ. (އެއްލައްކަ ރުފިޔާ)ގެ ރިލީޒް ފީ އަކާއެކު ފޭދޫ އިއްބެއަށް ރިލީޒް ދިނުމަށް އީގަލްސް އިން ފަހުން ނިންމުމާ ގުޅިގެން އޭނާ ވަނީ އައްޑޫ ޓީމާ ގުޅިފައެވެ. 

އައްޑޫއިން އެ ޓީމުގެ ލީޑު ފުޅާކުރީ ދެވަނަ ހާފުގައި އިސްމާއިލް އީސާ (މެސީ) ކާމިޔާބުކޮށްދިން ގޯލަކުންނެވެ. 

މީދޫގެ ފުރަތަމަ ގޯލު އިމްރާން ކާމިޔާބުކުރީ އެ ޓީމަށް ލިބުނު ޕެނަލްޓީއަކުންނެވެ. އަދި އޭގެ ދެ މިނެޓު ފަހުން އޭނާ ވަނީ މެޗުގެ ނަތީޖާ ހަމަހަމަކޮށްދީފައެވެ. އައްޑޫ ހާފުގެ މެދެއްހާ ހިސާބުން އިމްރާން ފޮނުވާލި ބޯޅަ ގޮސް ގޯލުގެ ތެރެއަށް ވަނީ ގޮލުކީޕަރު ބޯމަތިން އޮއްސިގެންނެވެ.

އޭގެ ފަހުން އައްޑޫއިން އަނެއްކާ ވެސް ލީޑު ނެގިއެވެ. މި ގޯލު އެ ޓީމަށް ކާމިޔާބުކޮށްދިނީ ފުރަތަމަ ޑިވިޝަނުގައި މާޒިޔާ ސްޕޯޓްސް އެންޑް ރެކްރިއޭޝަނާއި، ޓީސީ އަށް ވެސް ކުޅެފައިވާ އަލީ ނާފިއު (ކަޅޭ)އެވެ. 

މީދޫއިން މެޗުގެ ނަތީޖާ ހަމަހަމަ ކުރީ އިތުރު ވަގުތުގައެވެ. އިމްރާންގެ މި ގޯލަކީ ވެސް މީދޫއަށް ލިބުނު ޕެނަލްޓީއަކުން އޭނާ ކާމިޔާބުކުރި ގޯލެކެވެ. 

މި ގްރޫޕްގެ މެޗެއް ދެން އޮންނާނީ ބުރާސްފަތި ދުވަހުއެވެ. އެ މެޗުގައި ބައްދަލު ކުރާނީ މީދޫ އާއި ނައިފަރެވެ.