ޚަބަރު
މަސްވެރިކަމުގެ ސިނާއަތު ކުރިއެރުވުމަށް ބޭނުންވާ ހުރިހާ ފައިސާއެއް ހަމަޖެހިއްޖެ

މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ފޮޓޯ:އެޑިޝަން
މަސްވެރިކަމުގެ ސިނާއަތު ކުރިއަރުވަން ސަރުކާރުން ރާވާފައިވާ މަޝްރޫޢުތަކަށް ބޭނުންވާ ހުރިހާ ފައިސާއެއް ހަމަޖެހިފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަފުޅު ދައްކަވަމުން ވަޒީރު ޝިޔާމް ވިދާޅުވީ، މަސްވެރިކަމުގެ ސިނާއަތު ކުރިއަރުވަން ސަރުކާރުން އެންމެ ބޮޑަށް އިސްކަންދެއްވައިގެން ކުރައްވާ އެއް މަސައްކަތަކީ މަސްވެރިން ކިރުވާ މަހަށް އަވަހަށް ފައިސާ ދިނުމާއި، މަސްވެރިންގެ ހުރި ކަންބޮޑުވުންތަކަށް ހައްލު ހޯދައިދިނުން ކަމަށެވެ.
މަސްވެރިންގެ ކަންބޮޑުވުންތައް ހައްލު ކުރެއްވުމަކީ ރައީސުލްޖުމްހޫރިއްޔާ އެންމެ އިސްކަމެއް ދެއްވާ އެއް މަސައްކަތް. އެގޮތުން މަސްވެރިކަމުގެ ސިނާއަތުގައި ސަރުކާރުން އެންމެ ބޮޑަށް އިސްކަންދެނީ މަސްވެރިން ކިރުވާ މަހަށް އަވަހަށް ފައިސާ ފޯރުކޮށްދިނުމާއި ފަސޭހައިން އައިސް ލިބޭނެ މަގު ތަނަވަސްކުރުން
ވަޒީރު ވިދާޅުވިއެވެ.
މީގެ އިތުރުން، މަހުގެ އެކި ބާވަތްތައް އެކްސްޕޯޓު ކުރާނެ އިތުރު މާކެޓްތައިތުރު މާކެޓްތައް ހޯދުމަކީވެސް ސަރުކާރުން އިސްކަންދެއްވާ މަސައްކަތެއްކަމަށް ވަޒީރު ފާހަގަކުރެއްވިއެވެ.
މަސްވެރިކަމުގެ ސްޓޯރޭޖް ކެޕޭސިޓީއާ ގުޅޭގޮތުން ވާހަކަދައްކަވަމުން ވަޒީރު ޝިޔާމް ވިދާޅުވީ، މިހާރު އެއްގަމުގައި ހުރި 4200 ޓަނުގެ ސްޓޯރޭޖް ކެޕޭސިޓީ އަކީ އެންމެ އެކަށީގެންވާ މިންވަރެއް ނޫންކަމަށެވެ. ނަމަވެސް، ކުރިއަށް އޮތް ދޮޅު އަހަރާއި ދެ އަހަރާ ދޭތެރޭގައި މި މަސައްކަތްތައް ނިންމައި، ކަނޑުމަތީގެ ބޯޓުތަކާއި އެއްގަމުގެ ސްޓޯރޭޖް އެއްކޮށްލައިގެން މިހާރު ހުރި 8000 ޓަނުގެ ސްޓޯރޭޖް 25000 ޓަނަށް އިތުރުވެގެންދާނެކަމަށް ވަޒީރު ވިދާޅުވިއެވެ.
މަސްވެރިކަމުގެ ސިނާއަތުގައި ހުރި މައްސަލަތައް ހައްލުކުރެއްވުމަށް ރައީސުލްޖުމްހޫރިއްޔާ ގެންގުޅުއްވާ ސިޔާސަތުތަކުގެ ދަށުން 5 ބިލިއަނެއްހާ ރުފިޔާ އިންވެސްޓް ކުރަންޖެހޭކަމަށް ވަޒީރު ފާހަގަކުރެއްވިއެވެ. އަދި މި ފައިސާ ހޯދުމަށް ޕްރައިވެޓް ޕާޓީތަކާއި، ބޭންކުތަކާއި އެހެނިހެން ފަރާތްތަކުގެ އެހީތެރިކަން ހޯދާނެކަމަށްވެސް ވިދާޅުވިއެވެ.
ރާއްޖޭގެ މަސްވެރި ސިނާއަތް ރަނގަޅުކުރުމަށް ރައީސުލްޖުމްހޫރިއްޔާގެ ސިޔާސަތު ތަންފީޒުކުރުމަށްޓަކައި އަޅުގަނޑުމެން ހޯދަންޖެހޭ ހުރިހާ ފައިސާއެއް ރައީސުލްޖުމްހޫރިއްޔާ އެހެރީ ހޯއްދަވާފައި. ދެން އޮތީ މިކަންކަން ތަންފީޒުކުރުން
ވަޒީރު ޝިޔާމް ވިދާޅުވިއެވެ.
މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އޭގެ ތެރޭގައި ގިނައިން މަސް ބާނާ ދުވަސްވަރު ދަތިކަމެއް ނެތި މަސްވެރިންނަށް އައިސް ލިބޭނެ މަގު ފަހިކުރުމަށް ދޯނިފަހަރުގައި ލޮނުފެނުން މަސް ފިނިކުރާ ނިޒާމް ނުވަތަ އާރުއެސްޑަބްލިއު ސިސްޓަމް ހަރުކުރުމަށް ލޯނު ދޫކުރުން ހިމެނެއެވެ.