ސަރުކާރު ވައްޓާލަން ނިކުތުމަށް މައުރޫފު ގޮވާލައިފި

ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ވަނީ ސަރުކާރު ވައްޓާލުމަށް ރައްޔިތުން މަގުމައްޗަށް ނިކުތުމަށް ގޮވާލައްވާފައެވެ. މި ގޮވާލެއްވުން އައިސްފައިވަނީ އެމްޑީޕީން ރޭ ކާނިވާ ސަރަހައްދުގައި ބޭއްވި ޖަލްސާގައެވެ.

މައުރޫފު ވިދާޅުވި ގޮތުގައި ރައީސް މުޙައްމަދު މުއިއްޒު އަކީ ދޮގުވެރިޔެއް ކަމަށް ރައްޔިތުން ނިންމައިފިނަމަ، އެ ވެރިއަކު ވެރިކަމުން ދުރުކުރަންޖެހެއެވެ. އޭނާ ވިދާޅުވީ ރައީސް މުއިއްޒު ވަނީ ރާއްޖޭގައި އިންޑިއާގެ 2،000 ސިފައިން ތިބި ކަމަށް ވިދާޅުވެ އަދި ރާއްޖޭގެ ދެކުނުން ގެއްލުނު ކަމަށް ބުނާ ކަނޑުގެ ސަރަހައްދު ވެރިކަމުގެ ފުރަތަމަ 100 ދުވަހުގެ ތެރޭގައި ހޯއްދަވާނެ ކަމަށް ވިދާޅުވެ ރައްޔިތުންނަށް އޮޅުވާލާފައި ކަމަށެވެ.

މީގެ އިތުރުން، މައުރޫފު ވަނީ ގޯތިތައް ހަވާލުކުރާނެ ކަމަށް ވިދާޅުވެ ރައީސް މުއިއްޒު އޮޅުވާލެއްވި ކަމަށްވެސް ފާހަގަކުރައްވާފައެވެ. އޭނާ ވިދާޅުވީ ގައުމުތަކުގައި އިންތިހާބުތަކުގައި ވެރިކަން ބަދަލުކުރުމަކީ އޮންނަ ނިޒާމެއް ކަމަށާއި ނަމަވެސް ދައުރު ހަމަނުވަނީސް ވެރިކަން ބަދަލުކުރުމަކީވެސް އޮންނަ ގޮތެއް ކަމަށެވެ.

"މިރާއްޖޭގައިވެސް ދައުރު ހަމަވާކަށް ނުޖެހޭ. ގާނޫނުއަސާސީ ފުނޑާލީމާ ރައްޔިތުން ނުކުމެ ވެރިކަން ވައްޓާލަން ޖެހޭ. ބަދަލުކުރަން ޖެހޭ. ނުކުންނަންވީ،" މައުރޫފު ވިދާޅުވިއެވެ.

މި ޖަލްސާގައި މައުރޫފު ވަނީ ދިގު ދެމިގެންވާ މުޒާހަރާއެއް އޮންނާނެ ކަމަށް ވިދާޅުވެ، އެކަމަށް ތައްޔާރުވުމަށްވެސް ރައްޔިތުންނަށް ގޮވާލައްވާފައެވެ.