މީރާއަށް ނޮވެމްބަރު މަހު 1.89 ބިލިއަން ރުފިޔާ ލިބިއްޖެ

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހާމަކުރި ގޮތުގައި 2023 ވަނަ އަހަރުގެ ނޮވެމްބަރު މަހު އެ އިދާރާއަށް 1.89 ބިލިއަން ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 13.2 އިންސައްތަ އިތުރު އަދަދެކެވެ. އަދި މިދިޔަ އަހަރުގެ ނޮވެމްބަރު މަހު ލިބޭނެކަމަށް އަންދާޒާކޮށްފައިވާ އަދަދަށްވުރެ 19.7 އިންސައްތަ އިތުރު އަދަދެކެވެ.

މީރާއިން މަޢުލޫމާތު ދިންގޮތުގައި، މިއަހަރުގެ ނޮވެމްބަރު މަހު އާމްދަނީ އިތުރުވެފައިވަނީ މައިގަނޑު ގޮތެއްގައި ބިން ހޯދުމާއި ބަދަލުކުރުމުގެ ފީ އަދި ލީސް ޕީރިއަޑް އެކްސްޓެންޝަން ފީގެ ގޮތުގައި އާމްދަނީ ލިބިފައިވާތީއެވެ. މީގެ އިތުރުން އެއަރޕޯޓް ޓެކުހާއި ފީ އަދި ޖީއެސްޓީގެ ގޮތުގައި ލިބިފައިވާ އާމްދަނީވެސް ވަނީ އިތުރުވެފައެވެ.

ފަތުރުވެރިކަމުގެ ދާއިރާއަށް އައިސްފައިވާ ކުރިއެރުމަކީވެސް އާމްދަނީ އިތުރުވުމަށް މަގުފަހިކޮށްދިން ކަމެކެވެ. އޮކްޓޫބަރު 2022 އާ އަޅާބަލާއިރު އޮކްޓޫބަރު 2023 ގައި ދިވެހިރާއްޖެއަށް ޒިޔާރަތްކުރި ފަތުރުވެރިންގެ އަދަދު 8.5 އިންސައްތަ އިތުރުވެފައިވާކަމަށް މީރާއިން ފާހަގަކުރިއެވެ.

ނޮވެމްބަރު 2023 ގައި މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީ.އެސް.ޓީއެވެ. އެއީ 57.9 އިންސައްތަ ނުވަތަ 1.09 ބިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ ބިން ހޯދުމާއި ބަދަލުކުރުމުގެ ފީ އިންނެވެ. އެއީ 171.62 މިލިއަން ރުފިޔާއެވެ.

މީގެ އިތުރުން، އެއަރޕޯޓު ޑިވެލޮޕްމަންޓް ފީ، އާމްދަނީން ނަގާ ޓެކްސް، ޑިޕާޗަރ ޓެކްސް އަދި ގްރީން ޓެކްސްގެ ގޮތުގައިވެސް ގާތްގަނޑަކަށް 90 މިލިއަން ރުފިޔާ ވަނީ ލިބިފައެވެ.

މީރާއިން އިތުރަށް ހާމަކުރި ގޮތުގައި، ނޮވެމްބަރު 2023 ގައި ބަލައިގަނެފައިވާ އާމްދަނީގެ ތެރޭގައި 88.17 މިލިއަން އެމެރިކާ ޑޮލަރު ހިމެނެއެވެ.