ދަރިވަރުންގެ ކުރިމަގު ބައްޓަންކުރުމުގައި ދިރިއުޅުމުގެ އަމަލީ ހުނަރުތަކުގެ ދައުރު ބޮޑު

ފޮތްތަކުން ލިބޭ ތައުލީމީ އިލްމަށްވުރެ ބޮޑަށް، ދިރިއުޅުމުގެ އަމަލީ ހުނަރުތައް ނުވަތަ "ލައިފް ސްކިލްސް" ދަރިވަރުންނަށް އުނގަންނައިދިނުމަކީ އެކުދިންގެ މުސްތަގުބަލު ބައްޓަންކުރުމަށްޓަކައި ކޮންމެހެން ކުރަންޖެހޭ ކަމެއް ކަމަށް ތައުލީމީ ދާއިރާގެ މާހިރުން ވިދާޅުވެއެވެ.

ތައުލީމަކީ އިމްތިހާނުތަކުން ރަނގަޅު ނަތީޖާއެއް ހޯދުމަށް މަގުފަހިކޮށްދޭ އެއްޗެކެވެ. ނަމަވެސް، ދިރިއުޅުމުގެ އަމަލީ މައިދާނުގައި އަމިއްލަ ފައިމައްޗަށް ތެދުވުމަށާއި، ކާމިޔާބު ކެރިއަރެއް ބިނާކުރުމަށް އެންމެ މުހިންމީ ދިރިއުޅުމުގެ ހުނަރުތަކެވެ. މި ހުނަރުތައް އަށަގަތުމުން ކުދިންގެ ކިބައިގައި އަމިއްލަ ނަފްސަށް އޮންނަ އިތުބާރު ބޮޑުވެ، ވަގުތުގެ ބޭނުން ހެޔޮގޮތުގައި ހިފުމަށާއި، ބޮޑެތި މީހުންގެ އެހީތެރިކަމަކާ ނުލައި މުހިންމު ނިންމުންތައް އަމިއްލައަށް ނިންމުމުގެ ގާބިލުކަން ލިބިގެންދެއެވެ. މީގެއިތުރުން، އަމިއްލަ އިހުސާސްތައް ކޮންޓްރޯލްކޮށް ސްޓްރެސް މެނޭޖްކުރަން ދަސްވުމުގެ ސަބަބުން ނަފްސާނީ ދުޅަހެޔޮކަން އިތުރުވެ، މައްސަލަތައް ހައްލުކުރުމުގެ ވިސްނުމާއި މުވާސަލާތީ ހުނަރުތައް ކުރިއަރައިގެންދާކަމަށް މާހިރުން ފާހަގަކުރައްވައެވެ.

ހާއްސަކޮށް އުމުރުން 10 އަހަރާއި 18 އަހަރާ ދެމެދުގެ ކުދިންނަށް މިފަދަ ހުނަރުތައް އުނގަންނައިދިނުމަކީ ނުހަނު ބޭނުންތެރި ކަމެކެވެ. މިއީ ކުޑަކުއްޖެއްގެ ދިރިއުޅުމުން ޒިންމާދާރު ބޮޑު މީހަކަށް ބަދަލުވާ މުހިންމު އުމުރުފުރާ ކަމަށްވާތީ، ފައިސާ މެނޭޖްކުރުމާއި ބަޖެޓްކުރުން، ވަގުތު ރޭވުން، ޑިޖިޓަލް ދުނިޔޭގައި ރައްކާތެރިކަމާއެކު އުޅުން އަދި ގޭތެރޭގެ އަސާސީ މަސައްކަތްތައް ދަސްކޮށްދިނުމަކީ ނުހަނު މުހިންމު ކަންކަމެވެ.

މީގެއިތުރުން، ކްލާސްރޫމްތަކުގައި އެކި ކަހަލަ ޒިންމާތައް ހަވާލުކުރުމާއި، ގްރޫޕް މަސައްކަތްތަކުގެ އިތުރުން 'ރޯލް-ޕްލޭ' ފަދަ ހަރަކާތްތައް ހިންގުމާއި، ސްކޫލްތަކުގައި 'ލައިފް ސްކިލްސް ކޯނަރ' ތައް ގާއިމުކޮށްގެން އަމަލީ ތަޖުރިބާ ހޯދައިދިނުމަކީ ދަރިވަރުން މުޖުތަމަައަށް ބޭނުންތެރި، ހަރުދަނާ ފަރުދުންގެ ގޮތުގައި ބޮޑެތިވުމަށް އަޅައިދެވޭ މުހިންމު ބިންގަލެކެވެ.

ދިރިއުޅުމުގެ ހުނަރުތައް ނުވަތަ "ލައިފް ސްކިލްސް" އަކީ ކޮބާ؟
ދިރިއުޅުމުގެ ހުނަރުތަކަކީ ދުވަހުން ދުވަހަށް ދިމާވާ އެކިއެކި ގޮންޖެހުންތަކާއި، ކަންކަމާ ކާމިޔާބުކަމާއެކު ކުރިމަތިލުމަށްޓަކައި އަދި އުފާވެރި، ހަމަޖެހޭ ދިރިއުޅުމެއް ބިނާކުރުމަށްޓަކައި ކޮންމެ މީހަކަށްމެ ބޭނުންވާ މުހިންމު ގާބިލުކަންކަމެވެ.
މި ހުނަރުތަކުގެ ސަބަބުން އަމިއްލަ ނަފްސަށާއި، މުޖުތަމައަށާއި، އަދި ވަޒީފާގެ މާހައުލުގައިވެސް ރަނގަޅު ނިންމުންތައް ނިންމުމަށް އެހީތެރިވެދެއެވެ.

ލައިފް ސްކިލްސް ބެހިގެންވާ މައިގަނޑު 3 ބައި:
1. ވިސްނުމާ ގުޅުންހުރި ހުނަރުތައް 
 * މައްސަލަ ހައްލުކުރުން: ދިމާވާ ދަތި އުނދަގޫ ހާލަތްތަކުން އަރައިގަންނާނެ އެންމެ އެކަށީގެންވާ ގޮތް ހޯދުން.
 * ނިންމުންތައް ނިންމުން: ކަމެއްގެ ފައިދާއާއި ގެއްލުމަށް ފުންކޮށް ބަލައި، ހިކުމަތްތެރި ނިންމުންތައް ނިންމުން.
 * ފުންކޮށް ވިސްނުން: ލިބޭ މައުލޫމާތު ދިރާސާކޮށް، ހަގީގަތް ދެނެގަތުން.

2. މުއާމަލާތުކުރުމާއި އިޖުތިމާއީ ހުނަރުތައް
 * މުއާމަލާތް ކުރުމުގެ ހުނަރު: ތިމާ ބުނަން ބޭނުންވާ މެސެޖު އަނެކާއަށް ސާފުކޮށް ފޯރުކޮށްދިނުމާއި، އަނެކުން ދައްކާ ވާހަކަ ސަމާލުކަމާއެކު އަޑުއެހުން.
 * އިހުތިރާމާއެކު ގުޅުން ބަދަހިކުރުން: އެހެން މީހުންނާ ގުޅިގެން މަސައްކަތްކުރުމާއި، އަނެކުންގެ އިހުސާސްތައް ދެނެގަނެ އެކަކު އަނެކަކަށް އަޅާލުން.

3. އަމިއްލަ ނަފްސު ކޮންޓްރޯލްކުރުމުގެ ހުނަރުތައް
 * ރުޅިއާއި ސްޓްރެސް ކޮންޓްރޯލްކުރުން: ހިތްނުތަނަވަސްވާ ހާލަތްތަކުގައި ކެތްތެރިކަން އިސްކޮށް، ޖަޒުބާތުތައް ކޮންޓްރޯލްކުރުން.
 * އަމިއްލަ ނަފްސު ދެނެގަތުން: ތިމާގެ ކިބައިގައި ހުރި ވަރުގަދަ ސިފަތަކާއި، ބަލިފަޔާއި، އަދި އަޚްލާޤީ މިންގަނޑުތައް ރަނގަޅަށް ދެނެގަތުން.

އިސްލާމީ ނަޒަރިއްޔާތުން ދިރިއުޅުމުގެ ހުނަރުތައް
ދިރިއުޅުމުގެ ހުނަރުތަކަކީ އިސްލާމްދީން ވަރަށް ބޮޑަށް ބާރުއަޅާ އަދި ރިވެތި އަޚްލާޤުގެ ތެރޭގައި ހިމެނޭ މުހިންމު ސިފަތަކެކެވެ. ކެތްތެރިކަން، ތެދުވެރިކަން، ޝުކުރުވެރިވުން، އަދި މީހުންނަށް މައާފުކުރުން ފަދަ މަތިވެރި ސިފަތަކަކީ ލައިފް ސްކިލްސްގެ އެންމެ މަތީ ދަރަޖައިގެ ހުނަރުތަކުގެ ތެރޭގައި ހިމެނޭ ކަންކަމެވެ. ދިރިއުޅުމުގެ ޒަރޫރީ ބޭނުންތައް ފުއްދުމައްޓަކައި އެނގެން ޖެހޭ ހުނަރުތައް ދަސްކުރުމަކީ މުހިއްމު ކަމެކެވެ.