އިސްރޭލުން ސީރިއާގެ ލަޒަޤިއްޔާ ބަނދަރަށް ހަމަލާދީފި

ސީރިއާގެ ވެރިކަން ބަދަލުވުމާ ގުޅިގެން، އިސްރާއީލުން އެ ޤައުމުގެ ބަނދަރަކަށް ހަމަލާދީފައިވާ ކަމަށް އިސްރާއީލުގެ ދިފާއީ ބާރުތަކުން (އައިޑީއެފް) ހާމަކޮށްފިއެވެ. މި ހަމަލާތަކަކީ ސީރިއާގެ އަސަދު ސަރުކާރު ވައްޓާލުމަށްފަހު، އެ ޤައުމުގެ އަސްކަރީ ވަސީލަތްތައް ނައްތާލުމަށް ކުރެވުނު މަސައްކަތްތަކުގެ ތެރެއިން ކަމެއް ކަމަށް އައިޑީއެފްއިން ބުނެފައިވެއެވެ.

އައިޑީއެފްއިން ނެރުނު ބަޔާނެއްގައި ބުނެފައިވަނީ ހޯމަ ދުވަހުގެ ރޭ އަލް-ބައިދާ އަދި ލަޒަޤިއްޔާ ބަނދަރުތަކަށް ހަމަލާދީފައިވާ ކަމަށެވެ. މި ދެ ބަނދަރުގައި 15 އުޅަނދު އޮތް ކަމަށް ބުނެފައިވެއެވެ. ލަޒަޤިއްޔާ ބަނދަރުގައި ހިނގި ގޮވުންތަކުގެ ވީޑިއޯތައް ބީބީސީއިން ޞައްޙަކަން ކަށަވަރުކޮށްފައިވާ ކަމަށާއި، މި ފޫޓޭޖްތަކުން އުޅަނދުތަކަށާއި ބަނދަރުގެ ބައެއް ސަރަޙައްދުތަކަށް ބޮޑެތި ގެއްލުންތަކެއް ލިބިފައިވާ ކަން ފެންނަން ހުރި ކަމަށް ބުނެފައިވެއެވެ.

މީގެ އިތުރުން، އައިޑީއެފްގެ ހަނގުރާމަވެރި މަތިންދާބޯޓުތަކުން ސީރިއާގެ އެކި ސަރަޙައްދުތަކަށް 350 އަށްވުރެ ގިނަ ވައިގެ ހަމަލާ ދީފައިވާ ކަމަށާއި، އަދި ސީރިއާއާއި އިސްރާއީލު ހިފާފައިވާ ގޯލަން އުސްބިމާ ދެމެދު އޮންނަ ބަފަރ ޒޯނަށް އެޤައުމުގެ އެއްގަމު ބާރުތައް ވައްދާފައިވާ ކަމަށްވެސް ބުނެފައިވެއެވެ.

އިސްރާއީލުގެ ދިފާއީ ވަޒީރު އިސްރާއީލް ކަޓްޒް ވިދާޅުވެފައިވަނީ އައިޑީއެފްގެ މަޤްޞަދަކީ "އިސްރާއީލް ދައުލަތަށް ނުރައްކާވެދާނެ އިސްތިރާޖީ ޤާބިލިއްޔަތުތައް ނައްތާލުން" ކަމަށެވެ. އަދި ސީރިއާގެ ކަނޑުގެ ބާރު ނައްތާލުމުގެ އޮޕަރޭޝަނަކީ "ވަރަށް ބޮޑު ކާމިޔާބީއެއް" ކަމަށްވެސް އޭނާ ވިދާޅުވިއެވެ.