މަސްވެރިކަމާއި ޤުދުރަތީ ވަސީލަތްތަކާ ގުޅޭ ދާއިރާތަކުން ކިޔެވުމަށް ސްކޮލަރޝިޕް ފުރުޞަތު ހުޅުވާލައިފި

މަސްވެރިކަމާއި ކަނޑުގެ ވަޞީލަތްތަކާބެހޭ ވުޒާރާއިން މަސްވެރިކަމާއި ޤުދުރަތީ ވަޞީލަތްތަކާ ގުޅުންހުރި ދާއިރާތަކުން ކިޔަވަން ބޭނުންވާ މީހުންނަށް ސްކޮލަރޝިޕަށް އެދި ހުށައެޅުމުގެ ފުރުޞަތު ހުޅުވާލައިފިއެވެ. މި ސްކޮލަރޝިޕްތަކަށް ކުރިމަތިލުމުގެ ފުރުޞަތު ހުޅުވާލާފައިވަނީ "ޓްރާންސްފޯރމިން ފިޝަރީޒް މެނޭޖްމެންޓް އިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓް"ގެ ދަށުންނެވެ. މިއީ ދިވެހި ސަރުކާރާއި ވޯލްޑް ބޭންކް ގުޅިގެން ހިންގާ ޕްރޮޖެކްޓެކެވެ.

މި ޕްރޮޖެކްޓްގެ ދަށުން ދެ ބާވަތެއްގެ ސްކޮލަރޝިޕްތަކަކަށް ކުރިމަތިލާން ހުޅުވާލާފައިވެއެވެ. އޭގެ ތެރެއިން އެއް ބާވަތުގެ ސްކޮލަރޝިޕްތަކުގައި މަތީ ތަޢުލީމް ޙާސިލްކުރުމަށްފަހު ކަނޑައެޅޭ ވަކި މުއްދަތެއް ވަންދެން މަސްވެރިކަމާބެހޭ ވުޒާރާގައި މަސައްކަތްކުރަންޖެހޭނެއެވެ. މި ބާވަތުގެ ތެރެއިން ކުރިމަތިލާން ހުޅުވާލާފައިވަނީ ފިޝަރީޒް ސައިންސް ނުވަތަ މެރިން ސައިންސްގެ ދާއިރާއާއި އެކުއަރކަލްޗަރގެ ދާއިރާއިން ބެޗްލަރސް ޑިގްރީ ޙާސިލްކުރުމަށެވެ.

ދެވަނަ ބާވަތުގެ ސްކޮލަރޝިޕަކަށް ހުޅުވާލާފައިވަނީ ވަކި މުއްދަތެއް ވަންދެން ވުޒާރާގައި މަސައްކަތްކުރަން ނުޖެހޭ ގޮތަށެވެ. މި ބާވަތުގެ ސްކޮލަރޝިޕްގައި ހިމެނެނީ ޕްލާންޓް ޕްރޮޓެކްޝަން، އެގްރިކަލްޗަރަލް ސައިންސް، ވެޓެރިނަރީ، އަދި ނެޗުރަލް ރިސޯސް މެނޭޖްމަންޓް ފަދަ ދާއިރާތަކެވެ.

މަސްވެރިކަމާބެހޭ ވުޒާރާއިން ވިދާޅުވީ ކޯސްތަކަށް ކުރިމަތިލާން ބޭނުންވާނަމަ، އަންނަ އަހަރުގެ ޖެނުއަރީ މަހުގެ 9 ވަނަ ދުވަހުގެ ކުރިން ވުޒާރާއަށް ހުށައަޅަންޖެހޭނެ ކަމަށެވެ. އެޕްލިކޭޝަން ހުށައަަޅަންޖެހޭނީ ވުޒާރާގެ ޕްރޮޖެކްޓް މެނޭޖްމެންޓް ޔުނިޓަށެވެ. އިތުރު މަޢުލޫމާތު ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ ކަމަށް ވުޒާރާއިން މަޢުލޫމާތު ދެއްވިއެވެ.