ދުނިޔެ / ވިޔަފާރި
ދުނިޔޭގެ ބާޒާރުގައި ކޮފީގެ އަގު ރެކޯޑު އަގަކަށް އަރައިފި

ކޮފޯގެ އެކި ބާވަތުގެ ކޮފީ ތަށިހިފައިގެން ފޮޓޯ: އިންޓަނެޓް
ދުނިޔޭގެ ބާޒާރުގައި ކޮފީގެ އަގު ރެކޯޑު އަގަކަށް އަރައި، ކޮފީ ލޯބިވެރިންނަށް އޭގެ އަސަރު ކުރަން ފަށައިފިއެވެ. އެންމެ ގިނައިން ބޭނުންކުރާ އަރަބިކާ ކޮފީ ބީންސްގެ އަގު މިއަހަރު 80 އިންސައްތަ އިތުރުވެ، ޕައުންޑަކަށް 3.44 ޑޮލަރަށް އަރައިފައިވެއެވެ.
ބްރެޒިލް އަދި ވިއެޓްނާމް ފަދަ ބޮޑެތި ކޮފީ އުފައްދާ ޤައުމުތަކުގައި މޫސުން ގޯސްވުމާ ގުޅިގެން ކޮފީ އުފެއްދުން ދަށްވެފައިވާ ކަމަށް ވިޔަފާރިވެރިން ބުނެއެވެ. މީގެ އިތުރުން ކޮފީގެ މަޤްބޫލުކަން އިތުރުވަމުން ދިއުމަކީވެސް އަގު އުފުލުމުގެ ސަބަބެކެވެ.
ޓުއަން ލޮކް ކޮމޮޑިޓީޒްގެ ސީއީއޯ ވިން ގުއެން ބީބީސީއަށް ބުނެފައިވަނީ ކޮފީ ބްރޭންޑްތަކުން އަންނަ އަހަރުގެ ފުރަތަމަ ކުއާޓަރގައި އަގުތައް ބޮޑުކުރުމަށް ވިސްނަމުންދާ ކަމަށެވެ. އޭނާ ބުނީ މިހާތަނަށް ބޮޑެތި ކޮފީ ކުންފުނިތަކުން އަގު ބޮޑުވުމުގެ އަސަރު އަމިއްލައަށް އުފުލާފައިވީ ނަމަވެސް، މިހާރު އެކަން ބަދަލުވާން ޖެހިފައިވާ ކަމަށެވެ.
އިޓަލީގެ ބޮޑު ކޮފީ ކުންފުންޏެއް ކަމަށްވާ ލަވާޒާއިން ބުނެފައިވަނީ ކަސްޓަމަރުންނަށް އަގު ބޮޑުވުމުގެ އަސަރު ނުކުރުވުމަށް ވަރަށް ބޮޑު މަސައްކަތްތަކެއް ކޮށްފައިވީ ނަމަވެސް، މިހާރު އަގުތައް ބަދަލުކުރަން މަޖުބޫރުވެފައިވާ ކަމަށެވެ. ނެސްލޭގެ އިސް ވެރިއެއް ކަމަށްވާ ޑޭވިޑް ރެނީ ބުނެފައިވަނީ ކޮފީ ޞިނާޢަތަށް ދަތި ދުވަސްތަކެއް ކުރިމަތިވެފައިވާ ކަމަށާއި، އެ ކުންފުނިންވެސް އަގުތަކާއި ޕެކް ސައިޒްތައް ބަދަލުކުރަން ޖެހޭނެ ކަމަށެވެ.
ކޮފީގެ އަގު މިހާ ބޮޑަށް އުފުލިފައިވަނީ 1977 ވަނަ އަހަރުން ފެށިގެން ފުރަތަމަ ފަހަރަށެވެ. އެސް އެންޑް ޕީ ގްލޯބަލް ކޮމޮޑިޓީ އިންސައިޓްސްގެ ކޮފީ ޕްރައިސިންގ އެނަލިސްޓް ފަރނާންޑާ އޮކާޑާ ބުނެފައިވަނީ ކޮފީގެ އަގު އުފުލުމުގެ ޓްރެންޑް އަދިވެސް ކުރިއަށްދާނެ ކަމަށް ލަފާކުރެވޭ ކަމަށެވެ.