އިސްރަށްވެހިންގެ ނާދީގެ މެންބަރުން ރައްޔިތުންގެ މަޖިލީހަށް ޒިޔާރަތްކޮށްފި

އިސްރަށްވެހިންގެ ނާދީގެ މެންބަރުން މިއަދު ރައްޔިތުންގެ މަޖިލީހަށް ޒިޔާރަތްކޮށް މަޖިލިސް ބައްލަވާލައިފިއެވެ. މި ދަތުރަކީ އިސްރަށްވެހިންގެ ނާދީއިން އިސްރަށްވެހިންނަށް އަމާޒުކޮށްގެން ކުރިއަށް ގެންދާ ޙަރަކާތްތަކުގެ ތެރެއިން އެއް ޙަރަކާތެވެ.

އިސްރަށްވެހިންގެ ނާދީއިން މަޢުލޫމާތު ދެއްވިގޮތުގައި، އެތަނުން ދަނީ އިސްރަށްވެހިންގެ ނަފްސާނީ އަދި އިޖުތިމާޢީ ދުޅަހެޔޮކަން އިތުރުކުރުމަށް އަމާޒުކޮށް ތަފާތު ޙަރަކާތްތަކެއް ރާވައި އިންތިޒާމްކުރަމުންނެވެ. މި ޕްރޮގްރާމުތަކުގައި ބައިވެރިވުމަށް ޝައުޤުވެރިވާ ފަރާތްތަކަށް އިސްރަށްވެހިންގެ ނާދީގެ ނަންބަރު 3027586 އަށް ގުޅުއްވައިގެން ނުވަތަ ޕްރޮގްރާމު އޮންނަ ގަޑިއަށް އިސްރަށްވެހިންގެ ނާދީއަށް ޒިޔާރަތްކޮށްލައިގެން ނަންނޯޓު ކުރެވޭނެއެވެ.

އިސްރަށްވެހިންގެ ނާދީގެ އިސްވެރިއެއް ވިދާޅުވިގޮތުގައި، "މިފަދަ ކޮންމެ ޕްރޮގްރާމެއްގައި ވެސް ގިނަ އަދަދެއްގެ އިސްރަށްވެހިން ބައިވެރިވުމަކީ އަޅުގަނޑުމެންގެ އެދުމެކެވެ. މި ޙަރަކާތްތަކުގައި ބައިވެރިވުމުގެ ފުރުޞަތު 55 އަހަރުން މަތީގެ ކޮންމެ ބޭފުޅަކަށްވެސް އޮންނާނެއެވެ."

މި ޒިޔާރަތުގައި އިސްރަށްވެހިންނަށް ރައްޔިތުންގެ މަޖިލީހުގެ މަސައްކަތްތަކާ ބެހޭގޮތުން މަޢުލޫމާތު ދެވުނެވެ. އަދި މަޖިލީހުގެ ޖަލްސާކުރާ މާލަމާއި އެހެނިހެން ތަންތަން ބައްލަވާލެއްވިއެވެ. މި ދަތުރުގެ ސަބަބުން އިސްރަށްވެހިންނަށް ޤައުމުގެ ޤާނޫނު ހެދުމުގެ މަސައްކަތާ ގުޅޭގޮތުން އިތުރު މަޢުލޫމާތު ލިބިވަޑައިގަތެވެ.