އެޗްޑީސީން ފިޔަވައްޗަށް ހަދިޔާކުރި "ގޭމް ރޫމް" ރަސްމީކޮށް ހަވާލުކޮށްފި

ފިޔަވަތީގެ އަހަރީ ހަފްލާގެ ތެރެއިން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފިޔަވައްޗަށް ހަދިޔާކުރި "ގޭމް ރޫމް" ވަނީ ރަސްމީކޮށް ހަވާލުކޮށްފައެވެ. މި "ގޭމް ރޫމް" އަކީ ދައުލަތުގެ ބެލުމުގެ ދަށުގައި ފިޔަވަތީގައި ތިބޭ ކުދިންނަށް އެތަން އުފާވެރި އަދި ހިތްފަސޭހަ ތަނަކަށް ހެދުމުގެ މަޤްޞަދުގައި ތައްޔާރުކޮށްފައިވާ ތަނެކެވެ.

އެޗްޑީސީގެ ފަރާތުން މި "ގޭމް ރޫމް" ވަނީ ވަރަށް ފުރިހަމައަށް ތައްޔާރުކޮށްފައެވެ. މިތަނުގައި ފިޔަވަތީގައި ތިބޭ ކުދިންނަށް ތަފާތު ކުޅިވަރުތައް ކުޅެވޭނެ ގޮތަށް ވަނީ މަގުފަހިކޮށްދީފައެވެ. މިކަމަކީ އެ ކުދިންގެ ހިތްތަކަށް އުފާވެރިކަމާއި ހިތްހަމަޖެހުން ގެނެސްދޭނެ ކަމެއް ކަމުގައި ބެލެވެއެވެ.

ފިޔަވަތީގެ ކުދިންނަށްޓަކައި މިފަދަ ފުރިހަމަ "ގޭމް ރޫމް" އެއް ތައްޔާރުކޮށްދިނުމުގައި އެޗްޑީސީގެ މުވައްޒަފުންނާއި މެނޭޖްމަންޓުން ވަނީ ދީލަތި އެހީތެރިކަމެއް ފޯރުކޮށްދީފައެވެ. މިކަން ފާހަގަކޮށް، އިޖުތިމާޢީ އަދި އާޢިލީ ތަރައްޤީއާ ބެހޭ ވުޒާރާއިން ވަނީ   އެޗްޑީސީގެ ޓީމަށް ޚާއްޞަ ޝުކުރެއް އަދާކޮށްފައެވެ.