މެދުއިރުމަތީގެ މަސްރަހު ގޯސްވެ، ތެޔޮ ފީފާއެއްގެ އަގު ވަރަށް ބޮޑަށް އުފުލިއްޖެ

މެދުއިރުމަތީގެ މަސްރަޙުގައި އުފެދިފައިވާ ސިޔާސީ އަދި ސަލާމަތީ ނުތަނަވަސްކަމުގެ ސަބަބުން ދުނިޔޭގެ ބާޒާރުގައި ތެލުގެ އަގު އަންގާރަ ދުވަހު އުފުލި، ފާއިތުވި ފަސް މަސްދުވަހުގެ ތެރޭގައި ތެޔޮ ފީފާއެއްގެ އަގު އެންމެ މައްޗަށް ދިޔަ މިންވަރާ ގާތަށް އަރައިފިއެވެ.

މި ބަދަލު އައިސްފައި ވަނީ ޔަމަނުގެ ޙޫޘީން ސަޢޫދީ ޢަރަބިއްޔާގެ އިމާރާތްތަކަށް އަމާޒުކޮށް ޙަމަލާތަކެއް ދިނުމާއި، ގަލްފުގެ ކަނޑުގެ ސަރަޙައްދުން ދަތުރުކުރި އުޅަނދުތަކަކަށް ޙަމަލާދީފައިވާ ކަމުގެ ރިޕޯޓުތައް ފެންމަތިވުމާ ގުޅިގެން، ތެޔޮ ވިއްކާ ފަރާތްތަކުން އެ ސަރަޙައްދުގެ ނުރައްކާތަކަށް ރިޢާޔަތްކުރަން ފެށުމުންނެވެ.

ޖީއެމްޓީ ގަޑިން 06:28 އާ ހަމައަށް، ބްރެންޓް ކްރޫޑް ފިއުޗާސްގެ އަގު ވަނީ 0.47 އިންސައްތަ އުފުލި، ފީފާއެއްގެ އަގު 110.07 ޑޮލަރަށް އަރާފައެވެ. މިއީ ކުރީގެ ވިޔަފާރި ދަންފަޅީގައި ފީފާއެއްގެ އަގު 110.70 ޑޮލަރަށް އެރުމަށްފަހު ހިފެހެއްޓިފައިވާ މިންވަރެކެވެ. މިއީ މޭ 20 ގެ ފަހުން ބްރެންޓް ކްރޫޑްގެ އަގު މިހާ މައްޗަށް ދިޔަ ފުރަތަމަ ފަހަރެވެ.

މީގެއިތުރުން، އަންގާރަ ދުވަހު މުއްދަތު ހަމަވި އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ކްރޫޑްގެ ނޮވެމްބަރު މަހުގެ ކޮންޓްރެކްޓްތަކުގެ އަގު ވަނީ 0.36 އިންސައްތަ މައްޗަށް ގޮސް، ފީފާއެއް 104.03 ޑޮލަރަށް އަރާފައެވެ.