އިންޑިޔާގެ ނައިބު ރައީސް މަޤާމުން ވަކިކުރަން އިދިކޮޅު ޕާޓީތަކުން މަސައްކަތް ފަށައިފި

އިންޑިޔާގެ ނައިބު ރައީސް ޖަގްދީޕް ދަންކަރް މަޤާމުން ވަކިކުރުމުގެ މަސައްކަތް އިދިކޮޅު ޕާޓީތަކުން ފަށައިފިއެވެ. މިއީ އިންޑިޔާގެ ތާރީޚުގައި، ނައިބު ރައީސަކު މަޤާމުން ވަކި ކުރަން މަސައްކަތް ފެށި ފުރަތަމަ ފަހަރެވެ.

އިދިކޮޅު ފަރާތްތަކުން ތުހުމަތުކޮށްފައިވަނީ، އިންޑިޔާގެ ޤާނޫނު ހަދާ މަޖިލީހުގެ މަތިގޭގެ ރިޔާސަތުގައި އިންނަވައިގެން، ދަންކަރް ވަކި ފަރާތަކަށް ބުރަވެ، ޤާނޫނު ހެދުމަށް ހުރަސްއަޅާ ކަމަށެވެ. މި ތުހުމަތުތަކާ ގުޅިގެން ދަންކަރްގެ އޮފީހުން އެއްޗެއް ނުބުނި ނަމަވެސް، ޕާލަމެންޓްރީ އެފެއާޒް މިނިސްޓަރު ކިރެން ރިޖިޖޫ ވިދާޅުވީ ދަންކަރް އަކީ "އިންތިހާއަށް ޕްރޮފެޝަނަލް އަދި ވަކި ފަރާތަކަށް ނުޖެހި" މަސައްކަތް ކުރައްވާ ބޭފުޅެއް ކަމަށެވެ.

އިދިކޮޅު ކޮންގްރެސް ޕާޓީގެ ތަރުޖަމާނު ޖޭރާމް ރަމޭޝް ވިދާޅުވީ، ދަންކަރް އާ ދެކޮޅަށް އިތުބާރު ނެތް ކަމުގެ މައްސަލައެއް ހުށަހަޅަން މަޖުބޫރުވީ، ޤާނޫނު ހަދާ މަޖިލީހުގެ މަތިގެ ހިންގެވުމުގައި "ހުދުމުހުތާރު" ކަން އިންތިހާއަށް އިސްކުރަމުންދާތީ ކަމަށެވެ.

ނަމަވެސް، މިނިސްޓަރު ރިޖިޖޫ މި މައްސަލަ ސިފަކުރައްވާފައިވަނީ ޤާނޫނު ހަދާ މަޖިލީހުގެ މަތިގޭގެ ރިޔާސަތަށް ދިން "ޙަމަލާއެއް"ގެ ގޮތުގައެވެ. އޭނާ ވިދާޅުވީ މިފަދަ މައްސަލަތަކަކީ ޑިމޮކްރަސީއަށް ރަނގަޅު ކަމެއް ނޫން ކަމަށާއި، ނައިބު ރައީސަށާއި މަޖިލީހަށް އިޙްތިރާމް ކުރަންޖެހޭ ކަމަށެވެ.

ދަންކަރް މަޤާމުން ދުރުކުރަން އިދިކޮޅު ޕާޓީތަކަށް އެކަށީގެންވާ އަދަދަކަށް ވޯޓު ނެތުމުން މި ފިޔަވަޅަކީ ރަމްޒީ ފިޔަވަޅަކަށް ވިޔަސް، ދަންކަރް އަކީ ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) ގެ ކެންޑިޑޭޓަކަށްވާތީ، މިކަމުގެ ސަބަބުން އިދިކޮޅު ފަރާތްތަކާއި ބޮޑުވަޒީރު މޯދީގެ ސަރުކާރާ ދެމެދު އުފެދިފައިވާ ނުތަނަވަސްކަން އިތުރަށް ގޯސްވާނެ ކަމަށް ބެލެވެއެވެ.