“މަސްވެރިންގެ ގުންޒަރު” ފޯރަމް ފަށައިގެން ކުރިއަށްދަނީ

މަސްވެރިކަމާ ކަނޑުގެ ވަޞީލަތްތަކާ ބެހޭ ވުޒާރާއާއި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގުޅިގެން ކުރިއަށްގެންދާ “މަސްވެރިންގެ ގުންޒަރު” ފޯރަމް ފަށައިފިއެވެ. 

މަސްވެެރިންގެ ދުވަހާއި ގުޅިގެން ބާއްވާ މި ފޯރަމް ފަށްޓަވައިދެއްވައިފައިވަނީ މަސްވެރިކަމާ ބެހޭ ވަޒީރު އަޙްމަދު ޝިޔާމްއެވެ. މަސްވެރިކަމާ ބެހޭ ވުޒާރާއިން ބުނެފައިވަނީ މިއަހަރުގެ ގުންޒަރުގައި ރާއްޖޭގެ އެކި އަތޮޅުތަކުން މަސްވެރިންނާއި މަސްވެރިކަމާ ގުޅުން ހުރި އެކި ދާއިރާތަކުގައި ހަރަކާތްތެރިވާ ފަރާތްތައް ބައިވެރިވެވަޑައިގަންނަވާކަމަށެވެ. 

ހަމަމިއާއިއެކު މި އަހަރުގެ ގުންޒަރުގައި މަސްވެރިކަމުގެ ސިނާއަތުގައި ހުރި ގޮންޖެހުންތައް ޙައްލު ކުރުމަށާއި، މި ސިނާއަތް ކުރިއެރުވުމަށް ސަރުކާރުން ކުރަމުންގެންދާ އަދި ކުރިއަށް ރޭވިފައިވާ އެކި ކަންކަމާ ގުޅޭގޮތުން މަޝްވަރާކުރެވިގެންދާނެ ކަމަށްވެސް އެވުޒާރާއިން ބުނެފައިވެއެވެ. 

މަސްވެރިންގެ ގުންޒަރު ފެށުމުގެ ރަސްމިއްޔާތުގައި ވަޒީރު ޝިޔާމް ވާހަކަފުޅު ދައްކަވަނީ

މިއަދު ފޯރަމް ކުރިއަށްދިޔައިރު ފޯރަމްގެ ފުރަތަމަ ސެޝަންގައި މަސްވެރިންގެ ކަންބޮޑުވުންތަކާއި މަސްވެރިކަމުގެ ސިނާޢަތުގައި ހުރި ގޮންޖެހުންތައް ޙައްލުކުރުމަށް އެޅިދާނެ ފިޔަވަޅުތަކާމެދު މަޝްވަރާކުރެވިގެން ދިޔަ ކަމަށް އެވުޒާރާއިން ބުނެފައިވެއެވެ.

މީގެއިތުރުން މަސްވެރިންގެ އިތުރުން ގުންޒަރުގެ އެހެން ބައިވެރިންގެ ސުވާލުތަކަށް ޖަބާދު ދެއްވުމަށް ވަޒީރު އަހުމަދު ޝިޔާމް، މިފްކޯގެ ޗީފް ފައިނޭންޝަލް އޮފިސަރ އިލްޔާސް ހަނީފް، މޯލްޑިވްސް ފިޝަރީޒް އެންޑް އޯޝަން ރިސޯސަސް މަރކެޓިންގ އެންޑް ޕްރޮމޯޝަން ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ޒަރީރު، މޯލްޑިވްސް ސީފުޑް ޕްރޮސެސަރސް އެންޑް އެކްސްޕޯޓަރސް އެސޯސިއޭޝަންގެ ފަރާތުން އާސިފް އަބްދުﷲ އަދި ވުޒާރާގެ ޑައިރެކްޓަރ ޖެނެރަލް ޑރ. ހުސެއިން ސިނާން ޕެނަލްގައި ބައިވެރިވެ ވަޑައިގެންފައިވާ ކަމަށް ވެސް މަސްވެރިކަމާ ބެހޭ ވުޒާރާއިން ބުނެފައިވެއެވެ.