ކުރެންދޫ ބަލިކޮށް އަލިފުށިން ދެވަނަ ބުރު ވެސް ފެށީ ގަދަކޮށް

ނައިންޓީ ޕްލަސް ގޯލްޑް ކަޕްގެ ގްރޫޕް-އެޗްގައި އަންގާރަ ދުވަހުގެރޭ އަލިފުށިން ކުރެންދޫ ބަލިކޮށްފިއެވެ. ފޯރިގަދަ ކުޅުމެއް ފެނިގެން ދިޔަ މި މެޗު އަލިފުށި ކާމިޔާބުކުރީ 1-0 އިންނެވެ.

މިއީ ގްރޫޕް ފޭސް-1ގެ ފުރަތަމަ ދެ މެޗުން ފުރިހަމަ މޮޅުތަކެއް ހޯދުމަށްފަހު އެ ބުރުގެ ފަހު މެޗުގައި މޮޅު ނުވެވުނު އަލިފުއްޓަށް ލިބުނު މުހިންމު މޮޅެކެވެ. މި ބުރުގައި ކޮންމެ ޓީމެއް ވެސް ދެ މެޗު ކުޅެން ޖެހޭއިރު، ކުރެންދޫ ކޮޅަށް ހޯދުނު ކާމިޔާބާއެކު އަލިފުއްޓަށް ކުއާޓާ ފައިނަލުން ޖާގަ ހޯދުމަށް ދެން ކުރަންޖެހޭ މަސައްކަތް ކުޑަ ވާނެއެވެ. 

ގަލޮޅު ދަނޑުގައި ކުޅުނު މި މެޗުގެ ފުރަތަމަ ހާފުގައި އަލިފުށިން ވަނީ ގޯލު ޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް، ސްރީލަންކާގެ ގައުމީ ޓީމުގައި ވެސް ހިމެނޭ، ކުރެންދޫގެ ގޯލްކީޕަރ، ސޫޖަން ޕެރޭރާ ވަނީ އަލިފުށީގެ ހަމަލާތައް ދިފާއު ކުރުމުގައި މުހިންމު ދައުރެއް އަދާކޮށްފައެވެ.

އަލިފުއްޓަށް ކުރެންދޫގެ ގޯލު ފޫއަޅުވާ ލެވުނި ދެވަނަ ހާފުގެ 15 މިނެޓު ކުޅެވުނު ފަހުންނެވެ. އެ ޓީމަށް ލީޑު ނަގައިދިނީ މެޗުގެ 63 ވަނަ މިނެޓުގައި އަހްމަދު ހުޝާމްއެވެ. ހުސައިން ނިހާން (ނިހާޓް) ގޯލު ކުރުމައްޗަށް ހުރަސްކުރި ބޯޅައެއް ހޯދައި، ހުޝާން މި ބޯޅަ ގޯލަށް ފޮނުވާލީ، ކުރެންދޫގެ ދެ ޑިފެންޑަރުންނާއި ކީޕަރު ސޫޖަން ކައިރިން ވެސް ނައްޓާލުމަށްފަހުއެވެ.

މި ދެ ޓީމު ހިމެނޭ ގްރޫޕުގެ މެޗެއް ދެން އޮންނާނީ ބުރާސްފަތި ދުވަހުއެވެ. އެ ރޭގެ 9 ޖަހާއިރު ފެށުމަށް ހަމަޖެހިފައިވާ މި މެޗުގައި ބައްދަލު ކުރާނީ މާލޭ ސިޓީ އާއި ކުރެންދޫއެވެ.