ކުޅިވަރު

ގޯލްޑް ކަޕް: އޭދަފުށި ކީޕަރު އެއް އަހަރަށް ސަސްޕެންޑުކޮށްފި

ގޯލްޑް ކަޕް: އޭދަފުށި ކީޕަރު އެއް އަހަރަށް ސަސްޕެންޑުކޮށްފި

އޭދަފުށީގެ ކީޕަރު އަޖުފާނޫ މާފުށީގެ ކުޅުންތެރިޔާއަށް ޓެކުލް ކުރަނީ---

މިފްތާޙް މުޙައްމަދު

މިފްތާޙް މުޙައްމަދު

11 ޑިސެމްބަރު 2024، 06:50

11 ޑިސެމްބަރު 2024، 06:50

ހުލާސާ

އަޖްފާން ކޮށްފައިވާ ފައުލަކީ "ވައިލަންޓް ކޮންޑަންޓް" އަށް ފެތޭ ފައުލެއް ކަމުން، ސަސްޕެންޝަންގެ އިތުރުން އޭނާ ވަނީ 5،000ރ (ފަސް ހާސް ރުފިޔާ) އިން ޖޫރިމަނާ ވެސް ކޮށްފައި.

ނައިންޓީ ޕްލަސް ގޯލްޑް ކަޕްގެ ފޭސް-2ގެ ގްރޫޕް-އެފްގައި ހިމެނޭ މާފުއްޓާއި އޭދަފުށި ބައްދަލު ކުރި މެޗުގައި، އޭދަފުށީގެ ގޯލްކީޕަރު އަލީ އަޖްފާން އަމްޖަދު އޭދަފުށީގެ ކުޅުންތެރިއަކަށް ކުރި ނުރައްކާތެރި ޓެކުލަކާ ގުޅިގެން، އޭނާ އެއް އަހަރަށް ސަސްޕެންޑް ކުރުމަށް މުބާރާތުގެ ޑިސިޕްލިނަރީ ކޮމެޓީއިން ނިންމައިފިއެވެ.

މިދިޔަ ހޯމު ދުވަހު ކުޅުނު މި މެޗު މާފުށިން ވަނީ 2-0 އިން ކާމިޔާބުކޮށްފައެވެ. މި މެޗުގައި މާފުށީގެ ކުރިޔަށް ކުޅޭ ކުޅުންތެރިޔާ ވަން-އޮން-ވަން ހާލަތެއްގައި ކީޕަރާއި ކުރިމަތި ލުމުން، އަޖުފާން އޭނާއަށް ޓެކުލް ކުރީ ފުއްމާލުމަށްފަހުއެވެ. އަދި މި ޓެކުލާ ގުޅިގެން މާފުށީގެ ކުޅުންތެރިޔާ ވެއްޓިފައިވަނީ އަނިޔާވެރި ގޮތަކަށެވެ. އެ ފައުލާ ގުޅިގެން އަޖުފާނަށް ވަނީ ރަތް ކާޑު ދައްކާ ދަނޑުން ފޮނުވާލާފައެވެ. 

އޭދަފުށްޓަކީ މުބާރާތުގެ ފުރަތަމަ ބުރުގައި ސައްތަ އިން ސައްތަ ރެކޯޑާއިއެކު ހުރިހާ މެޗަކުން މޮޅުވި ދެ ޓީމުގެ ތެރެއިން އެއް ޓީމެވެ. އަދި މާފުއްޓާ ދެކޮޅަށް ކުޅުނު މެޗަކީ އޭދަފުއްޓަށް މި މުބާރާތުގައި ކުރިމަތިލާން ޖެހުނު ފުރަތަމަ ބައްޔެވެ. 

އޭދަފުށިން މުބާރާތުގެ ފުރަތަމަ ބުރުގައި އެގާރަ ގޯލު ކާމިޔާބުކޮށްފައިވާއިރު، އެ ޓީމުގެ ކޮޅަށް ވަދެފައިވަނީ އެންމެ ގޯލެކެވެ. އެހެންކަމުން ފުރަތަމަ ބުރުގައި އެންމެ ރަގަޅު ޑިފެންސިވް ރެކޯޑެއް ވެސް އޮތީ އެ ޓީމުގެ އަތުގައެވެ.

ކީޕަރު އަޖުފާން ކުރި ފައުލާ ގުޅިގެން، އެ ކުށުގެ އަދަބެއްގެ ގޮތުގައި ނައިންޓީ ޕްލަސްގެ ހުރިހާ މުބާރާތަކުން އޭނާ ވަނީ އެއް އަހަރު ދުވަހަށް ސަސްޕެންޑު ކޮށްފައެވެ. ނައިންޓީ ޕްލަސްގެ ޑިސިޕްލިނަރީ ކޮމިޓީން މައްސަލަ ނިންމުމަށް ފަހު، އޭދަފުށީގެ ޓީމަށް ފޮނުވި ސިޓީގައި ބުނެފައި ވަނީ، އަޖްފާން ކޮށްފައިވާ ފައުލަކީ "ވައިލަންޓް ކޮންޑަންޓް" އަށް ފެތޭ ފައުލެއް ކަމަށެވެ. އެހެންކަމުން، ސަސްޕެންޝަންގެ އިތުރުން، އޭނާ ވަނީ 5،000ރ (ފަސް ހާސް ރުފިޔާ) އިން ޖޫރިމަނާ ވެސް ކޮށްފައެވެ.

މި ފޯރިގަދަ މެޗުގައި މާފުށީގެ ސަޕޯޓަރުން ދަނޑަށް އެރުމާއި ގުޅިގެން އެކަމަށް ވެސް ވަނީ މުބާރާތުގެ ޑިސިޕްލިނަރީ ކޮމެޓީން ފިޔަވަޅެއް އަޅާފައެވެ. އެގޮތުން އެ ޓީމު 3،000ރ. ޖޫރިމަނާކޮށްފައިވާއިރު، އެ ޖޫރިމަނާ ފައިސާ އެންމެ ލަސްވެގެން މާފުށިން ދެން ކުޅެން ޖެހޭ މެޗު ފެށުމުގެ ކުރިން ދައްކާ ހަލާސް ކުރުމަށް ވެސް އެ ޓީމަށް އަންގާފައިވެއެވެ.

މި ލިޔުން ކިޔާލުމުން

Ads by MSS