މަސްތުވާތަކެތީގެ ވިޔަފާރި ކުރާފަރާތްތަކަށް އަދަބު ދިނުމަށް އެކުލަވައިލާ ބިލަށް އާންމުންގެ ޙިޔާލު ހޯދުމަށް ހުޅުވާލައިފި

މަސްތުވާތަކެތީގެ ވިޔަފާރިއަށް ފައިނޭންސްކުރާފަރާތްތަކާ އެވިޔަފާރިކުރާ ފަރާތްތަކަށް ހަރުކަށި އަދަބު ދިނުމަށް އެކުލަވައިލާ ބިލަށް އާންމުންގެ ހިޔާލު ހޯދުމަށް ރައްޔިތުންގެ މަޖިލީހުން ހުޅުވާލައިފިއެވެ. 

ރައްޔިތުންގެ މަޖިލީހުން މިބިލަށް ޙިޔާލު ހޯދުމަށް ހުޅުވާލައިފައިވަނީ މި ހިނގާ ޑިސެމްބަރު މަހުގެ 31 ވަނަ ދުވަހުގެ 12:00 އާއި ހަމައަށެވެ. އެގޮތުން ޚިޔާލު  ހުށަހެޅުމަށް ޖުޑީޝަރީ ކޮމިޓީގެ އީމެއިލް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުން ހުށައެޅޭނެ ކަމަށް ރައްޔިތިުންގެ މަޖިލީހުން ވަނީ ބުނެފައެވެ.

މި ބިލަކީ ގަމު ދާއިރާގެ ޕީއެންސީ މެންބަރު ޔޫސުފް ނަޝީދު ހުށަހެޅުއްވި، މަސްތުވާތަކެއްޗާބެހޭ ޤާނޫނަށް އިސްލާޙު ގެނައުމުގެ ބިލެވެ.

މި ބިލުގެ މައިގަނޑު މަޤްސަދަކީ ރާއްޖޭގައި މަސްތުވާތަކެތީގެ ވިޔަފާރި އިތުރުވަމުންދާތީ، އެކަން ހުއްޓުވުމަށް މަސައްކަތްކުރުން ކަމަށް ވަނީ ބުނެފައެވެ. 

މީގެ އިތުރުން، ޤާނޫނު ތަންފީޒުކުރާ އިދާރާތަކަށް އިތުރު ބާރުތައް ދިނުމާއި، މަސްތުވާތަކެއްޗަށް ދެވިހިފާފައިވާ މީހުންނަށް ހަރުދަނާ ފަރުވާއެއް ދެވޭނެ ނިޒާމެއް ހަމަޖެއްސުން ވެސް މި ބިލުގެ އަމާޒުތަކުގެ ތެރޭގައި ހިމެނެއެވެ.

ބިލުގައި ހިމެނޭ މުހިންމު ބައެއް ކަންކަމުގެ ތެރޭގައި:

•   މަސްތުވާތަކެތީގެ ޚިދުމަތްދޭ ތަނެއް ދޫކުރުމަކީ ކުށެއްކަމަށް ކަނޑައަޅައި، އެކަމަށް 5 އަހަރުގެ ޖަލު ހުކުމަކާއި 50,000 އާއި 100,000 ރުފިޔާއާ ދެމެދުގެ ޖޫރިމަނާއެއް ކަނޑައެޅުން.
•  މަސްތުވާތަކެތި ބޭނުންކުރުމަށް ތަނެއް ހުއްދަކުރުމަށް މަގުފަހިކުރާ ފަރާތްތަކަށް 10 އަހަރުގެ ޖަލު ހުކުމަކާއި 100,000 އާއި 200,000 ރުފިޔާއާ ދެމެދުގެ ޖޫރިމަނާއެއް ކަނޑައެޅުން.
•  މަސްތުވާތަކެއްޗަށް ފައިނޭންސްކުރުމަކީ ކުށެއްކަމަށް ކަނޑައަޅައި، އެކަމަށް 20 އަހަރުގެ ޖަލު ހުކުމަކާއި 200,000 އާއި 1,000,000 ރުފިޔާއާ ދެމެދުގެ ޖޫރިމަނާއެއް ކަނޑައެޅުން.
  

މި ބިލުގެ އިބްތިދާއީ ބަހުސްގައި ގިނަ މެންބަރުން ވަނީ، ޤާނޫނުތައް ހެދުނު ކަމުގައިވިޔަސް އެކަށީގެންވާ ގޮތެއްގައި ތަންފީޒުނުކުރެވޭކަން ފާހަގަކުރައްވައިފައެވެ.