ބީސީސީގެ ހުރިހާ ޚިދުމަތެއް އެއް ޕޯޓަލް އަކުން ލިބޭހެން “ކުމެވި” ޕޯޓަލް އިފްތިތާޙް ކޮށްފި

ބިޒްނަސް ސެންޓަރ ކޯޕަރޭޝަން (ބީސީސީ) އިން ދޭ ހުރިހާ ޚިދުމަތެއް އެއް ޕޯޓަލް އަކުން ލިބޭހެން “ކުމެވި” ޕޯޓަލް އިފްތިތާޙްކޮށްފިއެވެ. 

ބީސީސީން ދެމުން އަންނަ ޚިދުމަތްތައް ކަމަށްވާ، އޮތެންޓިކް މޯލްޑިވްސް، ސީޑް ބައި ބީސީސީ، ވިޔަފާރި ކޮންސަލްޓެންސީގެ ޚިދުމަތް، މަހަ ޕޯޓަލް، އަދި ކްރިއޭޓިވް އިކޮނޮމީ ފަންޑާއި އަމިއްލަ މަސައްކަތް ކުރައްވާ ފަރާތްތަކުގެ ދަފްތަރުގައި ހިމެނުމުގެ ފުރުސަތު ވެސް މިޕޯޓަލްގެ ދަށުން ލިބިގެންދާނެއެވެ.

ކުމެވި ޕޯޓަލް އިފްތިތާޙްކުރުމަށް 10 ޑިސެމްބަރ 2024 ގައި ބީސީސީގައި ބޭއްވި ރަސްމިއްޔާތެއްގައި މި ޕޯޓަލް އިފްތިތާޙް ކުރެވުނީ ބީސީސީގެ ފޭސްބުކް ޕޭޖު މެދުވެރިކޮށެވެ.

އޮތެންޓިކް މޯލްޑިވްސްގެ ސަޕްލަޔަރަކަށް ވާން އެދޭ ފަރާތްތަކަށް އެކަމަށް އެދި ހުށަހެޅުމާއި، ސީޑް ބައި ބީސީސީން ދޭ ހިދުމަތްތައް ކަމަށްވާ، މަސައްކަތު ޖާގަތައް ހޯދުމަށް އެދި ހުށަހެޅުމާއި، ވިޔަފާރިއެއް ފެށުމަށް ނުވަތަ ވިޔަފާރިއާ ބެހޭ ކަންކަމުގައި ތަޖުރިބާކާރުންގެ ހިޔާލާއި މަޝްވަރާ ހޯދުމަށް ޓަކައި ކޮންސަލްޓެންސީގެ ހިދުމަތަށް އެދި ހުށަހެޅުމާއި، މަސްވެރި އުފެއްދުންތައް ވިއްކުމަށް ހާއްސަ މަހަ ޕޯޓަލްގެ ޚިދުމަތްތައް ހޯދުމަށާއި، އަމިއްލަ މަސައްކަތް ކުރައްވާ ފަރާތްތަކުގެ ދަފްތަރުގައި ހިމެނުމުގެ އިތުރުން ބީސީސީން ދާދި ފަހުން ފެށި ކްރިއޭޓިވް އިކޮނޮމީ ފަންޑުގެ ޚިދުމަތް ހޯދުމަށް ވެސް މީގެ ފަހުން ކުމެވި ޕޯޓަލް ބޭނުންކުރެވޭނެކަމަށް ބީސީސީއިން ބުނެއެވެ.

ބީސީސީގެ ވެބްސައިޓް www.bcc.mv އިން މިހާރު ކުމެވި ޕޯޓަލް ފެންނަން ހުންނާނެއެވެ. 

ބީސީސީން ކުދި އަދި މެދުފަންތީގެ ވިޔަފާރިތަކަށް ފަސޭހަކޮށްދިނުމުގެ މަގުސަދުގައި އިފްތިތާހުކުރި މި ޕޯޓަލްގެ މަސައްކަތަކީ ޔޫއެނޑީ.ޕީ އާއި ޖަޕާން ސަރުކާރުގެ އެހީތެރިކަމާއެކު ކުރެވުނު މަސައްކަތެކެވެ.