ގެއްލުމުގެ ބަދަލުގައި ބައެއް ފަރާތްތަކަށް ދިން ފައިސާގެ މައްސަލާގައި ކުރީގެ ރައީސް ޞާލިޙުގެ މައްޗަށް ތަހުޤީޤެއް ހިންގަނީ

ގެއްލުމުގެ ބަދަލުގައި ބައެއް ފަރާތްތަކަށް ދިން ފައިސާގެ މައްސަލާގައި ކުރީގެ ރަޢީސް އިބްރާހިމް މުޙައްމަދު ޞާލިޙާއި އެސަރުކާރުގެ އިސް ދެބޭފުޅެެއްގެ މައްޗަށް ތަހުޤީޤެއް ހިންގަން ރައްޔިތުންގެ މަޖިލީހުގެ މާލިއްޔަތު ކޮމިޓީއިން މިއަދު ފާސްކޮށްފިއެވެ. 

މާލިއްޔަތު ކޮމިޓީގެ މިއަދުގެ ބައްދަލުވުމުގައި، ކުރީގެ ރައީސް އިބްރާހިމް މުޙައްމަދު ޞާލިޙާއި، ރައީސް އޮފީހުގެ ކުރީގެ ވަޒީރު އަލީ ޝިޔާމް، އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާޢީލްގެ މައްޗަށް ޖިނާއީ ތަޙުޤީޤެއް ހިންގުމަށް ޕްރޮސެކިއުޓަރ ޖެނެރަލްއަށް އެންގުމަށް ވަނީ ފާސްކޮށްފައެވެ.

މާލިއްޔަތު ކޮމިޓީގެ މިއަދުގެ ބައްދަލުވުމުގައި ވާހަކަދައްކަވަމުން މަޖީލީހުގެ ހިތަދޫ މެދު ދާއިރާގެ މެމްބަރު އަޙުމަދު އަޒާން މަރުޒޫޤު ވިދާޅުވީ އެމްޑީޕީގެ ވެރިކަމުގައި ރައީސް އޮފީހުން ކޮމެޓީއެއް ހަދައިގެން ދިޔައީ ރައްޔިތުންގެ މުދަލާއި ފައިސާ އެކި ފަރާތްތަކަށް ބަދަލުގެ ގޮތުގައި ދެމުންކަމަށެވެ. އަދި މިއީ މީގެ ކުރިން ރާއްޖޭގެ ތާރީޚުގައި ހިނގި ކަމެއްނޫން ކަމަށް އަޒާން ވިދާޅުވިއެވެ. 

 ކޮމިޓީގައި ހިމެނޭ ފައްޔާޒު އިސްމާއިލުގެ އާއިލާ ބޭފުޅުންނަށްވެސް އެތައް އަހަރަކަށް ރިސޯޓްހަދަން ބަދަލުގެ ގޮތުގައި ރަށްތައް ދީފައިވާ ކަމަށް އަޒާން ވިދާޅުވިއެވެ.

މި ކޮމިޓީން ފާސްކޮށްފައިވަނީ މި ތިން ބޭފުޅުން ދައުލަތުގެ އިސް މަޤާމުތަކުގައި ތިއްބަވައިގެން، ޤާނޫނުއަސާސީން މަތިކޮށްފައިވާ ވާޖިބުތަކާއި ޚިލާފަށް ދައުލަތުގެ ފައިސާއާއި މުދާ ސީދާ ގޮތުންނާއި ނުސީދާ ގޮތުން ޙައްޤުނޫން ފަރާތްތަކަށް ހޯދައިދީފައިވާ ކަމަށް ތުހުމަތުކުރެވޭތީ ކަމަށް އަޒާން ވިދާޅުވިއެވެ.

ކުރީގެ ރައީސްކަން ކުރުމަކީ ވައްކަންކުރަން ލިބޭ ލައިސަންސެއް ނޫން ކަމަށް އަޒާން ވިދާޅުވިއެވެ. އަދި  ވައްކަން ކޮށްފަ ތިމަން މަނިކުފާނަކީ ކުރީގެ ރައީސެކޭ ތިމަންނަ އަކީ ޕާޓީއެއްގެ ޗެއާޕާސަންއެކޭ މިހާރު އެހެންވީމަ ތިމަންނައަކަށް ދައުވާ ކޮށްގެން ނުވާނެއޭ ނުބުނެވޭނެ ކަމަށާއި އަދި  އެއީ ސިޔާސީ ދައުވާއެކޭ ނުބުނެވޭނެ ކަމަށްވެސް އަޒާން ވަނީ ވިދާޅުވެފައެވެ. 

މިއަދު މާލިއްޔަތު ކޮމިޓީން ވަނީ ސެޓްލްމަންޓް ކޮމިޓީން 2019 އިން 2023 އާ ހަމައަށް ސޮއިކޮށްފައިވާ ސެޓްލްމަންޓްތަކަކީ ބާޠިލު އެއްބަސްވުންތަކެއް ކަމަށް ކަނޑައަޅައި، އެ އެއްބަސްވުންތައް ބާޠިލުކޮށް، ބަދަލު ދީފައިވާނަމަ އެ ފައިސާ އަނބުރާ ދައުލަތަށް ނެގުމަށް ބަންޑާރަ ނައިބަށާއި ކަމާ ގުޅުންހުރި އިދާރާތަކަށް އެންގުމަށްވެސް ފާސްކޮށްފައެވެ.

މާލިއްޔަތު ކޮމެޓީގެ މިއަދުގެ ބައްދަލުވުމުގައި ފުނަދޫ ދާއިރާގެ މެންބަރު މުޙައްމަދު މަމްދޫޙް ވަނީ ކުރީގެ ރައީސް ޞާލިޙާއި ވަޒީރު ޝިޔާމް އަދި ވަޒީރު ފައްޔާޒުގެ މައްޗަށް ޖިނާއީ ތަހުޤީޤެއް ހިންގަން ޕީޖީއަށް އަންގަން ފެންނަ ކަމަށް ހުށަހަޅައިފައެވެ.

 މަމްދޫޙުގެ އެ ހުށަހެޅުމަށް ތާއިދުކޮށްފައި ވަނީ ކެލާ ދާއިރާގެ މެންބަރު ޢަބްދުﷲ ޝަރީފެވެ. އެ ހުށަހެޅުން ފާސްކޮށްފައި ވަނީ ޖަލްސާގައި ބައިވެރިވެ ވޯޓުދިން ހަ މެންބަރުންގެ އިއްތިފާޤުންނެވެ.

މި މައްސަލައިގައި އެމްޑީޕީގެ މެންބަރުން މިއީ ސިޔާސީ ބޭނުމަށް ކުރާ ކަމެއް ކަމަށް ބުނެ ކަންބޮޑުވުން ފާޅުކޮށްފައިވެއެވެ.