ޚަބަރު
ރަމަޟާންމަހު މިސްކިތްތަކުގައި އިމާމުވެ ތަރާވީޙު ނަމާދު ކުރާނެ ދިވެހި އިމާމުން ހޯދަން އިޢުލާނު ކޮށްފި

އިސްލާމީ މަރުކަޒުގައި ޖަމާޢަތުގައި ނަމާދުކުރެވެނީ
ރަމަޟާންމަހު މިސްކިތްތަކުގައި އިމާމުވެ ތަރާވީޙު ނަމާދުކުރާނެ ހިފްޡުކޮށްފައި ތިބި ދިވެހި އިމާމުން ހޯދަން އިސްލާމީ ކަންތައްތަކާބެހޭ ވުޒާރާއިން އިޢުލާނުކޮށްފިއެވެ.
އިސްލާމީ ކަންތައްތަކާ ބެހޭ ވުޒާރާއިން ކޮށްފައިވާ އިޢުލާނުގައި ބުނެފައިވަނީ 1446 ވަނަ އަހަރުގެ ރަމަޟާންމަހު މަސްޖިދުއްސުލްޠާން މުޙައްމަދު ތަކުރުފާނުލް އަޢުޡަމާއި މަސްޖިދު މަލިކި ސަލްމާންގައި އިމާމުވެ ޙިފްޡުކޮށް ތަރާވީޙު ނަމާދުކުރާ ފަރާތްތަކަކީ ދިވެހި ޙާފިޡުން ކަމުގައި ހެދުމަށާއި އެކަމަށް އެންމެ ޤާބިލް ދިވެހި ޙާފިޡުން ހޯދަން ބޭނުންވާތީ، އިމާމުވެ ޙިފްޡުކޮށް ތަރާވީޙު ނަމާދުކުރުމަށް ބޭނުންވާ ދިވެހި ޙާފިޡުންނަށް ފުރުސަތު ހުޅުވާލާފައިވާ ކަމަށެވެ.
އެވުޒާރާއިން އިތުރަށް ބުނެފައިވަނީ އިސްލާމީ މަރުކަޒުގަޔާއި ސަލްމާން މިސްކިތުގައި ޙިފްޡުކޮށް ތަރާވީޙު ނަމާދު ކުރުމަށް އެދި ހުށަހަޅުއްވާ ފަރާތްތަކުގެ މެދުގައި ޓެސްޓެއް ބާއްވައި ޙިފްޡު އެންމެ ރަނގަޅު 04 ފަރާތެއް ކަނޑައެޅިގެންދާނެ ކަމަށެވެ.
އެހެންކަމުން 1446 ވަނަ އަހަރު ރަމަޟާން މަހު މަރުކަޒުތަކުގައި އިމާމުވެ ޙިފްޡުކޮށް ތަރާވީޙު ނަމާދު ކުރުމަށް ދިވެހި ޙާފިޡުންނަށް ކަނޑައެޅިފައިވާ ފޯމު އެވުޒާރާގެ ވެބްސައިޓް www.islamicaffairs.gov.mv އިން ލިބޭނެ ކަމަށް އިޢުލާނުގައި ބުނެފައިވެއެވެ.
އެ ފޯމު ފުރިހަމަކޮށް ލިޔުންތަކާއެކު 2025 ފެބުރުވަރީ 16 ވާ އާދިއްތަ ދުވަހުގެ 14:00 ގެ ނިޔަލަށް އެވުޒާރާއަށް ހުށަހެޅުމަށްވެސް އެވުޒާރާއިން ބުނެފައެވެ.
މިފަހަކަށް އައިސް ރާއްޖޭގެ ގިނަ މިސްކިތްތަކުގައި އިމާމުވެ ތަރާވީޙު ނަމާދުކުރަނީ ދިވެހި ހާފިޡުންކަން ފާހަގަކޮށްލަންޖެހެއެވެ.