އދ. އަކީ އިތުބާރު ހިފޭ އަދި ބައިނަލްއަގުވާމީ ގާނޫނުތަކަށް ބޯލަނބާ ޖަމާއަތަކަށް ވާންޖެހޭ: ރައީސް

އދ. އަކީ ހުރިހާ މެންބަރު ގައުމުތަކުން އިތުބާރު ކުރާ، ޒިންމާދާރުކަން ބޮޑު، އަދި ބައިނަލްއަގުވާމީ ގާނޫނުތަކަށް ފުރިހަމައަށް އިހުތިރާމުކުރާ މުއައްސަސާއަކަށް ވާންޖެހޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ މިއަދު ފާހަގަކުރަމުންދާ އދ. ގެ 81 ވަނަ އަހަރީ ދުވަހުގެ މުނާސަބަތުގައި ދެއްވި ޚާއްސަ ޚިތާބެއްގައެވެ.

އެމަނިކުފާނުގެ މެސެޖުގައި ވިދާޅުވީ، އދ. ގެ މައްޗަށް ދުނިޔޭގެ އިތުބާރު ބިނާވެފައިވަނީ ގައުމުތަކުގެ މެދުގައި އޮންނަ އިތުބާރާއި ޒިންމާދާރުކަމުގެ މައްޗަށް ކަމަށެވެ. އަދި އެ އިތުބާރު ދެމެހެއްޓޭނީ ބައިނަލްއަގުވާމީ މުއާހަދާތަކާއި އުސޫލުތައް ފުރިހަމައަށް ތަންފީޒުކޮށް، ގާނޫނުގެ ވެރިކަން ހުރިހާ ދައުލަތްތަކެއްގެ މައްޗަށް އެއް ހަމައެއްގައި ހިންގިގެން ކަމުގައި ރައީސް ފާހަގަކުރެއްވިއެވެ.

ނަމަވެސް، ސަރަހައްދީ ސިޔާސީ ނުތަނަވަސްކަން ބޮޑުވުމާއި، ގާނޫނުތައް ތަންފީޒުކުރުމުގައި ތަފާތުކުރުންތައް ގެންގުޅުމުގެ ސަބަބުން މިހާރު އދ. އަށް އޮތް އިތުބާރަށް ބުރޫއަރަމުންދާ ކަމަށް އެމަނިކުފާނު ވިދާޅުވިއެވެ. މިފަދަ ބައިބައިވުންތަކުގެ ގެއްލުން އެންމެ ބޮޑަށް ފޯރަމުންދަނީ ފަލަސްތީނު ފަދަ ނިކަމެތިކޮށްލެވިފައިވާ ގައުމުތަކުގެ އިންސާނިއްޔަތަށް ކަމަށް ރައީސް ވިދާޅުވިއެވެ.

މީގެއިތުރުން، ތަރައްގީވަމުން އަންނަ ކުދި ޖަޒީރާ ގައުމުތަކަށް (ސިޑްސް) ދިމާވެފައިވާ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، މާލީ އެހީތެރިކަމާއި ޒަމާނީ ޓެކްނޮލޮޖީގެ ފުރުސަތުތައް ހަމަހަމަކަމާއެކު ނުލިބުމާއި، ދެމެހެއްޓެނިވި ނޫން ދަރަނީގެ ބުރައަކީ އެފަދަ ގައުމުތަކުގެ ތަރައްގީއަށް އެޅިފައިވާ ބޮޑު ހުރަހެއް ކަމަށެވެ.

ދިވެހިރާއްޖޭގެ ތަސައްވުރާ ގުޅޭގޮތުން ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ، 2040 ވަނަ އަހަރާ ހަމައަށް ދާއިރު ރާއްޖެއަކީ ފުރިހަމައަށް ތަރައްގީވެފައިވާ ގައުމަކަށް ހެދުމަށް ރާއްޖެއިން އަމާޒު ހިފާފައިވާ ކަމަށެވެ. އެ އަމާޒަށް ވާސިލުވުމަށްޓަކައި ގައުމުގެ މުސްތަގުބަލު އަމިއްލައަށް ކަނޑައެޅުމުގެ މިނިވަންކަން ލިބުމާއެކު، ބޭނުންވާ ވަސީލަތްތައް ފަހިވެފައި އޮތުމަކީ ނުހަނު މުހިންމު ކަމެއް ކަމުގައި އެމަނިކުފާނު ވިދާޅުވިއެވެ. އަދި ރައްޔިތުންނަށް އިންވެސްޓްކޮށް، އިގްތިސާދު ވަރުގަދަކޮށް، ބޭރުގެ ލޮޅުންތަކުން އަރައިގަނެވޭނެ ފަދަ ވިލުންތެރި ގައުމަކަށް ރާއްޖެ ހަދަންޖެހޭކަން ވެސް އެމަނިކުފާނު ބަޔާންކުރެއްވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވަމުން ވިދާޅުވީ، އދ. އަކީ ހުރިހާ ދައުލަތްތަކެއްގެ ހައްގުތައް ހިމާޔަތްކޮށްދޭ، އަދި ބޮޑެތި ބާރުތަކުގެ ނުފޫޒެއް ނެތި ކޮންމެ ގައުމަކަށްވެސް އަމިއްލަ މުސްތަގުބަލު ކަނޑައެޅުމުގެ ފުރުސަތު ފަހިކޮށްދޭ ތަނަކަށް ވާންޖެހޭނެ ކަމަށެވެ. އަދި ދުނިޔޭގައި ސުލްހަމަސަލަސްކަމާއި އިންސާފު ގާއިމުކުރުމަށް ކުރެވޭ އެންމެހައި މަސައްކަތްތަކުގައި ބައިނަލްއަގުވާމީ މުޖުތަމައާއެކު ރާއްޖެއިން އަބަދުވެސް ސާބިތުކަމާއެކު ދެމިއޮންނާނެ ކަމުގެ ޔަގީންކަން އެމަނިކުފާނު ދެއްވިއެވެ.