ދުނިޔެ
ޣައްޒާ ހޮސްޕިޓަލުގައި ތިބި 60 ބަލިމީހުންނަށް ބަނޑުހައިހޫނުކަމުގެ ނުރައްކާ އޮތް ކަމަށް ބުނެފި

އިޒްރާއިލްގެ ހަމަލާއެއްގައި ޒަހަމްވި ކުޑަކުދިން ތަކަކަށް ހޮސްޕިޓަލެއްގައި ފަރުވާދެނީ.
ފަލަސްޠީނުގެ ޣައްޒާގެ ހޮސްޕިޓަލުގައި ތިބި 60 ބަލިމީހުންނަށް ބަނޑުހައި ހޫނުކަމުގެ ނުރައްކާ އޮތް ކަމަށް ޣައްޒާގެ އޮތޯރިޓީތަކުން ބުނެފިއެވެ.
އަލްޖަޒީރާއިން ކޮށްފައިވާ ރިޕޯޓުގައި ބުނެފައިވަނީ އިޒްރާއީލުން ވަށާލާފައިވާ އުތުރު ޣައްޒާގެ އިންޑޮނޭޝިއާ ހޮސްޕިޓަލުގައި ޒަޚަމްވެފައިވާ ދިހަވަރަކަށް ބަލިމީހުން ކާނާ އާއި ފެން ނުލިބުމުގެ ސަބަބުން މަރުވުމުގެ ނުރައްކާ އޮތް ކަމަށް ފަލަސްތީނުގެ ސިއްހީ އިދާރާތަކުން ބުނެފައި ވާކަމަށެވެ.
މީގެއިތުރުން ޣައްޒާގެ ޞިއްޙީ ވުޒާރާއިން އަންގާރަ ދުވަހުގެ ރޭ ދަންވަރު ބުނެފައިވަނީ 60 ބަލިމީހަކު ބަނޑުހައި ހޫނު ކަމުގެ ސަބަބުން “މަރުވުމުގެ ނުރައްކާ އޮތް” ކަމަށެވެ.
”ހޮސްޕިޓަލް އެތެރޭގެ އިންސާނީ ޙާލަތު ވަނީ އިންތިހާއަށް ނުރައްކާތެރި ހާލަތަކަށް ގޮސްފައި، ޒަޚަމްވި މީހުންނަށް ބޭނުންވާ އަސާސީ ވަސީލަތްތައް ނެތުމުގެ ސަބަބުން ތަކުލީފުތައް ދަނީ އިތުރުވަމުން” ފަލަސްޠީނުގެ ޞިއްޙީ ވުޒާރާއިން ބުނެފައިވެއެވެ.
އިންޑޮނޭޝިޔާ ހޮސްޕިޓަލް ހުންނަނީ އޮކްޓޯބަރު މަހުގެ ކުރީކޮޅުއްސުރެ އިޒްރާއީލުގެ އަސްކަރިއްޔާ އިން އެމީހުންގެ ބާރުގެ ދަށަށް ގެނެސްފައިވާ ޣައްޒާގެ އުތުރުގައި އޮންނަ ބައިތު ލާހިޔަގައެވެ.
އިޒްރާއީލުން ޣައްޒާއަށް ދެމުންދާ ހަމަލާތަކުގައި ޝަހީދުވި މީހުންގެ އަދަދާ ބެހޭ ގޮތުން ކޮންމެ ދުވަހަކު ވަކިން ނެރޭ އަދާހަމަތަކުގައި ބުނެފައި ވަނީ މިދިޔަ 24 ގަޑިއިރުގެ ތެރޭގައި މަދުވެގެން 28 މީހުން ޝަހީދުވެ 54 މީހުން ޒަހަމްވެފައިވާ ކަމަށެވެ.
މީގެ އިތުރުން ހަމަލާތަކުގައި ވެއްޓުނު އިމާރާތް ތަކުގެ ގާތަކުގެ ދަށުގައި އަދިވެސް ގިނަ އަދަދެއްގެ މީހުން ތިބޭނެ ކަމަށް ވަނީ ލަފާކޮށްފައެވެ. އަދި އެމްބިއުލާންސް އާއި ސިވިލް ޑިފެންސް ކްރޫތަކަށް އެމީހުންނާ ހަމައަށް ދެވިފައިނުވާ ކަމަށްވެސް ވަނީ ބުނެފައެވެ.
އިޒްރާއީލުން ޣައްޒާއަށް ދެމުންދާ ހަމަލާތައް 14 މަހަށްވުރެ ގިނަ ދުވަހަށް ދެމިގެން ގޮސްފައިވާއިރު، މި ހަމަލާތަކުގައި ޝަހީދުވި މީހުންގެ އަދަދު 44،786 އަށް އަރާފައިވާ ކަމަށް ފަލަސްޠީނުގެ ޞިއްޙީ ވުޒާރާއިން ވަނީ ބުނެފައެެވެ.