ގެދޮރުވެރިކަމާ ބެހޭ ވުޒާރާގެ ޢިމާރާތުގައި ރޯވެ އަނދަނީ

މިއަދު ހެނދުނު ގެދޮރުވެރިކަމާ ބެހޭ ވުޒާރާގެ ޢިމާރާތުގައި ނުރައްކާތެރި އަލިފާނުގެ ޙާދިސާއެއް ހިނގާ އިމާރާތް އަނދަމުންދާ ކަމަށް ވަނީ ރިޕޯޓުކުރެވިފައެވެ. މި ހާދިސާ ހިނގާފައިވަނީ އަމީނީމަގާ ދިމާލުގައި ހުންނަ އިމާރާތުގައި ކަމަށް އެމްއެންޑީއެފުން މަޢުލޫމާތު ދީފައިވެއެވެ.

ހެނދުނު 6:30 އެހާކަށްހާއިރު ފެށިގެން، އެމްއެންޑީއެފް އާއި ފަޔަރ އެންޑް ރެސްކިއު ސަރވިސަސްގެ އޮފިސަރުން ވަނީ އަލިފާން ނިއްވުމުގެ މަސައްކަތުގައި ހަރަކާތްތެރިވަމުންނެވެ. ޑިފެންސް މިނިސްޓަރު ޣައްސާން މައުމޫން މީޑިއާއަށް ވިދާޅުވި ގޮތުގައި، އެންމެ ފުރަތަމަ އިސްކަންދީފައިވަނީ ކައިރީގައި ހުރި އިމާރާތްތަކުގައި ތިބި މީހުން ރައްކާތެރި ތަންތަނަށް ގެންދިއުމަށެވެ.

ހައުސިންގ މިނިސްޓްރީގެ އިމާރާތް ރޯވެ އަނދަނީ

މި އިމާރާތަކީ ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވުޒާރާގެ އިތުރުން، އިމާރާތްކުރުމާއި ބިނާވެށްޓާބެހޭ ވުޒާރާ އަދި އިންފްރާސްޓްރަކްޗަރ މިނިސްޓްރީ އާއި އެންވަޔަރަންމަންޓް މިނިސްޓްރީގެ އޮފީސްތައް ހިމްތައް ހިމެނޭ އިމާރާތެކެވެ. އަދި މި އިމާރާތް ހުންނަ ގޯތީގައި މާލެ ސިޓީ ކައުންސިލްގެ ރެޖިސްޓްރޭޝަން ޑިޕާޓްމަންޓްވެސް ހިމެނެއެވެ.

އަލިފާނުގެ ސަބަބުން އިމާރާތަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށް ބެލެވެއެވެ. މުޅި ސަރަހައްދަށް ދުމުގެ އަސަރު ކުރަމުންދާއިރު، އަލިފާން މުޅިން ކޮންޓްރޯލްކުރެވިފައި ނުވާ ކަމަށް ވެސް ވަނީ ރިޕޯޓުކުރެވިފައެވެ. ސިފައިންނާއި ފުލުހުން މިހާރު ދަނީ އިމާރާތުގައި ސަލާމަތްކުރެވޭނެ ތަކެތި ސަލާމަތްކުރުމުގެ މަސައްކަތުގައެވެ.