ގެދޮރުވެރިކަމާ ބެހޭ ވުޒާރާގައެި ރޯވި އަލިފާނުގެ ހާދިސާއާއި ގުޅިގެން ސޯޝަލް ސެންޓަރުގައި ވަގުތީ ހިޔާ ޤާއިމްކޮށްފި

ހައުސިންގ މިނިސްޓްރީ އިމާރާތުގައި މިއަދު ހެނދުނު ރޯވި އަލިފާންގަނޑުގެ ސަބަބުން އެ ސަރަހައްދުގައި ދިރިއުޅެމުންދާ ފަރާތްތައް ވަގުތީ ގޮތުން ސޯޝަލް ސެންޓަރަށް ބަދަލުކުރުމުގެ މަސައްކަތް ފަށައިފިއެވެ. މި މަޢުލޫމާތު ޕީއެސްއެމް ނިއުސްއަށް ދެއްވަމުން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) ގެ ޗީފް އެގްޒެކެޓިވް ހިސާން ހަސަން ވިދާޅުވިއެވެ.

ހިސާން ހަސަން ވިދާޅުވި ގޮތުގައި، މިވަގުތުވެސް އެ ސަރަހައްދުގެ ގެތަކަށް ދުމުގެ އަސަރު ދަނީ ކުރަމުންނެވެ. އަދި މިކަމާ ގުޅިގެން ސޯޝަލް ސެންޓަރުގައި އިމަޖެންސީ އިވެކުއޭޝަން ސެންޓަރެއް ޤާއިމްކޮށްފައިވާ ކަމަށާއި، އެތަނުގައި ދިވެހި ރެޑް ކްރެސެންޓާއި އެންޑީއެމްއޭގެ ފަރާތްތައް މިހާރު ހަރަކާތްތެރިވަމުންދާ ކަމަށް އޭނާ ވިދާޅުވިއެވެ.

އެންޑީއެމްއޭއިން ވަނީ އެއްވެސް އެހީތެރިކަމެއް ބޭނުންވާ ފަރާތެއް ވާނަމަ 115 އަށް ގުޅައި ސެންޓަރަށް ވަޑައިގަތުމަށް އެދިފައެވެ. މިއަދު ހެނދުނު ރޯވި އަލިފާންގަނޑު މި ޚަބަރު ތައްޔާރުކުރި އިރުވެސް އަދި ކޮންޓްރޯލް ނުވާކަން ފާހަގަކުރެވެއެވެ.

މި ހާދިސާއާ ގުޅިގެން އިތުރު މަޢުލޫމާތު ލިބުމުން އަންގައިދޭނެ ކަމަށް އެންޑީއެމްއޭއިން ބުނެފައިވެއެވެ. އަދި ރައްޔިތުންނަށް ވީހާވެސް ބޮޑަށް ރައްކާތެރިވުމަށާއި، ކަމާބެހޭ ފަރާތްތަކުގެ އިރުޝާދުތަކަށް ތަބާވުމަށް އެންޑީއެމްއޭއިން އިލްތިމާސްކޮށްފައިވެއެވެ.