ހޫޘީންގެ ހަމަލާތައް އިތުރުވެފައި ވަނިކޮށް، ސައޫދީ އިސްވެ އޮންނަ ކޯލިޝަނުން އީރާނާއި ބައްދަލުކުރަނީ

ޔަމަނުގައި ހަރަކާތްތެރިވާ ހޫޘީ ހަނގުރާމަވެރިންގެ ހަމަލާތައް ސައޫދީ އަރަބިއްޔާއަށް އަމާޒުވާ މިންވަރު އިތުރުވެފައި ވަނިކޮށް، އީރާނުން، ސައޫދީ އަރަބިއްޔާ، ތުރުކީ އަދި ޕާކިސްތާނުގެ ދިފާޢީ ކަންކަމާއި ގުޅޭ އިސް އޮފިޝަލުންނާއެކު ސަރަޙައްދީ ސަލާމަތާ ބެހޭ މަތީ ފެންވަރުގެ މަޝްވަރާތަކެއް ބޭއްވުމަށް ނިންމައިފިއެވެ. 

މިއީ ހޫޘީންގެ ހަމަލާތައް ވަރުގަދަވި ފަހުން، މި އިއްތިހާދުގެ ހުރިހާ މެންބަރުން ހިމެނޭ ގޮތަށް އީރާނާއެކު ބޭއްވޭ މިފަދަ ފުރަތަމަ ބައްދަލުވުމެވެ.

އަލްޖަޒީރާއިން ރިޕޯޓުކޮށްފައިވާ ގޮތުގައި، އީރާނުގެ ނޭޝަނަލް ސެކިއުރިޓީ ކައުންސިލުގެ ޑެޕިއުޓީ ސެކްރެޓަރީ އަލީ ބާޣިރީ ވަނީ ސަރަޙައްދީ ސަލާމަތާ ބެހޭ ގޮތުން މަޝްވަރާ ކުރުމަށް ޓަކައި މައްކާ ޑިފެންސް އެލަޔަންސްގެ އިސް އޮފިޝަލުން ތެހެރާނަށް ޒިޔާރަތް ކުރައްވާނެ ކަން ކަށަވަރުކޮށްދެއްވާފައެވެ. 

އީރާނުގެ ދައުލަތުގެ މީޑިއާ އައި.އާރު.އައި.ބީ (IRIB) އަށް މައުލޫމާތުދެއްވަމުން ބާޣިރީ ވިދާޅުވީ، ސައޫދީ ދިފާޢީ ވަޒީރު ޚާލިދު ބިން ސަލްމާން އަލް ސައޫދާއި، ޕާކިސްތާނުގެ އަސްކަރީ ކޮމާންޑަރު ފީލްޑް މާޝަލް އާސިމް މުނީރު އަދި ތުރުކީގެ ޖާސޫސީ އިދާރާގެ ވެރިޔާ އިބްރާހީމް ކަލިން މި މަޝްވަރާތަކުގައި ބައިވެރިވެވަޑައިގަންނަވާނެ ކަމަށެވެ. މި ބޭފުޅުން ބައްދަލުކުރައްވާނީ އީރާނުގެ ނޭޝަނަލް ސެކިއުރިޓީ ކައުންސިލުގެ ސެކްރެޓަރީ މުޙައްސިން ރިޟާއީއާއެވެ.

އީރާނުގެ ދިފާޢީ ސިޔާސަތާ ގުޅޭގޮތުން ވާހަކަދައްކަވަމުން ބާޣިރީ ވިދާޅުވީ، އެތެރޭގެ އަދި އަމިއްލަ ޤާބިލުކަމުގެ މައްޗަށް ބިނާވެފައިވާ އީރާނުގެ ދިފާޢީ މޮޑެލް ވެފައިވަނީ ޤައުމީ ސަލާމަތް ޤާއިމުކުރުމުގައި ކާމިޔާބު ނަމޫނާއަކަށް ކަމަށެވެ. މީގެއިތުރުން، އީރާނުގެ ސްޓްރެޓީޖިކް ސިޔާސަތަކީ ސަރަޙައްދުގެ ޤައުމުތައް މެދުވެރިކޮށް ސަރަޙައްދީ ސަލާމަތް ކަށަވަރުކުރުމާއި، އެމެރިކާއާއި އިސްރާއީލުން އިސްވެ ހިންގާ ބޭރުގެ ކޮންމެ ނުފޫޒަކާ ދެކޮޅަށް ތެދުވުން ކަމަށް ވެސް އޭނާ ފާހަގަކުރެއްވިއެވެ.

މި ބައްދަލުވުން ބާއްވާނެ ސީދާ ތާރީޚެއް އީރާނުގެ ދައުލަތުގެ މީޑިއާއިން ހާމަކޮށްފައެއް ނުވެއެވެ. ނަމަވެސް، މި މައްސަލަ ދަންނަ އިތުބާރުހުރި ދެ ފަރާތަކާ ޙަވާލާދީ ރޮއިޓާސް ނިއުސް އެޖެންސީން ރިޕޯޓުކޮށްފައިވާ ގޮތުގައި، މި މުހިންމު ބައްދަލުވުން ކުރިއަށްދާނީ ހޯމަ ދުވަހުއެވެ.