ސީބީޑީ ކޮޕް17: ހިމާޔަތްކޮށްފައިވާ ސަރަހައްދުތައް ބެލެހެއްޓުމުގައި ރާއްޖޭގެ ތަޖުރިބާ ހިއްސާކޮށްފި

ކޮންވެންޝަން އޮން ބަޔޮލޮޖިކަލް ޑައިވަރސިޓީ (ސީ.ބީ.ޑީ) ގެ ކޮޕް17 ގައި ބޭއްވުނު 'ޓާގެޓް 3 އެކްޝަން' ދުވަހާ ގުޅުވައިގެން ބޭއްވި ހައި އެމްބިޝަން ކޯލިޝަން ފޮރ ނޭޗަރ އެންޑް ޕީޕަލްސް ރިސެޕްޝަންގައި، ރައްކާތެރިކުރެވިފައިވާ ސަރަހައްދުތައް ބެލެހެއްޓުމުގައި ދިވެހިރާއްޖެއިން ހޯދާފައިވާ ތަޖުރިބާތައް ހިއްސާކޮށްފިއެވެ. 

މި ބައްދަލުވުމުގައި ރާއްޖޭގެ ތަޖުރިބާ ހިއްސާކުރެއްވީ ރައްކާތެރިކުރެވިފައިވާ ސަރަހައްދުތަކާބެހޭ މެނޭޖްމަންޓް އެނަލިސްޓް އައިޝަތު އަމަލްއެވެ.

އައިޝަތު އަމަލް މި ތަޖުރިބާތައް ހިއްސާކުރައްވާފައިވަނީ ރެޕިޑް ޑިޕްލޮއިމަންޓް މެކޭނިޒަމް (އާރް.ޑީ.އެމް) ގެ ފުރަތަމަ ދައުރުގެ އެހީ ލިބުނު ގައުމެއްގެ ހައިސިއްޔަތުންނެވެ. އާރް.ޑީ.އެމް އެހީގެ ދަށުން ރާއްޖޭގެ ތިމާވެށި ރައްކާތެރިކުރުމުގެ މަސައްކަތްތަކަށް މުހިންމު ފުރުސަތުތަކެއް ފަހިވެގެން ގޮސްފައިވާކަން އޭނާ ފާހަގަކުރެއްވިއެވެ.

މި އެހީގެ ދަށުން ދިވެހިރާއްޖޭގެ 30×30 ރޯޑްމެޕް އެކުލަވާލައި، އެ ރޯޑްމެޕް ފުރިހަމައަށް ދިރާސާކޮށް ކަށަވަރުކުރުމަށް މުހިންމު އެހީތެރިކަމެއް ވަނީ ލިބިފައެވެ. މި ރޯޑްމެޕަކީ ރާއްޖޭގެ ގުދުރަތީ މާހައުލާއި ދިރުންތައް ހިމާޔަތްކުރުމަށް ބައިނަލްއަގުވާމީ ފެންވަރުގައި އެއްބަސްވެފައިވާ ލަނޑުދަނޑިތައް ހާސިލުކުރުމަށް އެޅުނު މުހިންމު ފިޔަވަޅެއް ކަމަށް ތިމާވެއްޓާއި ބެހޭ ވުޒާރާއިން ވިދާޅުވެއެވެ.

އެކުލަވާލެވުނު ރޯޑްމެޕްގެ މައިގަނޑު މަޤްސަދަކީ، ރައްކާތެރިކުރެވިފައިވާ އަދި ރައްކާތެރިކުރެވިދާނެ ސަރަހައްދުތަކުގެ ވަރުގަދަ ނެޓްވޯކެއް ގާއިމުކުރުމެވެ. އަދި އެ ސަރަހައްދުތައް ހެޔޮގޮތުގައި ދެމެހެއްޓެނިވި ގޮތެއްގައި މެނޭޖްކޮށް ބެލެހެއްޓުމަށްޓަކައި، ގައުމީ ފެންވަރުގައި ތަރުތީބުކުރެވިފައިވާ މަގެއް ކަނޑައެޅުން މި މަސައްކަތުގެ ތެރޭގައި ހިމެނެއެވެ.

މި ބިންގަލުގެ މައްޗަށް ބިނާކޮށް، ރައްކާތެރިކުރެވިފައިވާ ސަރަހައްދުތަކާ ގުޅުންހުރި އެންމެހާ މަސައްކަތްތަކުގައި ހޭލުންތެރިކަން އިތުރުކުރުމަށް ޚާއްސަ ކެމްޕޭންތައް ހިންގުމަށް ދިވެހިރާއްޖެއިން ވަނީ ރާވާފައެވެ. އަދި ރައްކާތެރިކުރެވޭ ސަރަހައްދުތަކުގެ މުހިންމުކަން ރައްޔިތުންނަށް އަންގައިދީ، މިފަދަ މަސައްކަތްތަކުގައި އާންމުންގެ ބައިވެރިވުން ވަރުގަދަކުރުމަކީ ރާއްޖޭގެ ދުރުރާސްތާ މަޤްސަދެއްގެ ގޮތުގައި ވަނީ ކަނޑައަޅާފައެވެ.