ޚަބަރު
އަލިފާނުގެ ހާދިސާއާ ގުޅިގެން 50 އަށްވުރެ ގިނަ މީހުން ސޯޝަލް ސެންޓަރަށް ބަދަލުކޮށްފި

ގެދޮރުވެރިކަމާއި ބެހޭ ވުޒާރާގައި ރޯވެ އަނދަނީ ފޮޓޯ:ޕީއެސްއެމް
މާލޭގައި ހިނގި އަލިފާނުގެ ހާދިސާއާ ގުޅިގެން 50 އަށްވުރެ ގިނަ މީހުން ސޯޝަލް ސެންޓަރަށް ބަދަލުކުރުމުގެ މަސައްކަތް ކުރަމުންދާ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން މިއަދު ހާމަކޮށްފިއެވެ.
އެންޑީއެމްއޭގެ ޗީފް އެގްޒެކެޓިވް ހިސާން ހަސަން ޕީއެސްއެމްގެ ނިއުސްއަށް ދެއްވި މަޢުލޫމާތުގައި ވިދާޅުވި ގޮތުގައި، މި ހާދިސާއާ ގުޅިގެން އިވެކުއޭޝަން ސެންޓަރެއް ޤާއިމްކޮށްފައިވެއެވެ. އަދި އަލިފާން ރޯވި ސަރަހައްދުގައި ދިރިއުޅޭ 50 އަށްވުރެ ގިނަ މީހުން ސޯޝަލް ސެންޓަރަށް ގެންދިއުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
ހިސާން ހަސަން އިތުރަށް ވިދާޅުވި ގޮތުގައި، މި ހާދިސާއާ ގުޅިގެން ބަދަލުކުރެވޭ ފަރާތްތަކުން 4 އާއި 6 ގަޑިއިރު ދޭތެރޭގެ މުއްދަތެއް ސޯޝަލް ސެންޓަރުގައި ހޭދަކުރަން ޖެހިދާނެ ކަމަށް ލަފާކުރެވެއެވެ. އަދި އެތަނުގައި ތިބޭ މުއްދަތުގައި ކެއުމާއި ބުއިމުގެ ޚިދުމަތް ފޯރުކޮށްދޭނެ ކަމަށްވެސް އޭނާ ވިދާޅުވިއެވެ.
މީގެ އިތުރުން، އަލިފާނުގެ ސަބަބުން ދުމުގެ އަސަރު ބޮޑުވުމާ ގުޅިގެން، އެ ސަރަހައްދުގައި ހުރި އޮފީސްތަކާއި ސްކޫލްތައް ބަންދުކުރުމަށް ކަމާބެހޭ ފަރާތްތަކަށް އަންގާފައިވާ ކަމަށްވެސް އެންޑީއެމްއޭއިން ހާމަކުރިއެވެ.
އެންޑީއެމްއޭއިން ވަނީ ދުމުގެ އަސަރުކޮށްފައިވާ ނުވަތަ އެއްވެސް އެހީތެރިކަމެއް ބޭނުންވާ ފަރާތްތަކުން 115 އަށް ގުޅައިގެން އެހީތެރިކަން ހޯދުމަށް އިލްތިމާސްކޮށްފައެވެ.