އަލިފާނުގެ ހާދިސާއާ ގުޅިގެން ތިން ގެއެއްގެ މީހުންނަށް ނޫޅެވޭވަރަށް ދުމުގެ އަސަރު ކުރި

ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާގައި ހިނގި އަލިފާނުގެ ހާދިސާއާ ގުޅިގެން ތިން ގެއެއްގެ މީހުންނަށް ނޫޅެވޭވަރަށް ދުމުގެ އަސަރު ކުރިކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން ބުދަ ދުވަހު ހާމަކޮށްފިއެވެ.

އެންޑީއެމްއޭއިން  ދެއްވި މަޢުލޫމާތުގައި، އަލިފާނުގެ ހާދިސާ ހިނގި ސަރަހައްދުގެ ކުރިމައްޗަށް ހުރި 3 ގެއެއްގެ މީހުންނަށް އުޅެން އުނދަގޫވާ މިންވަރަށް ދުމުގެ އަސަރުކޮށްފައިވާ ކަމަށާއި، އިމާރާތްތަކަށްވެސް ގެއްލުންތައް ލިބިފައިވާ ކަމަށް ވިދާޅުވިއެވެ.

މި ހާދިސާއާ ގުޅިގެން، އެ ސަރަހައްދުގައި ދިރިއުޅޭ 50 އަށްވުރެ ގިނަ މީހުން ސޯޝަލް ސެންޓަރަށް ގެންދިއުމުގެ މަސައްކަތް ކުރަމުންދާ ކަމަށް އެންޑީއެމްއޭއިން ހާމަކުރިއެވެ. އަދި މި ފަރާތްތަކަށް 4 ގަޑިއިރާއި 6 ގަޑިއިރު ދޭތެރޭ އެތަނުގައި ހޭދަކުރަން ޖެހިދާނެ ކަމަށް ލަފާކުރެވޭ ކަމަށްވެސް ވިދާޅުވިއެވެ.

އަލިފާން ކޮންޓްރޯލްވުމަށްފަހު،މަށްފަހު، ކައިރީގައި ހުރި ގެތަކުގެ ހާލަތު ބަލާނެ ކަމަށް އެންޑީއެމްއޭއިން ވިދާޅުވިއެވެ. މި އެސެސްމަންޓް ހަދާނީ ސިފައިން ކަމަށާއި، އޭގެ ފަހުން މީހުން ގެތަކަށް ބަދަލުކުރުމުގެ މަސައްކަތް މަޑުމަޑުން ކުރިއަށް ގެންދާނެ ކަމަށް އެ ފަރާތުން ހާމަކުރިއެވެ.

މީގެއިތުރުން، ސޯޝަލް ސެންޓަރުގައި އިމަޖެންސީ އިވެކުއޭޝަން ސެންޓަރެއް ޤާއިމްކޮށްފައިވާ ކަމަށާއި، އެތަނުން ސައިކޯ ސޯޝަލް ސަޕޯޓް ފޯރުކޮށްދިނުމުގެ މަސައްކަތްވެސް ކުރިއަށްދާނެ ކަމަށް އެންޑީއެމްއޭއިން ވިދާޅުވިއެވެ. އަދި މިހާތަނަށް އެތަނަށް އައި މީހުންގެ ތެރެއިން އެއްވެސް މީހަކަށް ސީރިއަސް ސިއްހީ މައްސަލައެއް ދިމާވެފައިނުވާ ކަމަށްވެސް ފާހަގަކުރެއްވިއެވެ.

އެންޑީއެމްއޭއިން ވަނީ އެއްވެސް އެހީތެރިކަމެއް ބޭނުންވާ ފަރާތެއް ވާނަމަ 115 އަށް ގުޅައި ސެންޓަރަށް ވަޑައިގަތުމަށް އާންމުންނަށް އިލްތިމާސްކޮށްފައެވެ.