ޚަބަރު
ހައުސިންގ މިނިސްޓްރީގައި ރޯވި އަލިފާނުގެ ބޮޑުބައި ނިއްވާލެވިއްޖެ

ގެދޮރުވެރިކަމާއި ބެހޭ ވުޒާރާ ފޮޓޯ: އެކްސިންޓަންޓްސް އިން މޯލްޑިވްސް
މާލޭގައި ހުންނަ ހައުސިންގ މިނިސްޓްރީގެ އިމާރާތުގައި މިއަދު ހެނދުނު ރޯވި އަލިފާނުގެ ބޮޑުބައި ނިއްވާލެވިފައިވާ ކަމަށް އެމްއެންޑީއެފް ފަޔަރ އެންޑް ރެސްކިއުއިން ބުނެފިއެވެ.
އެމްއެންޑީއެފް ފަޔަރ އެންޑް ރެސްކިއުގެ އިންސިޑެންޓް ކޮމާންޑަރ ޕީއެސްއެމް ނިއުސްއަށް ދެއްވި ޚާއްސަ އޚާއްސަ އިންޓަވިއުއެއްގައި ވިދާޅުވި ގޮތުގައި، ހައުސިންގ މިނިސްޓްރީގައި އަލިފާނުގެ ހާދިސާއެއް ހިނގައިގެން އުޅޭކަމުގެ މަޢުލޫމާތު އެމްއެންޑީއެފް ފަޔަރ އެންޑް ރެސްކިއުއަށް ލިބިފައިވަނީ މިއަދު ހެނދުނު 6:27 ހާއިރުއެވެ. މަޢުލޫމާތު ލިބުނު ހިސާބުން ފެށިގެން އެމްއެންޑީއެފްއިން އެ ސަރަހައްދުގައި މަސައްކަތްކުރަން ފަށާފައިވެއެވެ.
އިންސިޑެންޓް ކޮމާންޑަރ އިތުރަށް ވިދާޅުވި ގޮތުގައި، މިވަގުތުވެސް ފަޔަރ އެންޑް ރެސްކިއުގެ ޓީމްތައް އިމާރާތުގެ އެތެރެއަށް ވަދެގެން މަސައްކަތް ކުރަމުންދެއެވެ. "މިހާރުވެސް ފަޔަރ ފައިޓް ކުރުމުގެ މަސައްކަތް ކުރަމުންދަނީ. އެއްކޮށް އަލިފާން ނިއްވާ ލެވުނީއެއް ނޫން. މިހާރު ވިސްނުން މިހުރީ ރޯވެފައި ހުރި ދިމާތަކަށް އިތުރަށް ފެން ޖަހައިގެން އެތެރެއަށް ޓީމްތައް ވައްދައިގެން މަސައްކަތްކުރުމަށް. ބޮޑުބައި މިހާރު އަޅުގަނޑުމެންނަށް ނިއްވާލެވިފައި މިވަނީ" އެމަނިކުފާނު ވިދާޅުވިއެވެ.
އެމްއެންޑީއެފްއިން އިތުރަށް ފާހަގަކުރެއްވި ގޮތުގައި، މި އިމާރާތަކީ ސްޓީލް ސްޓްރަކްޗަރއަކަށްވާތީ އިމާރާތް ވަރަށް ބަލިކަށިވެފައިވެއެވެ. އަލިފާން ނިއްވުމުގެ މަސައްކަތުގައި އެމްއެންޑީއެފްގެ އިތުރުން އެމްއޭސީއެލްއާއި އެމްޕީއެލް އަދި އެކިއެކި ވުޒާރާގެ މުވައްޒަފުންނާއި، އެންޑީއެމްއޭ، އަދި ރެޑް ކްރެސެންޓްގެ އެހީތެރިކަން ލިބިފައިވާކަމަށްވެސް އެމްއެންޑީއެފްއިން ވަނީ ފާހަގަކުރައްވާފައެވެ.
ރޯވި އަލިފާންގަނޑުގެ ބޮޑުބައި ނިއްވާލެވިއްޖެ: އެމްއެންޑީއެފް pic.twitter.com/4F2CVmOQWo
— PSM News (@psmnewsmv) December 12, 2024