ޚަބަރު
ދުމުގެ އަސަރުން ރައްކާތެރިވުމަށް ސިއްޙަތު ވުޒާރާއިން އިލްތިމާސްކޮށްފި

ދުމުގެ އަސަރުން ރައްކާތެރި ވުމަށް މާސްކު އަޅަނީ ފޮޓޯ: އެކްސް
މާލޭގައި މިއަދު ހިނގި އަލިފާނުގެ ހާދިސާއާ ގުޅިގެން މުޅި މާލެއަށް ދުމުގެ އަސަރުކޮށްފައިވާތީ، ނޭވާލާން އުނދަގޫވެ، ބޯއެނބުރުން ފަދަ ކަމެއް ދިމާވެއްޖެނަމަ ލަސްނުކޮށް ޞިއްޙީ އެހީތެރިއެއްގެ ލަފާހޯދުމަށް ސިއްޙަތާ ބެހޭ ވުޒާރާއިން އިލްތިމާސްކޮށްފިއެވެ.
ސިއްޙަތާ ބެހޭ ވުޒާރާއިން މިއަދު ނެރުނު ބަޔާނެއްގައި ބުނެފައިވަނީ، ނޭވާލާ ނިޒާމް އަދި ހިތުގެ ބަލިތައް ހުންނަ ފަރާތްތަކަށް ދުމުގެ ސަބަބުން ކުރާ ނޭދެވޭ އަސަރު ބޮޑުވުން އެކަށީގެންވާ ކަމަށެވެ. އެހެންކަމުން ނޭވާ ކުރުވުން، ނޭވާލާން އުނދަގޫވުން، ގަދަޔަށް ކެއްސުން އަދި ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ޞިއްޙީ އެހީތެރިއެއްގެ ލަފާހޯދުމަށް އެ ވުޒާރާއިން ވަނީ އެދިފައެވެ.
މީގެ އިތުރުން، އަލިފާނުގެ ހާދިސާއާ ގުޅިގެން ސަމާލުކަން ދޭންވީ ބައެއް ކަންކަންވެސް ސިއްޙަތާ ބެހޭ ވުޒާރާއިން ވަނީ ހިއްސާކޮށްފައެވެ. އެގޮތުން ގޭގެ ދޮރުތަކާއި ކުޑަދޮރުތައް، ދުން ނުވަންނާނެހެން ބަންދުކުރުމަށާއި، އާންމު ފަރާތްތަކުން ދުމުގެ އަސަރުކޮށްފައިވާ ސަރަހައްދުތަކަށް ކޮންމެހެން ނުކުންނަން ޖެހިއްޖެ ހާލަތެއްގައި މެނުވީ ނުނިކުތުމަށް ވަނީ އިލްތިމާސްކޮށްފައެވެ. އަދި ދުމުގެ އަސަރުކޮށްފައިވާ ސަރަހައްދަކަށް ނުކުތުމުގެ ކުރިން އަނގައާއި ނޭފަތް ނިވާކުރުމަށްވެސް އެ ވުޒާރާއިން ވަނީ އެދިފައެވެ.
މި ހާދިސާއާ ގުޅިގެން ސިއްޙަތާ ބެހޭ ވުޒާރާއިން ދެއްވާފައިވާ އިރުޝާދުތަކަށް ޢަމަލުކުރުމަށް އާންމުންނަށް ގޮވާލާފައިވާއިރު، އިތުރު މަޢުލޫމާތު ލިބިވަޑައިގަންނަވާނީ އެ ވުޒާރާގެ ރަސްމީ ޗެނަލްތަކުން ކަމަށްވެސް ވަނީ އަންގަވާފައެވެ.