ހައުސިން މިނިސްޓްރީ ގައި ރޯވުމާއި ގުޅިގެން މިނިސްޓަރު ރާއްޖެ ވަޑައިގަންނަވަނީ

މާލޭގައި ހައުސިން މިނިސްޓްރީ ހުންނަ އިމާރާތުގައި ހިނގި ބޮޑު އަލިފާނުގެ ހާދިސާއާ ގުޅިގެން، މި ވަގުތު ރަސްމީ ދަތުރެއްގައި ތައިލެންޑުގައި ހުންނެވި ހައުސިން މިނިސްޓަރު ޑރ. އަލީ ހައިދަރު، އެ ދަތުރު ކުރުކޮށްލައްވައި އަވަހަށް ރާއްޖެ ވަޑައިގަންނަވަން ނިންމަވައިފިއެވެ.

މިނިސްޓަރު ހައިދަރު ތައިލެންޑަށް ވަޑައިގެންފައިވަނީ އދ. އިން އިންތިޒާމުކޮށްގެން ބޭއްވި "ސެޝަން އޮފް ދަ ކޮމިޓީ އޮން ސްޓެޓިސްޓިކްސް" ގެ 9 ވަނަ ބައްދަލުވުމުގައި ބައިވެރިވެ ވަޑައިގަތުމަށެވެ. ނަމަވެސް، މިއަދު ހިނގި މި ނުރައްކާތެރި ހާދިސާއާ ގުޅިގެން މިނިސްޓަރު ވަނީ އަވަހަށް ރާއްޖެ އެނބުރި ވަޑައިގަތުމަށް ނިންމަވާފައެވެ.

އަލިފާނުގެ ހާދިސާ ހިނގީ މ. ގްރީން ބިލްޑިންގ ގައެވެ. މި އިމާރާތަކީ ހައުސިން މިނިސްޓްރީގެ އިތުރުން، ތިމާވެއްޓާ ބެހޭ މިނިސްޓްރީ، ކޮންސްޓްރަކްޝަން މިނިސްޓްރީ އަދި މާލޭ ސިޓީ ކައުންސިލްގެ އޮފީސްތައް ހިންގާ އިމާރާތެކެވެ. އަލިފާން ރޯވެ މުޅި އިމާރާތަށް ފެތުރުނު އިރު، ސިފައިން މިހާރުވެސް އަންނަނީ އަލިފާން ނިއްވުމުގެ މަސައްކަތް ކުރަމުންނެވެ.

މި ހާދިސާއާ ގުޅިގެން ހައުސިން މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، މިނިސްޓްރީން ބަލަހައްޓާ ހައުސިން ސްކީމްތަކުގެ ލިޔެކިޔުންތަކާއި ގެދޮރުވެރިޔާ ސްކީމްގެ ހުރިހާ ލިޔުމެއް ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާތީ، މި އަލިފާނުގެ ހާދިސާގައި އެ ލިޔުންތަކަށް އެއްވެސް އަސަރެއް ނުކުރާ ކަމަށެވެ. އަދި މި ހާދިސާއާ ގުޅިގެން ސަލާމަތާއި ރައްކާތެރިކަމަށްޓަކައި ކުރެވެން ހުރި ކަންކަމާ ބެހޭ ގޮތުން ކަމާ ގުޅޭ ފަރާތްތަކާ މަޝްވަރާކުރަމުންދާ ކަމަށްވެސް އެ ބަޔާނުގައި ފާހަގަކޮށްފައިވެއެވެ.