އަލިފާނުގެ ހާދިސާގެ ސަބަބުން ގެދޮރު ގެއްލުނު ފަރާތްތަކަށް މާލީ އެހީތެރިކަން ފޯރުކޮށްދިނުމަށް އެންޑީއެމްއޭ ތައްޔާރު

މާލޭގައި ހިނގި ބޮޑު އަލިފާނުގެ ހާދިސާއާ ގުޅިގެން ގެދޮރު ގެއްލުނު ފަރާތްތަކަށް ފައިސާގެ އެހީތެރިކަން ފޯރުކޮށްދޭން ޖެހިއްޖެނަމަ އެކަމަށް ތައްޔާރުވެގެން ތިބިކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން  ހާމަކޮށްފައެވެ.

އެންޑީއެމްއޭގެ ޗީފް އެގްޒެކެޓިވް ހިސާން ހަސަން ޕީއެސްއެމް ނިއުސްއަށް ދެއްވި މަޢުލޫމާތުގައި ވިދާޅުވި ގޮތުގައި މި ހާދިސާއާ ގުޅިގެން މިހާތަނަށް 50 އަށްވުރެ ގިނަ މީހުންނަށް އެހީތެރިކަން ބޭނުންވާކަން ވަނީ ފާހަގަކުރެވިފައެވެ. މި ފަރާތްތަކަށް ބޭނުންވާ އަސާސީ ބައެއް ކަންކަން ވަނީ ހަމަޖައްސައިދެވިފައެވެ. އަދި ބައެއް ފަރާތްތަކުން އާއިލާގެ ގެތަކަށް ބަދަލުވާން އެދުމުން އެކަމުގެ ހުއްދަވެސް ދެވިފައިވާ ކަމަށް އޭނާ ވިދާޅުވިއެވެ.

ހިސާން އިތުރަށް ވިދާޅުވި ގޮތުގައި އަލިފާން ރޯވި އިމާރާތުގެ ވަށައިގެންވާ އިމާރާތްތަކަށް ވަދެ، ސަލާމަތީ ބާރުތަކާއެކު ރެޕިޑް އެސެސްމަންޓު ހެދުމުގެ މަސައްކަތް މިހާރުދަނީ ކުރިއަށެވެ. މި އިމާރާތްތަކުގެ ތެރެއިން މީހުން ބަދަލުކުރަން ޖެހޭ ހާލަތުގައިވާ އިމާރާތްތަކުން މީހުން ބަދަލުކުރުމުގެ މަސައްކަތްވެސް ކުރިއަށް ގެންދާނެ ކަމަށް އޭނާ ފާހަގަކުރެއްވިއެވެ.

މިތަންތަނަށް ވަދެ މީހުންނަށް ބަދަލުވެވޭނެ ތަންތަންތޯ ބެލުމަށް މަސައްކަތް ކުރަމުންދަނީ. ކްލިއަރެންސް ލިބުނީމަ ބަދަލުކުރުމުގެ މަސައްކަތްތައް ކުރާނެ

ހިސާން ވިދާޅުވިއެވެ.

އެމަޖެންސީ އޮޕަރޭޝަންގެ ތެރެއިން ބޯހިޔާވަހިކަން ފޯރުކޮށްދޭން ޖެހިއްޖެނަމަ މާލީ އެހީތެރިކަންވެސް ފޯރުކޮށްދިނުމަށް ތައްޔާރަށް ތިބިކަމަށް ހިސާން ވިދާޅުވިއެވެ. މީގެއިތުރުން، އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި 4 ސްކޫލެއްގެ ހެނދުނުގެ ދަންފަޅި ވަނީ މެދުކަނޑާލާފައެވެ. މެންދުރުފަހުގެ ދަންފަޅިތައް ކުރިއަށް ގެންދާނީ ހާލަތު ދެނެގަތުމަށްފަހު ކަމަށްވެސް އޭނާ ފާހަގަކުރެއްވިއެވެ.