ކޮމަންވެލްތުގެ ބައްދަލުވުމުގައި ބައިވެރިވެވަޑައިގަތުމަށް ނައިބު ރައީސް ފުރާވަޑައިގެންފި

ކޮމަންވެލްތުގެ އިސްވެރިންގެ 28 ވަނަ ބައްދަލުވުން (ޗޮގަމް 2026) ގައި ބައިވެރިވެވަޑައިގަތުމަށްޓަކައި، ރައީސުލްޖުމްހޫރިއްޔާގެ ނައިބު އަލްއުސްތާޒު ޙުސައިން މުޙައްމަދު ލަޠީފް މިއަދު އެންޓީގާ އެންޑް ބާބިއުޑާއަށް ފުރާވަޑައިގެންފިއެވެ. މި ދަތުރުފުޅުގައި އެމަނިކުފާނުގެ އަރިހުގައި ދިވެހި ސަރުކާރުގެ މަތީ ފަންތީގެ ވަފުދެއް ބައިވެރިވެއެވެ.

ނޮވެމްބަރު 1 އިން 4 އަށް ކުރިއަށްދާ މި ސަމިޓް ބޭއްވުމަށް ހަމަޖެހިފައިވަނީ "އެކްސެލެރޭޓިން ޕާޓްނަރޝިޕްސް އެންޑް އިންވެސްޓްމަންޓް ފޯރ އަ ޕްރޮސްޕަރަސް ކޮމަންވެލްތު" މި ޝިއާރުގެ ދަށުންނެވެ. މި ބައްދަލުވުމުގެ މައިގަނޑު އަމާޒަކީ މެންބަރު ގައުމުތަކުގެ މެދުގައި އޮންނަ ގުޅުން އިތުރަށް ބަދަހިކުރުމާއި، ދެމެހެއްޓެނިވި އިންވެސްޓްމަންޓްތަކަށް މަގުފަހިކުރުމުގެ އިތުރުން، އެންމެންގެ ހިއްސާ އޮންނަ އިގްތިސާދީ ދުވެއްޔެއް ބިނާކުރުމެވެ.

މި ރަސްމީ ދަތުރުފުޅުގައި ނައިބު ރައީސް ޗޮގަމްގެ ޢާންމު ޖަލްސާތަކުގެ އިތުރުން، ހަވާސާގައި ކުރިއަށްދާ އެކި ހަރަކާތްތަކުގައި ބައިވެރިވެވަޑައިގަތުމަށް ވަނީ ހަމަޖެހިފައެވެ. އަދި ރާއްޖޭގެ ފަރާތުން ބަޔާން އިއްވެވުމަށާއި މަތީ ފަންތީގެ އެކި މަޝްވަރާތަކުގައި އެމަނިކުފާނު ވާހަކަފުޅު ދައްކަވާނެއެވެ.

ކޮމަންވެލްތުގެ ގައުމުތަކުގެ ވެރިން އެއްތަންވާ މި ސަމިޓަކީ، ދުނިޔެއަށް ކުރިމަތިވަމުންދާ އިގްތިސާދީ، ތިމާވެށީގެ އަދި ސަލާމަތީ ގޮންޖެހުންތަކުން އަރައިގަތުމަށް ގުޅިގެން މަސައްކަތްކުރުމަށް ލިބޭ އަގުހުރި ފުރުސަތެކެވެ. މީގެއިތުރުން، މޫސުމީ ބަދަލުތަކުން އަރައިގަތުމަށް ގައުމުތަކުގެ ވިލުންވެރިކަން އިތުރުކުރުމަށާއި، ބައިނަލްއަގްވާމީ ވިޔަފާރި ފުޅާކުރުމުގެ އިތުރުން ދެމެހެއްޓެނިވި ތަރައްގީގެ ލަނޑުދަނޑިތައް ހާސިލުކުރުމަށް އެޅިދާނެ އަމަލީ ފިޔަވަޅުތަކާ ގުޅޭގޮތުން ވެސް މި ސަމިޓުގައި ފުޅާ ދާއިރާއެއްގައި މަޝްވަރާކުރުމަށް ވަނީ އެޖެންޑާކޮށްފައެވެ.