ގަލްފުން ތެޔޮ ބޭރުކުރާ މިންވަރު ރެކޯޑު އަދަދަކަށް އިތުރުވި ނަމަވެސް އަގުތައް އުފުލެނީ

އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން ތެލުގެ ސަޕްލައިއަށް ކުރިމަތިވި ބޮޑު ހުއްޓުމަށް ލުޔެއް ލިބި، ގަލްފުގެ ޤައުމުތަކުން ތެޔޮ ބޭރުކުރާ މިންވަރު ވަރަށް ބޮޑަށް އިތުރުވެއްޖެއެވެ.

މާކެޓް އިންޓެލިޖެންސް ކުންފުންޏެއް ކަމަށްވާ ކްލެޕަރގެ ހިސާބުތައް ދައްކާގޮތުން، އޮކްޓޯބަރު 18 ގެ ނިޔަލަށް ހިނގި ހަފުތާގައި ގަލްފުން ދުވާލަކު އެވްރެޖުކޮށް 24.6 މިލިއަން ފީފާގެ ތެޔޮ ބޭރުކޮށްފައިވާއިރު، މިއީ ހަނގުރާމައިގެ ކުރިން ބޭރުކުރި އެވްރެޖު މިންވަރަށްވުރެވެސް މަތީ އަދަދެކެވެ. ނަމަވެސް، މި ކުރިއެރުމާއެކުވެސް ދުނިޔޭގެ ބާޒާރުގައި ތެލުގެ އަގު ދަނީ މެދުކެނޑުމެއްނެތި އުފުލެމުންނެވެ.

ދުނިޔޭގެ ބެންޗްމާކް ކަމަށްވާ ބްރެންޓް ކްރޫޑްގެ އަގު މިހާރު ހުރީ މިދިޔަ އެޕްރީލް މަހަށްފަހު އެންމެ މަތީގައެވެ. މިއީ ހަނގުރާމަ ފެށުމުގެ ކުރިން ހުރި މިންވަރަށްވުރެ 60 އިންސައްތައަށްވުރެ ބޮޑު އުފުލުމެކެވެ. ހުކުރު ދުވަހު ބްރެންޓް ކްރޫޑްގެ ޑިސެމްބަރު މަހުގެ ފިއުޗާސް އަގުތައް ދެ އިންސައްތައަށްވުރެ މައްޗަށް ގޮސް، ފީފާއެއްގެ އަގު ވަގުތީގޮތުން 117 ޑޮލަރަށްވުރެ މައްޗަށް އަރާފައިވެއެވެ. އެނަލިސްޓުން ވިދާޅުވާގޮތުގައި، ސަޕްލައި އިތުރުވި ނަމަވެސް އަގުތައް އުފުލެނީ ހަނގުރާމަ އަނެއްކާވެސް ވަރުގަދަވެދާނެ ކަމުގެ ބިރާއި، ރައްކާކޮށްފައި ހުރި ތެލުގެ ސްޓޮކް މަދުވުމުގެ އިތުރުން ސަރަޙައްދުން ބޭރަށް ތެޔޮ އުފުލުމުގެ ޚަރަދު އިންތިހާއަށް ބޮޑުވުމާ ގުޅިގެންނެވެ.

ހޮރްމުޒް ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ދީފާނެ ހަމަލާތަކުން ސަލާމަތްވުމަށްޓަކައި، ކުންފުނިތަކުން ދަނީ އޮމާން އަދި ޔުނައިޓެޑް އަރަބް އެމިރޭޓްސް (ޔޫއޭއީ) ގެ އައްސޭރިފަށުން ކުދި ބޯޓުތަކުން ބޮޑެތި ޓޭންކަރުތަކަށް ތެޔޮ ބަދަލުކުރާ ޚާއްޞަ ނިޒާމެއް ބޭނުންކުރަމުންނެވެ. މީގެ އިތުރުން، ސަޢޫދީ ޢަރަބިއްޔާގެ އީސްޓް-ވެސްޓް ހޮޅިލައިނާއި ޔޫއޭއީގެ ހަބްޝާން-ފުޖައިރާ ހޮޅިލައިން މެދުވެރިކޮށް، ހޮރްމުޒް ކަނޑުއޮޅި ބައިޕާސްކޮށް ތެޔޮ ބޭރުކުރާ މިންވަރު ވަނީ ވަރަށް ބޮޑަށް އިތުރުކޮށްފައެވެ. ސެޕްޓެމްބަރު މަހާ ހަމައަށް ގަލްފުން ބޭރުކުރި ތެލުގެ 40 އިންސައްތަ ބޭރުކޮށްފައިވަނީ ކަނޑުއޮޅި ބޭނުންނުކޮށެވެ. މިއީ ހަނގުރާމައިގެ ކުރިން މި މަގުން ބޭރުކުރި 17 އިންސައްތައާ އަޅާބަލާއިރު ބޮޑު އިތުރުވުމެކެވެ.

ނަމަވެސް މި ބަދަލުތަކާއެކު ދަތުރުފަތުރުގެ ޚަރަދު ވަނީ އިންތިހާއަށް އުފުލިފައެވެ. ލަންޑަން ސްޓޮކް އެކްސްޗޭންޖް ގްރޫޕުގެ ހިސާބުތަކުން ދައްކާގޮތުގައި، އިންޝުއަރެންސް ޕްރީމިއަމްތައް މައްޗަށް ދިއުމާއި ލޮޖިސްޓިކްސް ދަތިތަކާ ހުރެ، ފީފާއަކުން ފްރައިޓް ޚަރަދު ވަނީ އާންމު ރޭޓަށްވުރެ 10 ގުނަ މައްޗަށް ގޮސް، 40 ޑޮލަރަށް އަރާފައެވެ. ޔޫކޭ މެރިޓައިމް ޓްރޭޑް އޮޕަރޭޝަންސްއިން ރިޕޯޓްކޮށްފައިވާ ގޮތުގައި، މިދިޔަ އޮކްޓޯބަރު މަހަކީ ހަނގުރާމަ ފެށުނުފަހުން ވިޔަފާރި އުޅަނދުތަކަށް އެންމެ ގިނައިން ހަމަލާދިން މަހެވެ. އެގޮތުން 32 ހާދިސާއެއް އެ މަހު ވަނީ ރެކޯޑުކުރެވިފައެވެ.

އިންޓަނޭޝަނަލް އެނާޖީ އޭޖެންސީ (އައިއީއޭ) ގެ އެންމެ ފަހުގެ ހިސާބުތައް ދައްކާގޮތުން ސެޕްޓެމްބަރު މަހު އޮޕެކްގެ ގަލްފު އުފެއްދުންތެރިކަން ހުރީ ދުވާލަކު 15.8 މިލިއަން ފީފާގައެވެ. މިއީ ހަނގުރާމައިގެ ކުރީގެ މިންވަރުގެ 75 އިންސައްތައެވެ. ހަމައެއާއެކު، ސެޕްޓެމްބަރު މަހު ރައްކާކޮށްފައި ހުރި ތެލުގެ ސަޕްލައިން 10 މިލިއަން ފީފާ މަދުވެފައިވާއިރު، ދުނިޔޭގެ ޖުމްލަ ސްޓޮކް މިހާރު ހުރީ ހަނގުރާމައިގެ ކުރިން ހުރި މިންވަރަށްވުރެ 509 މިލިއަން ފީފާ ދަށުގައެވެ.

މާކެޓް ދިރާސާކުރާ ފަރާތްތަކުން ލަފާކުރާގޮތުގައި، ހަނގުރާމައަށް ދާއިމީ ސިޔާސީ ހައްލެއް ނުލިބެނީސް އަދި ހޮރްމުޒް ކަނޑުއޮޅީގެ ޙާލަތު އާންމު ޙާލަތަކަށް ރުޖޫޢަ ނުވަނީސް ތެލުގެ އަގު ކުރިން ހުރި މިންވަރަށް، ނުވަތަ 70 ޑޮލަރަށް ތިރިވުމަކީ އެކަށީގެންވާ ކަމެއް ނޫނެވެ. މާކެޓްތަކުގެ އިންތިޒާރުތައް ހުރިގޮތުން، 2027 ވަނަ އަހަރުގެ އޮކްޓޯބަރަށް ލަފާކުރާ ބްރެންޓް ފިއުޗާސް އަގުތައްވެސް މިހާރު ހުރީ ފީފާއަކަށް 90 ޑޮލަރަށްވުރެ މަތީގައެވެ.