މާލޭ އުތުރު ބަނދަރުގައި އަޅާ 3 ޖެޓީގެ ކޮންކްރީޓް މަސައްކަތް ނިންމާލައިފި

މާލޭ އުތުރު ބަނދަރުގައި އަޅާ ފިންގަރ ޖެޓީތަކުގެ ތެރެއިން 15 މީޓަރުގެ 3 ޖެޓީއެއްގެ ކޮންކްރީޓް މަސައްކަތްތައް އެއްކޮށް ނިންމާލައިފި ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

އެމްޓީސީސީން އެކްސްގައި ކުރެއްވި ޕޯސްޓެއްގައި ވިދާޅުވީ، މި މަޝްރޫޢުގެ ދަށުން ދެން އެންމެ އަވަހަށް ކުރިއަށް ގެންދިއުމަށް ހަމަޖެހިފައި ވަނީ ޖެޓީތަކުގައި ލަކުޑި ޑެކް އެޅުމުގެ މަސައްކަތް ކަމަށެވެ.

މީގެއިތުރުން، އުޅަނދުފަހަރު އެޅުމަށް ބޭނުންކުރާ މޫރިންގ ބޮލާޑްސް ހަރުކުރުމާއި، ޖެޓީ ސަރަޙައްދު އަލިކުރުމަށް ބޭނުންވާ ބައްތިތައް ހަރުކުރުމުގެ މަސައްކަތްތައް ވެސް ކުރިއަށް އޮތް ތަނުގައި ކުރިއަށްދާނެ ކަމަށް އެމްޓީސީސީން ވިދާޅުވެފައިވެއެވެ.

Concrete works for the 3 15-meter jetties are now complete for the Design and Build of Jetties in Malé North Harbour (Finger Jetty) Project. Upcoming works now include the Installation of Timber planks-Deck, installation of mooring bollards and lights. #MTCCProjects #TeamMTCC #RayyithungeKunfuni #GaumuBinaakurumugaaMTCC

— MTCC Plc (@MTCCPlc) November 1, 2026

މި މަޝްރޫޢުގެ ދަށުން ޖުމްލަ 6 ފިންގަރ ޖެޓީ އެޅުމަށް ވަނީ ހަމަޖެހިފައެވެ. މީގެ ތެރޭގައި ހިމެނެނީ 25 މީޓަރު ދިގު، 61 މީޓަރު ފުޅާ 3 ޖެޓީގެ އިތުރުން 15 މީޓަރު ދިގު، 6 މީޓަރު ފުޅާ 3 ޖެޓީއެވެ.

އެމްޓީސީސީން މަޢުލޫމާތު ދޭ ގޮތުގައި، މި މަޝްރޫޢުގެ މަސައްކަތް ނިމުމުން އެ ބަނދަރު ބޭނުންކުރާ ޢާންމު ރައްޔިތުންނަށާއި ދަތުރުވެރިންނަށް ބޮޑެތި ފަސޭހަތަކެއް ލިބިގެންދާނެއެވެ. ޚާއްޞަކޮށް ބަނދަރުގެ ތޮއްޖެހުން ކުޑަވެ، ބޭރުގައި އޮންނަ ލޯންޗުފަހަރަށް އެރުމަށްޓަކައި އެއް ލޯންޗުން އަނެއް ލޯންޗަށް އަރައިގެން އުފުލަންޖެހޭ ތަކުލީފުތަކަށް ނިމުމެއް އަންނާނެއެވެ.

މިއީ ކުޑަކުދިންނާއި، އިސްރަށްވެހިންގެ އިތުރުން ބުރަ ލަގެޖް ހިފައިގެން ދަތުރުކުރާ ފަރާތްތަކަށް ލިބޭނެ ވަރަށް ބޮޑު ލުޔެއް ކަމަށް އެމްޓީސީސީން ވިދާޅުވެއެވެ.

މީގެ އިތުރުން، މި ޖެޓީތައް ޤާއިމުކުރުމުން އެއްފަހަރާ ގިނަ ޢަދަދެއްގެ އުޅަނދުތަކަށް ކައިރިކުރެވޭނެ ޖާގަ ތަނަވަސްވެގެންދާނެ ކަމަށާއި، އޭގެ ސަބަބުން ދަތުރުތައް އަވަސްވެ، އުޅަނދުފަހަރަށް އަރައިފޭބުމުގައި ދަތުރުވެރިންނަށް ލިބޭ ރައްކާތެރިކަންވެސް އިތުރުވެގެންދާނެ ކަމަށް އެ ކުންފުނިން ފާހަގަކުރެއެވެ.

ރާއްޖޭގެ ޢުމްރާނީ ތަރައްޤީގެ އެންމެ ބޮޑު އެއް ކުންފުނި ކަމަށްވާ އެމްޓީސީސީ އުފެދުނީ 1980 ވަނަ އަހަރުގައެވެ. ވޭތުވެދިޔަ 45 އަހަރުގެ ތެރޭގައި އެ ކުންފުނިން ވަނީ ރާއްޖޭގެ އެކި ކަންކޮޅުތަކުގައި ޢުމްރާނީ އަދި އިޖުތިމާޢީ ތަރައްޤީގެ ގިނަ މަޝްރޫޢުތަކެއް ކާމިޔާބުކަމާއެކު ހިންގައި ނިންމައިފައެވެ.