ސައުދީން ހަދިޔާކުރި 50 ޓަނު ކަދުރު ރޯދައިގެ ކުރިން ބަހަނީ

ކުރިއަށް އޮތް ރަމަޟާން މަހަށް ސައޫދީ އަރަބިއްޔާއިން ރާއްޖެއަށް ހަދިޔާކުރި 50 ޓަނުގެ ކަދުރު، ރޯދަ މަސް ފެށުމުގެ ކުރިން ބަހައި ނިންމާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމް ވިދާޅުވި ގޮތުގައި، ކޮންމެ އަހަރެއްގެ ރޯދަ މަހަށް ސައުދީ އަރަބިއްޔާއިން ރާއްޖެއަށް ކަދުރު ހަދިޔާ ކުރާ އާދަތަކާ އެއްގޮތަށް، މި އަހަރުގެ ޝިޕްމަންޓް ވެސް މިހާރު ވަނީ ލިބިފައެވެ. އަދި މިނިސްޓްރީން މަސައްކަތް ކުރަމުންދަނީ ރޯދަ މަސް ފެށުމުގެ ކުރިން މާލެ އާއި ރާއްޖެތެރޭގެ ރަށްރަށަށް ކަދުރު ބަހައި ނިންމުމަށެވެ.

މިނިސްޓަރު އިތުރަށް ވިދާޅުވި ގޮތުގައި، މި އަހަރު ކަދުރު ބެހުމުގައި އައު ބަދަލެއް ގެނެސް، މިސްކިތްތަކުގައި އިފްތާރު ޕްރޮގްރާމް ހިންގަން ބޭނުންވާ ޖަމިއްޔާތަކަށް ވެސް ކަދުރުން ބައެއް ދޭން ނިންމާފައިވެ އެވެ.

މިދިޔަ އަހަރުގެ ރަމަޟާން މަހަށް ވެސް ސައުދީ އަރަބިއްޔާއިން ވަނީ ރާއްޖެއަށް 50 ޓަނުގެ ކަދުރު ހަދިޔާކޮށްފައެވެ. އޭރު މިނިސްޓްރީން ކަދުރު ބެހީ ފަގީރުންގެ ދަފްތަރުގައި ހިމެނޭ ކޮންމެ ގޭބިސީއަކަށް އެއް ޕެކެޓް ދިނުމަށް ފަހު، މީހުން ދިރިއުޅޭ ގޭބިސީތަކުގެ ތެރެއިން ކަދުރު ބަލައިގަންނަން އަންނަ މީހުންގެ ތަރުތީބުންނެވެ.

މި ހަދިޔާއަކީ ދެ ޤައުމުގެ ދެމެދުގައި އޮތް ބަދަހި ގުޅުމުގެ ނިޝާނެއްގެ ގޮތުގައި ބެލެވޭއިރު، ރާއްޖޭގެ ގިނަ ރައްޔިތުންނަށް ރަމަޟާން މަހުގައި މި ކަދުރުން މަންފާ ލިބޭނެ ކަމަށް ބެލެވެ އެވެ.