ޚަބަރު
އުމްރާއަށް ދާން ރައްކާކުރި ޑޮލަރު ރޯވި އިމާރާތުން ސިފައިން ސަލާމަތްކޮށްފި

ސިފައިން އަލިފާން ނިއްވުމުގައި ހަރަކާތްތެރި ވަނީ ފޮޓޯ:އެމްއެންޑީއެފް
މާލޭ ސިޓީ ކައުންސިލްގެ އިމާރާތުގައި މިއަދު ހެނދުނު ރޯވި އަލިފާނުގެ ހާދިސާގައި، އުމްރާއަށް ދިއުމަށް ކައުންސިލްގެ މުވައްޒަފަކު ރައްކާކޮށްފައި ހުރި 4،000 އެއްހާ ޑޮލަރު ސިފައިން ވަދެ ސަލާމަތްކޮށްފިއެވެ.
މި މަޢުލޫމާތު ކަށަވަރުކޮށްދެއްވަމުން މާލޭގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ، ފައިސާގެ ސީދާ އަދަދު އެނގިވަޑައިނުގަންނަވާ ކަމަށެވެ. އެނގިފައިވާ ގޮތުގައި މި ފައިސާ ރައްކާކޮށްފައި ހުރީ، ވައިޓަލް ރެޖިސްޓްރޭޝަން ޑިޕާޓްމަންޓްގައި މަސައްކަތްކުރާ ފިރިހެން މުވައްޒަފެކެވެ. އޭނާ މި މަހު އުމްރާއަށް ދިއުމަށް ތައްޔާރުވަމުން ދަނިކޮށް މި ހާދިސާ ހިނގާފައިވަނީއެވެ.
މުވައްޒަފު މި ފައިސާ ރައްކާކޮށްފައި ހުރީ އޮފީހުގެ ލޮކަރެއްގައެވެ. އަލިފާން ރޯވެ، ކޮންޓްރޯލް ނުވެ ދަނިކޮށް ސިފައިން ވަދެ މި ފައިސާ ސަލާމަތްކޮށްފައިވެއެވެ. މީގެ އިތުރުން ސިފައިންނާއި ފުލުހުންނާއި ކައުންސިލްގެ ބައެއް މުވައްޒަފުން ވެސް އަލިފާން އިތުރަށް ފެތުރުމުގެ ކުރިން ލިޔެކިޔުންތަކާއި އޮފީހުގެ އެހެން ތަކެތި ސަލާމަތްކުރުމަށް މަސައްކަތްކޮށްފައިވެއެވެ.
މި ހާދިސާ ފެށުނީ މިއަދު ހެނދުނު 6:30 ހާއިރު، ހައުސިން މިނިސްޓްރީގެ ފުރަތަމަ ފަންގިފިލާގެ ސީލިންގުގައި އަލިފާން ރޯވުމާ އެކުގައެވެ. އޭގެ ފަހުން އަލިފާންގަނޑު ބޮޑުވަމުން ގޮސް، ކޮންސްޓްރަކްޝަން މިނިސްޓްރީ އާއި ސިޓީ ކައުންސިލްގެ އޮފީހަށް ވެސް ބޮޑެތި ގެއްލުންތަކެއް ވެފައިވެއެވެ. އަލިފާންގަނޑު ކޮންޓްރޯލްކުރެވުނީ ރޯވިތާ ގާތްގަނޑަކަށް ހަތަރު ގަޑިއިރު ފަހުންނެވެ.