ދުނިޔެ
ސީރިއާގެ އަނިޔާވެރި ޖަލުތައް ބަންދުކޮށް، އަނިޔާވެރިން ހޯދުމަށް އިދިކޮޅު ބާރުތަކުން ނިންމައިފި

ސީރިއާގެ ސައިދްނާޔާ ޖަލުގެ ބޭރު ފޮޓޯ:އަލް ޖަޒީރާ
ސީރިއާގެ އިދިކޮޅު ބާރުތަކުން ވަނީ ވައްޓާލެވުނު ރައީސް ބަޝާރު އަލް-އަސަދުގެ ވެރިކަމުގައި ހިންގަމުން އައި އަނިޔާވެރި ޖަލުތައް ބަންދުކޮށް، ބަންދީންނަށް އަނިޔާކޮށް މަރާލުމުގައި ބައިވެރިވި ފަރާތްތައް ހޯދުމަށް ނިންމާފައެވެ.
އިދިކޮޅު ބާރުތަކުގެ ލީޑަރު އަހުމަދު އަލް-ޝަރާ ނުވަތަ އަބޫ މުހައްމަދު އަލް-ޖޮލާނީ ވަނީ ކުރީގެ ސަރުކާރުގެ ސަލާމަތީ ބާރުތައްވެސް އުވާލާނެކަމަށް ބުނެފައެވެ. މިކަން ރޮއިޓަރސް ނިއުސް އޭޖެންސީއަށް ލިބިފައިވާ ބަޔާނެއްގައި ބަޔާންކޮށްފައިވެއެވެ.
އާދީއްތަ ދުވަހު އަސަދުގެ ސަރުކާރު ވެއްޓުމާ ގުޅިގެން، އިންސާނީ ޙައްޤުތަކުގެ ޖަމާޢަތްތަކުން "އިންސާނީ ކަތިލާ ގެ" އެއްގެ ގޮތުގައި ސިފަކުރާ ސައިދްނާޔާ ޖަލުން ބަންދީން ދޫކޮށްލާ މަންޒަރު ދައްކުވައިދޭ ވީޑިއޯތަކެއް ފެތުރިފައިވެއެވެ.
ޔޫކޭގައި މަރުކަޒުކޮށްގެން މަސައްކަތްކުރާ ސިރިއަން އޮބްޒަވޭޓަރީ ފޯ ހިއުމަން ރައިޓްސްއިން ބުނާ ގޮތުގައި އަސަދުގެ ވެރިކަމުގައި ހިންގި ޖަލުތަކުގައި 60،000 އާ ގާތްކުރާ މީހުންނަށް އަނިޔާކޮށް މަރާލާފައިވެއެވެ.
ޖޮލާނީގެ އިސްލާމިސްޓް ހަނގުރާމަވެރި ގްރޫޕް، ހަޔާތު ތަހްރީރު އަލް-ޝާމް (އެޗްޓީއެސް) އިން އެހެން އިދިކޮޅު ފެކްޝަންތަކާއެކު ކުއްލި ހަމަލާއެއް ދީ، އަސަދު ޢާއިލާގެ 54 އަހަރުގެ ވެރިކަން ވައްޓާލާފައިވެއެވެ.
އާދީއްތަ ދުވަހުގެ ފަތިހު ގަޑިތަކުގައި އަސަދު ވަނީ ރަޝިޔާއަށް ފިލާފައެވެ. އޭނާއާއި އޭނާގެ އާއިލާއަށް ރަޝިޔާއިން ވަނީ ހިމާޔަތް ދީފައެވެ.ީފައެވެ. އިދިކޮޅު ބާރުތަކުން ވެރިރަށް ދިމިޝްޤު ހިފުމާ ގުޅިގެންނެވެ.
ވަކި ބަޔާނެއްގައި ޖޮލާނީ ބުނެފައިވަނީ ބަންދީންނަށް އަނިޔާކުރުމާއި މެރުމުގައި ބައިވެރިވި މީހުންނަށް މަޢާފު ދިނުމަކީ ކުރެވޭނެ ކަމެއް ނޫން ކަމަށެވެ.
"އަޅުގަނޑުމެން އެމީހުން ސީރިއާގައި ހޯދާނަން. އަދި ފިލައިގެން ދިޔަ މީހުން ހަވާލުކޮށްދިނުމަށް އެހެން ޤައުމުތަކުގައި އެދެން. އެއީ އިންސާފު ޤާއިމުކުރުމަށްޓަކައި،" އޭނާ ބުނެފައިވެއެވެ.
ރައީސް ބަޝާރު އަލް-އަސަދުގެ ވެރިކަން ވެއްޓުމާއެކު، ސީރިއާގެ ރައްޔިތުން ވަނީ ސަރުކާރުގެ ބަދުނާމު ޖަލުތަކަށް އަވަސްއަވަހަށް ގޮސް، އެމީހުންގެ ލޮބުވެތިން ހޯދަން މަސައްކަތް ފަށާފައެވެ.