"އިމުގާ" މެދުވެރިކޮށް ހުށަހަޅާ ޕާސްޕޯޓުތައް ހުޅުމާލެއިން ނެގޭނެ އިންތިޒާމު ހަމަޖައްސައިފި

 "އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް ހުޅުމާލެއިން ނެގޭނެ އިންތިޒާމު މިހާރު ހަމަޖެހިފައިވާ ކަމަށް އިމިގްރޭޝަނުން ބުނެފިއެވެ.

އިމިގްރޭޝަނުން ސޯޝަލް މީޑިއާގައި ކުރި ޕޯސްޓުރި ޕޯސްޓެއްގައި ބުނެފައިވަނީ، ޕާސްޕޯޓަށް އެދި ހުށަހަޅާއިރު، ޕާސްޕޯޓް ނަގަން ބޭނުންވާ ތަން ނުވަތަ ކަލެކްޝަން ޕޮއިންޓެއްގެ ގޮތުގައި ހުޅުމާލޭގެ ސެންޓަރުތައް ޖެހުމުން ޕާސްޕޯޓްތައް ނެގޭނެ ކަމަށެވެ.

މި ޚިދުމަތް ލިބޭނެ ތަންތަނުގެ ތެރޭގައި ހުޅުމާލެ ފުރަތަމަ ފިޔަވަހީގައި ހުންނަ އުމަރު ޒާހިރު އޮފީސް އިމާރާތުގެ ތިރީފަންގިފިލާ އަދި ހުޅުމާލެ ދެވަނަ ފިޔަވަހީގެ ވިނަރެސް 2ގެ އެއްވަނަ ފަންގިފިލާ ހިމެނެއެވެ.

މި އައު އިންތިޒާމަކީ، ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ މަޝްރޫޢުގެ ބައެކެވެ. މި މަޝްރޫޢު މިދިޔަ ނޮވެމްބަރު މަހުގެ 16 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިފްތިތާޙުކޮށްދެއްވާފައެވެ.

މިހާރު ޕާސްޕޯޓުގެ ޚިދުމަތް ލިބެނީ މާލެ ސަރަޙައްދުގެ އިތުރުން ސިޓީތަކާއި ހއ. ދިއްދޫންނެވެ. އަދި ދ. ކުޑަހުވަދޫގައިވެސް މި ޚިދުމަތް ފަށާފައިވާއިރު، މިއަހަރު ލ. ފޮނަދޫގައި މި ޚިދުމަތް ފެށުމަށް ވަނީ ނިންމާފައެވެ. މުޅި ރާއްޖެއަށް މި ޚިދުމަތް ފުޅާކުރުމުގެ މަޝްރޫޢު އެއްކޮށް ނިންމުމަށް ހަމަޖެހިފައިވަނީ އަންނަ އަހަރުގެ ނިޔަލަށެވެ.