އޮމަދޫ ޕޮލިސް ޕޯސްޓް އިމާރާތް: މިހާރު ކުރިއަށްދަނީ ބޭރު ފާރުގައި ސިމެންތި ޖެހުން

އދ. އޮމަދޫގައި ތަރައްޤީކުރަމުން އަންނަ ޕޮލިސް ޕޯސްޓުގެ އިމާރާތުގެ މަސައްކަތުގެ ތެރެއިން، މިހާރު ކުރިއަށްދަނީ އިމާރާތުގެ ބޭރު ފާރުގައި ސިމެންތި ޖެހުމުގެ މަސައްކަތް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ. މީގެ އިތުރުން ފުރާޅުގެ އެންމެ ފަހުގެ މަސައްކަތްތައް ވެސް ސައިޓުގައި މިހާރު އަންނަނީ ކުރަމުންނެވެ.

ދިވެހި ފުލުހުންގެ ޚިދުމަތުން ރަށްރަށުގައި ޤާއިމުކުރާ ޚާއްޞަ މަރުކަޒުތަކުގެ ތެރެއިން، އެމްޓީސީސީއާ ހަވާލުކޮށްގެން 10 ރަށެއްގައި ކުރިއަށްގެންދާ މި މަޝްރޫޢުގެ ދަށުން އޮމަދޫ ޕޮލިސް ޕޯސްޓުގެ އަމަލީ މަސައްކަތް ރަސްމީކޮށް ފަށާފައިވަނީ 2025 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހުއެވެ. މި މަޝްރޫޢަކީ ދަޢުލަތުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ބަޖެޓުން ޚަރަދުކޮށްގެން ކުރިއަށްގެންދާ މަޝްރޫޢެކެވެ.

މަޝްރޫޢުގެ ކުރިއެރުމާ ގުޅޭގޮތުން އެމްޓީސީސީން ހާމަކޮށްފައިވާ ގޮތުގައި، 2026 ގެ ކުރީކޮޅު ފެށި ބިންގަލުގެ މަސައްކަތްތަކާއި ފާރުތަކުގެ ބްލޮކް ޖެހުމުގެ މަސައްކަތް ނިމި، މެދުތެރޭގައި ވަނީ އިމާރާތުގެ ބީމްތައް އެޅުމާއި ފުރާޅުގެ މައިގަނޑު ލަކުޑި އޮނިގަނޑު އެޅުމުގެ މަސައްކަތް ނިންމާލާފައެވެ. އަދި މިހާރު ކުރިއަށްދަނީ އިމާރާތުގެ އެތެރޭގެ ބްލޮކް ޖެހުމުގެ މަސައްކަތްތަކާއި، ފުރާޅުގެ އެންމެ ފަހުގެ މަސައްކަތްތަކުގެ އިތުރުން ވަށާފާރުގައި ސިމެންތި ޖެހުމުގެ މަސައްކަތްތަކެވެ.

މި ޕޮލިސް ޕޯސްޓުގެ މަސައްކަތް އެއްކޮށް ނިމުމުން، ރަށުގެ އަމާންކަން ބެލެހެއްޓުމަށާއި، ކުށް މަދުކުރުމަށް ފުލުހުން ކުރަމުންދާ މަސައްކަތްތަކަށް ޒަމާނީ އަދި އެކަށީގެންވާ ޖާގައެއް ލިބި، ރައްޔިތުންނަށް ދެވޭ ޚިދުމަތުގެ ފެންވަރު އިތުރަށް މަތިވެގެންދާނެ ކަމަށް ބެލެވެއެވެ.