ދިވެހިރާއްޖޭގެ ޤައުމީ ރުކުނަކަށް އުނިކަމެއް އަންނާނެ އެއްވެސް ކަމެއް އަޅުގަނޑު ނުކުރާނަން: ރައީސުލްޖުމްހޫރިއްޔާ

ދިވެހިރާއްޖޭގެ ސައްތައިންސައްތަ އިސްލާމްވަންތަކަމާއި މިނިވަންކަން ފަދަ ޤައުމީ އެއްވެސް ރުކުނަކަށް ކުޑަވެސް އުނިކަމެއް އަންނާނެ އެއްވެސް ކަމެއް ނުކުރައްވާނެ ކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ރައީސުލްޖުމްހޫރިއްޔާ މި ޔަޤީންކަން ދެއްވީ ނަޞްރުގެ ދުވަހުގެ މުނާސަބަތުގައި، މާލޭގެ ޖުމްހޫރީ މައިދާނުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

މި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ދިވެހިރާއްޖޭގެ ސައްތައިންސައްތަ އިސްލާމްވަންތަކަމާއި، ދިވެހީންގެ ފުރިހަމަ މިނިވަންކަމާއި، އަމިއްލަވަންތަކަން ފަދަ، ޤައުމީ އެއްވެސް ރުކުނަކަށް ކުޑަވެސް އުނިކަމެއް އަންނާނެ ގޮތަކަށް އެމަނިކުފާނު އެއްވެސް ކަމެއް ނުކުރައްވާނެ ކަމެވެ.

އޭގެ ބަދަލުގައި، އަޅުގަނޑު އަޅާ ކޮންމެ ފިޔަވަޅެއް، ނިންމާ ކޮންމެ ނިންމުމެއް ނިންމާނީ ދިވެހި ޤައުމީ އެންމެހާ ބަހާތަކަށް ފުރިހަމަ ދިރުމާ، އާރޯކަމާ، ހިމާޔަތާއި، ރައްކާތެރިކަން ކަށަވަރުކޮށްދިނުމަށްޓަކައި.

ރައީސް ވިދާޅުވިއެވެ.

އަދި އެމަނިކުފާނު ކުރައްވާ ކޮންމެ މަސައްކަތްޕުޅެއް ވެސް ކުރައްވާނީ ދިވެހި ރައްޔިތުންނަށް މާ ތަރައްޤީ، އައު ޙަޔާތެއް ހޯދައިދިނުމުގެ މަތިވެރި އުފަލާއި ޔަޤީންކަމާ އެކުގައި ކަމަށްވެސް އެމަނިކުފާނު ފާހަގަކުރެއްވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ނަޞްރުގެ ދުވަހުގެ މުހިންމުކަމަށް އަލިއަޅުއްވާލައްވަމުން ރައީސް ވިދާޅުވީ، 1988 ނޮވެމްބަރު 3 ގައި ދިވެހީން ހޯދި ކާމިޔާބީއަކީ މިނިވަންކަމަށްޓަކައި އަދި ދިވެހީންގެ ދެމިތިބުމަށްޓަކައި ހޯދި ކާމިޔާބީއެއް ކަމަށެވެ. އަދި އެއީ ދިވެހީންގެ އުޖާލާ މުސްތަޤުބަލެއް ބިނާކުރުމުގެ އުއްމީދުގައި ހޯދި ވަރަށް މަތިވެރި ނަޞްރެއް ކަމަށް ވިދާޅުވިއެވެ.

އެ ހިތާމަވެރި އަދި ނުރައްކާތެރި ހާދިސާއަށް މިހާރު 40 އަހަރުވާން ކައިރިވެފައިވާއިރު، މި ޒަމާނުގައި ޤައުމެއްގެ މިނިވަންކަން ދިފާއުކުރަންޖެހޭ ގޮތްތަކާމެދު ފުންކޮށް ވިސްނާލަން ޖެހިފައިވާ ކަމަށް ރައީސް ވިދާޅުވިއެވެ. 

ސިޔާސީ ޖަޒުބާތުގެ ކުރިޔަށް ޤައުމީ އިޙްލާސްތެރިކަން ނެރެން އެބަޖެހޭ. ޒާތީ އަރާރުންތަކުގެ ކުރިޔަށް، ޖަމާއަތުގެ ބާއްޖަވެރިކަން އިސްކުރަންޖެހޭ. ވެރިކަމުގެ ދަހިވެތިކަމާއި ހަސަދަވެރިކަމުގެ ކުރިޔަށް، ޤައުމީ ސަލާމަތާއި ފުދުންތެރިކަމާއި، ދިވެހި ކޮންމެ ފަރުދެއްގެ އުފާވެރިކަމަށް ތަންދޭން އެބަޖެހޭ.

ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ދުނިޔޭގެ އެހެން ޤައުމުތައް މިނިވަންކަމާއެކު ތަރައްޤީގެ މައިދާނުގައި ކުރިއަރައިގެންދާ މަންޒަރު ބަލަން ތިބުމުގެ ބަދަލުގައި، ޤައުމުގެ ފިކުރު ކުރިއަށް ނެރެ، ރައްޔިތުން އެދޭ ތަރައްޤީ އާއި ފުދުންތެރިކަމަށް މަސައްކަތް ކުރަންޖެހޭކަމަށެވެ.