ޓޫރިސްޓް ފެސިލިޓީތަކުން ޑޮލަރު މާރުކުރަންޖެހޭ ބިލު މަޖިލީހުން ފާސްކޮށްފި

ރައްޔިތުންގެ މަޖިލީހުގެ މިއަދުގެ ޖަލްސާގައި، ޓޫރިސްޓް ފެސިލިޓީތަކުން ޑޮލަރު މާރުކުރަންޖެހޭ ގޮތަށް ސަރުކާރުގެ ފަރާތުން ހުށަހެޅި ބިލު ފާސްކޮށްފިއެވެ. މި ބިލު މަޖިލީހަށް ހުށަހެޅުއްވީ އިނގުރައިދޫ ދާއިރާގެ މެންބަރު އިބްރާހީމް ފަލާޙެވެ. ޖަލްސާގައި ބައިވެރިވި 56 މެންބަރުންގެ އިއްތިފާޤުން މި ބިލު ފާސްކުރެވުނެވެ.

ބޭރު ފައިސާއާ ބެހޭ މި ބިލުގައިވާ ގޮތުން، ރާއްޖޭގެ ރިސޯޓުތަކަށް އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުން، ނުވަތަ އެ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ% 20 ބޭންކިން ނިޒާމުގެ ތެރެއިން މާރުކުރަންޖެހޭނެއެވެ. އަދި ރިސޯޓުތައް ފިޔަވައި، ރާއްޖޭގައި ހިންގާ ގެސްޓް ހައުސްތަކާއި، ފަތުރުވެރިކަމުގެ ސިނާޢަތުގައި ޙަރަުގައި ޙަރަކާތްތެރިވާ އުޅަނދުތަކާއި އެނޫންވެސް ތަންތަނަށް އަންނަ ފަތުރުވެރިއަކަށް 25 ޑޮލަރު ނުވަތަ އެތަނަކަށް މީލާދީ މަހެއްގައި ލިބޭ ބޭރު ފައިސާގެ އާމްދަނީގެ %20 މާރުކުރަންޖެހޭނެއެވެ.

މާލިއްޔަތު ކޮމިޓީން މި ބިލު ދިރާސާކުރުމަށްފަހު، ބައެއް މުހިންމު ބަދަލުތައް ގެނެސްފައިވެއެވެ. އޭގެ ތެރޭގައި ޑޮލަރު މާރުކުރުމުން އިސްތިސްނާވާ އުމުރު 10 އަހަރުން 12 އަހަރަށް މަތިކުރުމާއި، ރިސޯޓަކަށް މާލީ ދަތިކަމެއް ދިމާވާނަމަ ރިސޯޓަށް ލިބޭ ބޭރު ފައިސާގެ އާމްދަނީގެ %20 އަށްވުރެ މަދުން މާރުކުރުމުގެ އިޚްތިޔާރު ދިނުން ހިމެނެއެވެ. ނަމަވެސް މި ލުއި ދެވޭނީ އެމްއެމްއޭއިން ކޭސް ރިވިއުކުރުމަށްފަހުގައެވެ.

ރާއްޖެއަށް ދިމާވެފައިވާ ބޭރު ފައިސާގެ މައްސަލަ ހައްލުކުރުމަށް ޤައުމީ ވިސްނުމެއްގައި އެންމެން ގުޅިގެން މަސައްކަތްކުރަންޖެހޭ ކަމަށް ބިލަށް ބަހުސްކުރެއްވި މަޖިލިސް މެންބަރުން ފާހަގަކުރެއްވިއެވެ. މި ބިލު ފާސްވުމާއެކު، ރާއްޖޭގެ އިޤްތިޞާދަށް އޭގެ އަސަރު ފެންނަން ފަށާނެކަމަށް ބެލެވެއެވެ.