ތިމާވެއްޓާ ބެހޭ ވުޒާރާގެ ޚިދުމަތްތައް ދެވޭނެ އަވަސް ޙައްލެއް ހޯދުމަށް މަސައްކަތް ކުރަމުންދާ ކަމަށް ބުނެފި

މިއަދުގެ އަލިފާނުގެ ހާދިސާއާއި ގުޅިގެން މޫސުމީ ބަދަލުތަކާ ތިމާވެއްޓާއި ހަކަތައާ ބެހޭ ވުޒާރާގެ ޚިދުމަތްތައް ހުއްޓިފައި ވުމުން ވުޒާރާގެ ޚިދުމަތްތައް ދެވޭނެ އަވަސް ޙައްލެއް ހޯދުމަށް މަސައްކަތް ކުރަމުންދާ ކަމަށް އެވުޒާރާއިން ބުނެފިއެވެ. 

ތިމާވެއްޓާ ބެހޭ ވުޒާރާއިން ނެރެފައިވާ ނޫސްބަޔާނެއްގައި ބުނެފައިވަނީ ވުޒާރާ ހިންގާ ޢިމާރާތުގައި މިއަދު ހިނގާދިޔަ އަލިފާނުގެ ހާދިސާއާ ގުޅިގެން ޢިމާރާތާއި ޢިމާރާތުގައި ހުރި ތަކެއްޗާއި އެކު ވަނީ އަދައިގެން ގޮސްފައިކަމަށެވެ. 

އަލިފާނުގެ ހާދިސާގެ ސަބަބުން ވުޒާރާގެ އެއްވެސް މުވައްޒަފަކަށް އެއްވެސް ގެއްލުމެއް ލިބިފައިނުވާ ކަމަށް އެވުޒާރާއިން ވަނީ ބުނެފައެވެ. 

މީގެއިތުރުން އެވުޒާރާއިން ބުނެފައިވަނީ އަލިފާނުގެ ހާދިސާގެ ސަބަބުން އެވުޒާރާއިން ދެމުންދާ ޚިދުމަތްތައް މެދުކެނޑިފައިވާ ކަމަށާއި، ނަމަވެސް އެޚިދުމަތްތައް ދެވޭނެ އަވަސް ޙައްލެއް ހޯދުމަށް މަސައްކަތް ކުރަމުންދާ ކަމަށެވެ. 

އަދި އެކަން ޙައްލު ކުރެވި ޚިދުމަތް ދެވޭނެ އިންތިޒާމު ހަމަޖެހުނުހާ އަވަހަކަށް ޢާންމުންނަށް އެކަން އަންގާނެ ކަމަށްވެސް އެވުޒާރާއިން ވަނީ ބުނެފައެވެ.